“Azərbaycan cəmiyyətinin Türkiyəyə, türklüyə və qardaşlığa olan sonsuz sevgisindən sui-istifadə edilir, bu hisslərdən təsir vasitəsi kimi yararlanmağa çalışılır. Ən qorxulusu da budur ki, Türkiyə cəmiyyətinə yanlış şəkildə Azərbaycanın Türkiyənin maraqlarını qorumadığı fikri təlqin olunur. Məhz bu baxımdan adekvat dövlət reaksiyasının gecikməsi bizi ciddi narahat etməlidir”.
Gununsesi.info bildirir ki, bu fikirləri politoloq Zaur İbrahimli deyib:
“Türkiyə siyasi elitasının nüfuzlu təmsilçiləri tez bir zamanda bunun fərqinə vardılar və bir çox dövlət xadimləri qətiyyətli mövqe nümayiş etdirdilər. Azərbaycana qarşı yönələn təxribatları sərt şəkildə qınadılar, qardaşlıq və strateji müttəfiqlik prinsiplərini müdafiə etdilər. Onların bu yanaşması dövlət ağlını və tarixi məsuliyyəti nümayiş etdirdi. Xüsusən Milliyyətçi Hərəkat Partiyasının (MHP) sədri Dövlət Baxçalının açıqlamaları kifayət qədər tutarlı cavab oldu.
Eyni zamanda Azərbaycana qarşı bu kampaniya Türkiyənin bir çox təbəqələrində kəskin qınaqla qarşılandı, ziyalılar və ictimai xadimlər Azərbaycanın haqlı mövqeyini müdafiə etdilər. Bu, ölkələrimiz arasında üfüqi əlaqələrin nə qədər möhkəm olduğunu bir daha hamıya xatırlatdı.
Bu məsələlər strateji ittifaqın digər öhdəliklərini də ön plana çıxarır. Müttəfiqlik münasibətlərinə zərbə vuran, təxribat təşkil edən və yanlış məlumat yayan siyasi şəbəkələrin fəaliyyəti hüquq-mühafizə və kəşfiyyat orqanları tərəfindən hərtərəfli araşdırılmalı, dövlət maraqlarına zidd təşəbbüslərin qarşısı alınmalıdır”.
O qeyd edib ki, dezinformasiya hücumlarının arxasında duran həqiqi vəziyyət iki ölkə arasındakı ölçülə bilən strateji, hərbi və iqtisadi göstəricilərdə əks olunur:
“Şuşa Bəyannaməsinin 4-cü bəndinə əsasən, tərəflərdən birinin suverenliyinə və ya ərazi bütövlüyünə təhdid yarandıqda birgə hərbi məsləhətləşmələr aparılır və qarşılıqlı hərbi yardım göstərilir. Bu müddəa Azərbaycan Silahlı Qüvvələri ilə Türkiyə Silahlı Qüvvələrini (TSK) vahid təhlükəsizlik çətiri altında birləşdirir.
Azərbaycan Ordusunun tam şəkildə TSK standartlarına və müasir korpus strukturuna keçidi başa çatdırılmaqdadır. Hər il iki ölkə arasında 15-dən çox birgə hərbi təlim (“Mustafa Kamal Atatürk”, “Sarsılmaz Qardaşlıq”, “TurAz Qartalı” və s.) keçirilir.
Azərbaycan Türkiyənin “Baykar” (Bayraktar TB2, Akıncı), “ASELSAN”, “ROKETSAN” və “HAVELSAN” kimi aparıcı müdafiə sənayesi şirkətlərinin ən böyük strateji tərəfdaşlarındandır. Eyni zamanda Azərbaycan Hərbi Hava Qüvvələrinə məxsus Su-25 təyyarələrinin Türkiyənin dəqiq zərbə sistemləri ilə yenilənməsi (“Laçın” layihəsi) və ortaq istehsal müəssisələrinin yaradılması hərbi ittifaqın dönməz xarakterini sübut edir.
İki ölkə arasında ticarət dövriyyəsi 7,5 milyard dolları keçib, yaxın gələcək üçün hədəf 15 milyard dollar müəyyənləşdirilib. Azərbaycan SOCAR vasitəsilə Türkiyə iqtisadiyyatına 18 milyard dollardan çox sərmayə qoyaraq ölkənin ən böyük xarici sərmayəçilərindən birinə çevrilib. Buna STAR Neft Emalı Zavodu, Petkim və TANAP layihələri daxildir. Eyni qaydada Türkiyə şirkətləri işğaldan azad edilmiş Qarabağ və Şərqi Zəngəzur bölgələrində həyata keçirilən bərpa və quruculuq layihələrində təxminən 4 milyard dollarlıq layihə portfeli ilə birinci yerdədir.
Qarşıda daha məsuliyyətli mərhələ gəlir. Zəngəzur dəhlizinin açılması üçün Bakı və Ankara birgə güc nümayişini davam etdirməlidir. Türk Dövlətləri Təşkilatının geosiyasi güc mərkəzinə çevrilməsi üçün daha cəsarətli qərarlar verilməli, Orta dəhlizin daha səmərəli işləməsi üçün uzlaşma artırılmalı, hərbi əməkdaşlıq genişləndirilməli, enerji sahəsində əməkdaşlıq gücləndirilməlidir.
Belə tarixi və həlledici mərhələdə müttəfiqlik münasibətləri şəxsi, ideoloji, korporativ və işgüzar maraqlardan üstün tutulmalıdır”.
Elmar
