ဖိလစ်ပိုင်နိုင်ငံတောင်ပိုင်း ကမ်းလွန်မှာ လှုပ်ခတ်သွားခဲ့တဲ့ ငလျင်ကြီးကြောင့် သေဆုံးသူ အရေအတွက်ဟာ ၄၆ ဦးထိ ရှိလာကြောင်း သိရပါတယ်။
ဇွန်လ ၈ ရက် မနက်ပိုင်းက မင်ဒါနာအိုကျွန်းရဲ့ တောင်ဖက် ကမ်းလွန်ရေပြင်ကို ဗဟိုပြုခဲ့တဲ့ ငလျင်ကြီးကြောင့် ကျွန်းပေါ်က မြို့တချို့မှာ ထိခိုက်ပျက်စီးမှုတွေ ဖြစ်ပေါ်ခဲ့သလို ဆူနာမီ ရေလှိုင်းအန္တရာယ် သတိပေးချက်တွေ အရေးပေါ် ထုတ်ပြန်ခဲ့ရပါတယ်။
ကယ်ဆယ်ရေး အဖွဲ့တွေဟာ အပျက်အစီးပုံတွေကြား ပိတ်မိနေသူတွေကို လိုက်လံ ရှာဖွေနေရင်း ရုပ်အလောင်း အသစ်တွေကိုပါ တွေ့ရှိလာခဲ့ပါတယ်။ ဇွန်လ ၁၀ ရက် မနက်ပိုင်းထိ အခြေအနေ အရတော့ သေဆုံးစာရင်းဟာ ၄၆ ဦးထိ များပြားလာခဲ့တာပါ။
ငလျင်ကြီးအပြီး နှစ်ရက်ကြာတဲ့အထိ နောက်ဆက်တွဲ ငလျင်ငယ်တွေ လှုပ်ခတ်နေပေမယ့်လည်း ဒေသခံတွေနဲ့ ကယ်ဆယ်ရေး အဖွဲ့တွေဟာ ပြန်လည်ထူထောင်ရေးနဲ့ ကယ်ဆယ်ရေး လုပ်ငန်းတွေကို အာရုံစိုက် လုပ်ဆောင်နေကြပါတယ်။
Public Service Announcement
တချို့ဖြစ်စဉ်တွေမှာတော့ အပျက်အစီးပုံအောက်မှာ အသက်ရှင်သူတွေ ရှိနေနိုင်သေးကြောင်း သဲလွန်စတွေ ရှာတွေ့ခဲ့ပေမယ့် လက်တွေ့မှာတော့ ရုပ်အလောင်းတွေကိုပဲ ပြန်လည်ရရှိတာမျိုး ကြုံခဲ့ရပါတယ်။
သေဆုံးစာရင်းက တိုးလာသလို ပျောက်ဆုံးနေသူ အရေအတွက်ကလည်း မူလက ၄ ယောက်လို့ ကြေညာထားရာက အခုတော့ ၁၇ ဦးထိ များပြားလာပါတယ်။ လာမယ့် ရက်ပိုင်းအတွင်း အဲဒီကိန်းဂဏန်းတွေက ထပ်တိုးလာနိုင်ခြေ ရှိနေဆဲလို့ ဖိလစ်ပိုင် အမျိုးသား ကယ်ဆယ်ရေး အေဂျင်စီက မှတ်ချက်ပေးထားပါတယ်။
နောက်ထပ် ရရှိတဲ့ သေဆုံးစာရင်း အများစုဟာ မင်ဒါနာအိုကျွန်းရဲ့ ဒါဗာအို မြို့နဲ့ အနီးတဝိုက် ဧရိယာတွေမှာ ဖြစ်ပါတယ်။ ငလျင်ကြောင့် မြေပြိုတာ၊ အဆောက်အအုံ ပြိုကျတာတွေ ဖြစ်ခဲ့ရာက လူ့အသက်တွေ ဆုံးရှုံးခဲ့ရတာပါ။
ဖိလစ်ပိုင် အစိုးရဟာ ငလျင်ဘေးသင့် ကယ်ဆယ်ရေးနဲ့ ပြန်လည်ထူထောင်ရေး လုပ်ငန်းတွေမှာ အရင်းအမြစ်တွေ အားလုံး ပုံအော အသုံးပြုဖို့လည်း သက်ဆိုင်ရာ ဌာနတွေကို ညွှန်ကြားထားကြောင်း သိရပါတယ်။
ကိုးကား: AFP
