တရားမဝင်ငွေလွှဲလုပ်ငန်းဆောင်ရွက်နေသည်ဟု စွပ်စွဲကာ လူ ၅၀ကျော်နှင့် ကုမ္ပဏီတစ်ခုကို စစ်ကောင်စီက ဖမ်းဆီးအရေးယူထားသည်ဟု စစ်ကောင်စီဗဟိုဘဏ်က ထုတ်ပြန်သည်။
ပြည်တွင်းဈေးကွက်အတွင်း တစ်ဒေါ်လာကျပ် ၃၂၀၀ နှင့် ရွှေတစ်ကျပ်သားကို ကျပ်၃၂ သိန်းကျော်အထိ မြင့်တက်လာပြီးနောက် စစ်ကောင်စီဗဟိုဘဏ်က ဇွန် ၂၃ ရက်စွဲဖြင့်ယခုကဲ့သို့ထုတ်ပြန်လာခြင်းဖြစ်သည်။
ရွှေနှင့်ငွေကြေးဈေးကွက်စောင့်ကြည့်ထိန်းသိမ်းကြပ်မတ်ရေး လုပ်ငန်းကော်မတီက ဇွန်လအတွင်း ရန်ကုန်နှင့်မန္တလေးမြို့များတွင် နိုင်ငံခြားငွေလဲလှယ်နှုန်း ဈေးကစားသူများ၊ တရားမဝင်နိုင်ငံခြားငွေရောင်းဝယ်သူများနှင့် တရားမဝင်နိုင်ငံခြားငွေလွဲပြောင်းသူများကို စိစစ်ဖော်ထုတ် အရေးယူခဲ့ခြင်းဖြစ်သည်ဟုစစ်ကောင်စီကဆိုသည်။
မန္တလေးမြို့ပေါ်ရှိ ရွှေဆိုင်များနှင့် ရွှေသန့်စင်လုပ်ငန်းအချို့ကို စစ်ဆေးရာတွင် ပြည်ပနှင့် တရားမဝင်နိုင်ငံခြားငွေလွှဲပို့ခြင်းလုပ်ငန်းများဆောင်ရွက်နေသည်ဟုစွပ်စွဲဖမ်းဆီးခဲ့ခြင်းဖြစ်သည်။
ထိုအပြင် ပြည်ပငွေလွှဲလုပ်ငန်းလိုင်စင်နှင့် မိုဘိုင်းငွေရေးကြေးရေးဝန်ဆောင်မှု လုပ်ငန်းလိုင်စင်မရှိဘဲငွေလွှဲလုပ်ငန်းဆောင်ရွက်ကြောင်း သံသယဖြစ်ဖွယ် အထောက်အထားတွေ့ရှိသူ လူ ၅၁ ဦးနှင့် ကုမ္ပဏီ ၁ ခုကို အရေးယူနိုင်ရန် ဆောင်ရွက်နေသည်ဟုလည်း စစ်ကောင်စီက ဆိုသည်။
အမေရီကန် ဘဏ္ဍာရေးဝန်ကြီးဌာနက စစ်အုပ်စုထိန်းချုပ်ထားသော MFTB နှင့် MICB ဘဏ်တို့ကို ဇွန် ၂၁ ရက်တွင် ဒဏ်ခတ်အရေးယူလိုက်သဖြင့် ပြည်တွင်း၌ ဒေါ်လာရှားပါးလာတော့မည်ကို သိ၍ ဝယ်လိုအားများလာခြင်း ၊သွင်းကုန်များဈေးတက်လာတော့မည်ဖြစ်ခြင်း၊ စစ်ကောင်စီက ကျပ်ငွေ များစွာရိုက်နှိပ်၍ အခက်အခဲဖြေရှင်းရန်ကြိုးစားနိုင်သဖြင့် ကျပ်ငွေအပေါ် လုပ်ငန်းရှင်များယုံကြည်မှုကျဆင်း၍ ဒေါ်လာနှင့် ရွှေဈေး တက်လာခြင်းဖြစ်ကြောင်းလုပ်ငန်းရှင်အချို့ကပြောသည်။ ဒေါ်လာအပြင် တရုတ်ယွမ် ၊ထိုင်းဘတ်ဈေးများလည်း တက်နေပြီး ကျပ်ငွေတန်ဖိုးဆက်တိုက်ကျနေသည်။ သို့သော် ငွေကြေးဈေးကွက်တွင် ကျပ်ငွေတန်ဖိုးကျနေခြင်းအပေါ် စစ်ကောင်စီက လုပ်ငန်းရှင်များကို အပြစ်ဖို့၍ ဖမ်းဆီးခြိမ်းခြောက်သောနည်းလမ်းဖြင့်ဖြေရှင်းရန် ကြိုးစားနေခြင်းဖြစ်ကြောင်းလုပ်ငန်းရှင်အချို့ကပြောသည်။
“အများစုကို ငွေကြးခဝါချမှုနဲ့ ဖမ်းထားတယ်ကြားတယ်”ဟု လုပ်ငန်းရှင်တစ်ဦးကပြောသည်။
ထိုသူများကို ငွေကြေးခဝါချမှုတိုက်ဖျက်ရေးဥပဒေနှင့် နိုင်ငံခြားသုံးငွေစီမံခန့်ခွဲမှဥပဒေများဖြင့် အရေးယူသွားမည်ဟု စစ်ကောင်စီဗဟိုဘဏ်ကဆိုသည်။
၂၀၁၄ခုနှစ်တွင် ပြဌာန်းခဲ့သည် ငွေကြေးခဝါချမှုတိုက်ဖျက်ရေးဥပဒေအရ ငွေကြေးခဝါချမှုကို ကျူးလွန်သူကို အများဆုံး ထောင်ဒဏ် ၁၀ နှစ်ဖြစ်စေ၊ ငွေဒဏ်ဖြစ်စေချမှတ်နိုင်သလို ၊ ပြစ်ဒဏ်နှစ်ခုလုံးကို ချမှတ်နိုင်သည်ဟု ပြဌာန်းထားသည်။ ကုမ္ပဏီကို ငွေကျပ် သန်း ၅၀၀ ဒဏ်ငွေတပ်နိုင်ပြီး ကုမ္ပဏီဦးဆောင်သူကို အမြင့်ဆုံး ထောင်ဒဏ် ၇နှစ်ချမှတ်နိုင်သည်ဟု ပြဌာန်းထားသည်။
“ဈေးကွက်ထဲမှာ ဒေါ်လာဈေးနဲ့ ရွှေဈေးတက်လာလို့ ဒီလိုအရေးယူတယ်ဆိုတာကို ခြိမ်းခြောက်လိုက်တဲ့ သဘောပါပဲ။ လုပ်ငန်းရှင်အကြီးစားတွေကလည်း ဒီလို ခြိမ်းခြောက်မှုတွေကြောက်လို့ပြည်ပမှနေနေကြတယ်။ အခုက နိုင်တဲ့သူတွေကို စစ်ကောင်စီကလိုက်မဲနေတာ”ဟု ငွေလဲလုပ်ငန်းဆောင်ရွက်နေသူတဦးကပြောသည်။
လက်ရှိအချိန်တွင် ရွှေနှင့် ဒေါ်လာဈေးများမြင့်တက်နေခြင်းကြောင့် ရွှေဆိုင်နှင့်ငွေလဲကောင်တာများကအရောင်းအဝယ်ပိတ်ထားကြသည်။ မှောင်ခိုဈေးကွက်တွင် ဈေးကွက်ဖွင့်နေရသည်ဟု လုပ်ငန်းရှင်များထံမှသိရသည်။
