ဟန်နွေ/People’s Spring
ကချင်လွတ်လပ်ရေးတပ်မတော်(KIA)ဌာနချုပ်ဟောင်းနယ်မြေ လိုင်စင်ဒေသကို စစ်ကောင်စီက ယမန်နေ့(ဇန်နဝါရီ ၂၆ရက်)ညပိုင်း၌ လေကြောင်းမှ ဗုံးကြဲတိုက်ခိုက်ခဲ့ကြောင်း ကချင်သတင်းရင်းမြစ်အချို့က ပြောသည်။
ဇန်နဝါရီ ၂၆ရက် ည ၇နာရီဝန်းကျင်တွင် လိုင်စင်ဒေသကို စစ်ကောင်စီက ဗုံး သုံးလုံးကြဲချ တိုက်ခိုက်ခဲ့ပြီး လက်ရှိ KIA ဌာနချုပ် လိုင်ဇာအနီးကိုလည်း လေယာဉ်ပျံသန်းမှုပြုလုပ်ခဲ့ဟု The Kachin Sub-State Mediaက ဒေသသတင်းရင်းမြစ်ကို ကိုးကားဖော်ပြသည်။
ယင်းနှင့်ပတ်သက်၍ ကချင်သတင်းရင်းမြစ်တစ်ဦးကလည်း “လိုင်စင်ဘက် လေယာဉ်တိုက်ခိုက်မှုရှိတယ် ပြောတယ်။ သေချာတော့ မသိသေးဘူး။”ဟု ပြောသည်။
Public Service Announcement
“မနေ့ညက လိုင်စင်ဘက်မှာ သုံးလုံးလောက်သွားချတယ်လို့ ပြောတယ်။ နေရာအသေးစိတ်တော့မသိဘူး။ လိုင်စင်ဘက်မှာလို့တော့ ပြောတယ်”ဟု ကချင်စစ်ရေးသတင်းရင်းမြစ်က ပြောပြသည်။
KIAနှင့် ပူးပေါင်းတပ်များ၏ ဗန်းမော်မြို့သိမ်းတိုက်ပွဲတွင် အထိနာနေသည့် စစ်ကောင်စီသည် ပြီးခဲ့သည့် ရက်ပိုင်းကလည်း KIA ဌာနချုပ် လိုင်ဇာကမြို့ကို အသေခံဒရုန်းဖြင့် တိုက်ခိုက်ခဲ့သေးသည်။
KIAသည် ဇန်နဝါရီ ၂၄ရက်တွင် ဗန်းမော်မြို့သိမ်းစစ်ဆင်ရေးကို အရှိန်မြှင့်ခဲ့ရာ (၇၀၀၆)သံချပ်ကာ တပ်ရင်း အပြီးသတ်သိမ်းပိုက်ပြီး သံချပ်ကာယာဉ် ၈စီးကို သိမ်းပိုက်ရရှိထားသည်ဟု သတင်းရင်းမြစ်က ပြောသည်။
ထို့ပြင် ဇန်နဝါရီ ၂၆ရက်တွင် အမှတ်(၂၁) စစ်ဆင်ရေးကွပ်ကဲမှုဌာနချုပ်(စကခ-၂၁)အနီးရှိ ဗန်းမော်မြို့လေယာဉ်ကွင်းကိုလည်း KIAက အပြီးသတ်သိမ်းပိုက်နိုင်ခဲ့ကြောင်း ကချင်စစ်ရေးသတင်းရင်းမြစ်က ယမန်နေ့ညပိုင်း၌ ပြောပြသည်။
“ဗန်းမော်လေယာဉ်ကွင်း Sold Out သွားပြီ။ အကုန်ရသွားပြီ”ဟု စစ်ရေးသတင်းရင်းမြစ်က ပြောသည်။
အခြားစစ်ရေးသတင်းရင်းမြစ်ကလည်း “ဗန်းမော်လေယာဉ်ကွင်းကို နယ်မြေရှင်းလင်းနေလို့ သိရ”ဟု ပြောသည်။
လိုင်စင်ဒေသကို စစ်ကောင်စီက လေကြောင်းတိုက်ခိုက်မှုနှင့်ပတ်သက်၍ KIA သတင်းပြန်ကြားရေးဌာန တာဝန်ခံ ဗိုလ်မှူးကြီးနော်ဘူထံ ဆက်သွယ်မေးမြန်းထားဆဲဖြစ်သည်။
