■ ကျူးလွန်သူတွေကို ဖော်ထုတ်အရေးယူအပြစ်ပေးပြီးဟု AA ပြောရေးဆိုခွင့်ရှိသူပြော
■ အခုဖြစ်ရပ်မှာ AA မူဝါဒနဲ့ဆန့်ကျင်ပြီး ၊ နောက်ထပ် မဖြစ်အောင်ထိန်းကြောင်းရင်းဆက်လက်တိုက်ပွဲဝင်သွားမယ်လို့အသိပေး
ပေါက်ကြားလာတဲ့ ဗီဒီယိုဖိုင်မှာ အာရက္ခတပ်တော် (AA)တပ်ဖွဲ့ဝင်အချို့က စစ်သုံ့ပန်း နှစ်ဦးကို ညှင်းပန်းနှိိပ်စက်သတ်ဖြတ်ခဲ့တာဟာ ၂၀၂၄ ခုနှစ် ဖေဖော်ဝါရီလ ၇ ရက်ကဖြစ်ခဲ့တာလို့ AA ပြောရေးဆိုခွင့်ရှိသူ ခိုင်သုခကပြောပါတယ်။
Public Service Announcement
ဖြစ်စဥ်မှာ ကျောက်တော်မြို့နယ်ထဲက စစ်ဆင်ရေးကွပ်ကဲမှုဌာနချုပ်- စကခ (၉)တပ်မဌာနချုပ် ကိုထိုးဖောက်တိုက်ခိုက်စဥ်ကာလမှာ အခုလိုစစ်စည်းကမ်းချိုးဖောက်မှုကျူးလွန်မှုဖြစ်ပွားခဲ့တာလို့ခိုင်သုခကပြောပါတယ်။
“ဘာကြောင့်လဲဆိုရင် အဲဒီချိန်က သူတို့(AA တပ်ဖွဲ့ဝင်) မိသားစုဝင်တွေကိုမတရားဖမ်းဆီးနှိပ်စက်သတ်ဖြတ်ထားတဲ့မြန်မာအကြမ်းဖက် စစ်သားတွေကို သူတို့ဖမ်းမိတဲ့အချိန်မှာပေါ့ ကျွန်တော်တို့ရဲ့ ဒေသခံ ပြည်သူ့စစ် တွေက ဒေါသမထိန်းနိုင်ပဲနဲ့ အခုလိုမျိူးလက်စားချေတဲ့ပုံစံမျိုးနဲ့စစ်စည်းကမ်းချိုးဖောက် ပစ်မှုကျူးလွန်ခဲ့တာဖြစ်ပါတယ်” လို့ သူက ဆက်ပြောပါတယ်။
ဒါကြောင့် ဒီဖြစ်စဥ်မှာ ပါခဲ့တဲ့ တပ်မှူးငယ်အချိူ့အပါအဝင် ပါဝင်သူအားလုံးကိုဖော်ထုတ် အရေးယူအပြစ်ပေးထားပြီးဖြစ်တယ်လို့ လည်း AA ပြောရေးဆိုခွင့်ရှိသူကပြောပါတယ်။
စစ်သုံ့ပန်း ၂ ဦးကို AA တပ်ဖွဲ့ဝင်အချို့ က ညှင်းပန်းသတ်ဖြတ်ခဲ့တာကို ဗီဒီယိုဖိုင် ၂ ဖိုင်ရောက်ရှိလာပြီးစစ်ဆေးတဲ့အခါမှာစစ်မှန်နေတဲ့အတွက်နိုင်ငံတကာ ရာဇဝတ်ခုံရုံး (ICC) က ရခိုင်ပြည်နယ်အတွင်း ရက္ခိုင့်တပ်တော်မှ ကျူးလွန်ခဲ့တဲ့ စစ်ရာဇဝတ်မှုတွေကို စုံစမ်းစစ်ဆေး သင့်တယ်လို့ Fortify Rights ကဇန်နဝါရီ ၂၃ ရက်နေ့မှာ ပြောကြားခဲ့တာပါ။
အခုဗီဒီယိုဖိုင်ဟာ ၂၀၂၄ နှစ်ကုန်ပိုင်းကတည်းက စစ်တပ်ဝါဒဖြန့် တယ်လီဂရန်တွေမှာ စတင်ပျံ့နှံ့ခဲ့ပြီးတော့ လူမျိုးရေးအမုန်းပွားဖို့ လှုံ့ဆော်နေတာဆက်တိုက်တွေ့ခဲ့ရပါတယ်။
“အရပ်သားတွေ သို့မဟုတ် ဖမ်းဆီးထားသော ရန်သူ့တပ်သားတွေကို ညှဉ်းပန်းနှိပ်စက်ပြီး တရား လက်လွတ်ကွပ်မျက်တာ စစ်ရာဇဝတ်မှုမြောက်ပါတယ်” လို့ Fortify Rights မှ လူ့အခွင့်အရေးဆိုင်ရာ စုံစမ်းစစ်ဆေးရေးတာဝန်ခံ Ejaz Min Khant (ဧဂျက်ဇ်မင်းခန့်) က ပြောပါတယ်။
ဖမ်းဆီးရမိတဲ့ ရန်သူ့တပ်သားတွေ ကို စစ်သုံ့ပန်းများအဖြစ် ဂုဏ်သိက္ခာရှိရှိ ဆက်ဆံသင့်ပြီး ဂျီနီဗာကွန်ဗင်းရှင်းရဲ့ ကာကွယ်စောင့်ရှောက်မှု တွေပေးပြီး စစ်ရာဇဝတ်မှုတွေ ကျူးလွန်ထားတဲ့ တာဝန်ရှိသူများကို တရားစွဲဆိုသင့်ပါတယ်လို့ Fortify Rights ကဆိုပါတယ် ။
အာရက္ခတပ်တော် အနေနဲ့ စစ်သည်တော်ကျင့်ဝတ်တွေ ၊ လူအခွင့်အရေးကျင့်ဝတ်တွေကို လိုက်နာဖို့ သင်တန်းမှာကတည်းကစနစ်တကျပို့ချခဲ့သလို စစ်မြေပြင်မှာလည်း လိုက်နာဖို့ အတိအကျ ညွန်ကြားထားသလို အကောင်းဆုံးလိုက်နာလုပ်ဆောင်နေတယ်လို့လည်း ဆိုပါတယ်။
စစ်တပ်ကရခိုင်ပြည်နယ်မှာအစုလိုက်အပြုံလိုက်သတ်ဖြတ်မှုတွေအပါအဝင်စစ်ရာဇဝတ်မှုတွေများစွာကျူးလွန်ခဲ့တယ်လို့ AA ကပြောပါတယ်။ AA အနေနဲ့တိုက်ပွဲကာလ ၁၀ နှစ်အတွင်းမှာအခုလိုဖြစ်စဥ် အနည်းငယ်ရှိခဲ့ဖူးလို့ ကျူးလွန်သူတွေကိုထိထိရောက်ရောက်အရေးယူခဲတယ်လို့သိရပါတယ်။ဒါပေမယ့် တချို့ဖြစ်ရပ်တွေက စစ်တပ်က အကွက်ချ လုပ်ကြံတဲ့ဖြစ်ရပ်တွေသာဖြစ်တယ်လို့လည်းခိုင်သုခကပြောပါတယ်။
“ဒီကိစ္စတစ်ခုတည်းကို ကြည့်ပြီး ရာထောင်ချီတဲ့ စစ်သုံ့ပန်းတွေကို ဆေးဝါးကုသ ပေးပြီးတော့ ကောင်းကောင်းမွန်မွန်စောင့်ရှောက်ထားတာကို မမေ့ဖို့လိုပါတယ်။ မြင်အောင်ကြည့်ဖို့လည်း လိုပါတယ်။ ဒီကိစ္စဟာ ကျွန်တော်တို့ရဲ့ မူဝါဒနဲ့လုံးဝ ဆန့်ကျင်ပါတယ် ။ဒီလိုမျိုး ဥပဒေမဲ့ သတ်ဖြတ်မှုမျိုးကိုလုံးဝလက်မခံပါဘူး ။ကျူးလွန်တဲ့သူဟူသမျှကိုလည်းအရေးယူအပြစ်ပေးသွားမှာဖြစ်ပါတယ် “လို့သူကဆက်ပြောပါတယ်။
အခုလိုကိစ္စမျိုး နောက်ထပ်မဖြစ်အောင်အကောင်းဆုံးထိန်းကြောင်းပြီးတော့ ဆက်လက်တိုက်ပွဲဝင်သွားမှာဖြစ်ပါတယ် လို့ အာရက္ခတပ်တော်ပြောရေးဆို့ခွင့်ရှိသူကပြောပါတယ်။
တဖက်မှာ စစ်ကောင်စီလက်အောက်ခံတပ်တွေဟာ အာဏာသိမ်းပြီးနောက်ပိုင်း နိုင်ငံသားတွေကို အကြမ်းဖက်သတ်ဖြတ်တဲ့အတွက် ပြည်သူ ၆၂၀၀ ကျော်သေဆုံးခဲ့တယ်လို့ နိုင်ငံရေးအကျဥ်းသားများကူညီစောင့်ရှောက်ရေးအသင်းက ထုတ်ပြန်ထားပါတယ် ။ဒီအရေအတွက်ဟာ အမည်နဲ့တကွ အချက်အလက်အသေးစိပ်အတည်ပြုနိုင်တာပဲရှိသေးပြီး စီစစ်အတည်ပြုနေဆဲ သတ်ဖြတ်ခံရသူနောက်ထပ် ၃၀၀၀ ခန့်ရှိပါသေးတယ် ။ဒါကြောင့် စစ်ကောင်စီလက်အောက်ခံ တပ်တွေကသတ်ဖြတ်ခဲ့ပေမယ့်ဒီစာရင်းမှာမပါသေးတဲ့ သူတွေလည်းရှိသေးတဲ့အတွက် အရေအတွက်ကဒီထက်ပိုများနိုင်ပါတယ် ။ဒါအပြင် စစ်တပ်ကအစုလိုက်အပြုံ လိုက်သတ်ဖြတ်ခဲ့တဲ့ ၊စစ်ရာဝတ်မှုကျူးလွန်ခဲ့တဲ့ ဖြစ်စဥ်ပေါင်း အာဏာသိမ်းပြီးနောက်ပိုင်းအကြိမ်ရေ ရာနဲ့ချီ ကျူးလွန်ခဲ့ပြီးဖြစ်ပါတယ်။
