Politoloq Turan Rzayev Azərbaycanla Türkiyə arasında vizasız gediş-gəliş rejiminin yenidən nəzərdən keçirilməsinin vacibliyini gündəmə gətirib.
Gununsesi.info -nun xəbərinə görə, o, iki ölkə arasında strateji müttəfiqliyin mövcudluğuna baxmayaraq, Azərbaycanın milli təhlükəsizlik və suverenlik məsələlərinin prioritet olaraq qalmalı olduğunu vurğulayıb.
Rzayev 1995-ci ilin martında Azərbaycanda baş vermiş hadisələri xatırladaraq, Rövşən Cavadovun rəhbərlik etdiyi Xüsusi Təyinatlı Polis Dəstəsinin qiyamı ilə bağlı Türkiyədəki bəzi şəxslərin və dairələrin mümkün iştirakı barədə irəli sürülmüş iddialara diqqət çəkib.
Politoloqun fikrincə, Azərbaycanla Türkiyə arasında münasibətlərin strateji müttəfiqlik səviyyəsində olması tarixi hadisələrlə bağlı sualların və milli təhlükəsizlik məsələlərinin diqqətdən kənarda qalması demək deyil.
O, Türkiyə ilə bağlı bu gün səsləndirilən ittiham və siyasi təzyiq iddialarının da ciddi müzakirəyə ehtiyac yaratdığını qeyd edib. Rzayev bu kontekstdə Azərbaycanla Türkiyə arasında vizasız gediş-gəliş rejiminin ləğv edilməsinin mümkünlüyünün müzakirəyə çıxarılmasını təklif edib.
Politoloq vurğulayıb ki, viza rejiminin yenidən tətbiqini müzakirə etmək Türkiyə ilə qardaşlıq münasibətlərinə qarşı çıxmaq kimi qiymətləndirilməməlidir. Onun yanaşmasına görə, əsas məsələ Azərbaycanın milli maraqlarının, suverenliyinin və təhlükəsizliyinin qorunmasıdır.
Rzayev hesab edir ki, qarşılıqlı hörmət qardaşlığın, etimad isə müttəfiqliyin əsas şərtlərindən biridir.
Qeyd edək ki, Türkiyə ilə viza rejiminin yenidən tətbiqi barədə təklif politoloqun mövqeyidir. 1995-ci il hadisələri ilə bağlı Türkiyədəki ayrı-ayrı şəxslərin və rəsmi dairələrin iştirakı barədə iddialar isə müstəqil mənbələrlə təsdiqlənmədən sübuta yetirilmiş fakt kimi təqdim edilməməlidir.
Orxan
Gununsesi.info
