ပျောက်ဆုံးနေတဲ့ မန္တလေးမြို့ခံ အသက်မပြည့်သေးတဲ့ ကလေးငယ်နှစ်ဦးကို သေဆုံးလျှက် ပြန်လည်တွေ့ရှိခဲ့ပြီး ကျူးလွန်သူတွေကို စစ်ကောင်စီက ဖမ်းဆီးထားတယ်လို့ မိသားစုနဲ့နီးစပ်သူတွေက ပြောပါတယ်။
မတ်လ ၂ရက်က မန္တလေးမြို့ ပြည်ကြီးတံခွန်မြို့နယ်က ညီအကိုဝမ်းကွဲတော်စပ်တဲ့ အသက် ၁၀နှစ်အရွယ် မောင်ပြည့်စုံကျော်နဲ့ အသက် ၁၃နှစ်အရွယ် မောင်အောင်ခန့်ဦးတို့ကို သူတို့နဲ့ပေါင်းသင်းနေသူ လူငယ်တစုက သတ်ဖြတ်ခဲ့တာလို့ သိရပါတယ်။
အဲဒီနောက် သီတင်းတပတ်ကျော်အကြာ မတ်လ ၁၀ရက်မှာတော့ စဉ့်ကိုင်မြို့နယ်က ကျေးရွာတခုရဲ့ တောင်ပေါ်မှာ ကလေးငယ်တွေရဲ့ ရုပ်အလောင်းတွေကိုတွေ့ရှိခဲ့ပြီး ရုပ်တွေမပီပြင်တော့ဘူးလို့ မိသားစုဝင်တစ်ဦးက ပြောပါတယ်။
Public Service Announcement
“ကလေးတစ်ယောက်ဆို ခေါင်းတောင်ပါမလာဘူး။ ဖုန်းလိုချင်လို့သတ်တယ်လို့လည်း ပြောတယ်။ အခုထိတော့ အကြောင်းအရင်းကို သေချာမသိသေးဘူး”လို့ မိသားစုဝင်တစ်ဦးက ပြောပါတယ်။
ကလေးငယ်နှစ်ဦးရဲ့ အလောင်းတွေကို မန္တလေးဆေးရုံကြီးမှာ သွားရောက်ကြည့်ရှုခဲ့ရတာလို့ သိရပါတယ်။
ကလေးငယ်နှစ်ဦးသတ်ဖြတ်ခံရမှုနဲ့ပတ်သက်လို့ သံသယတရားခံ လူငယ် ၄ဦးကို စစ်ကောင်စီ ရဲတွေကဖမ်းဆီးထားတယ်လို့လည်း မိသားစုဝင်တစ်ဦးက ပြောပါတယ်။
