နျူကလီးယား ရေငုပ်သင်္ဘောတွေ ထားရှိရာ ရေတပ်စခန်းနား ချဉ်းကပ်လာတဲ့ ဒရုန်းတွေကို ပြင်သစ် စစ်သားတွေက ပစ်ခတ်ခဲ့ကြောင်း သိရပါတယ်။
ပြင်သစ်ရဲ့ ဘရစ္စတနီ ဒေသထဲမှာရှိတဲ့ အိုင်းလ်လောင်း ရေတပ်စခန်းနားကို ဒီဇင်ဘာ ၄ ရက် ညပိုင်းက အမျိုးအမည်မသိ ဒရုန်းတချို့ ချဉ်းကပ် ပျံသန်းလာခဲ့တာ ဖြစ်ပါတယ်။ အဲဒီ ဒရုန်း ၅ ခုကို ထောက်လှမ်းမိတဲ့နောက် ရေတပ်စခန်းရဲ့ လုံခြုံရေး တပ်ဖွဲ့ဝင်တွေက တုံ့ပြန် ပစ်ခတ်ခဲ့တယ်လို့ ပြင်သစ် ရေတပ်က ဒီဇင်ဘာ ၅ ရက်နေ့မှာ ထုတ်ပြန်ခဲ့ပါတယ်။
အိုင်းလ်လောင်းဟာ ပြင်သစ်ရဲ့ နျူကလီးယား ကာကွယ်ရေး စီမံကိန်းမှာ အထူးအရေးပါတဲ့ နျူကလီးယား ဒုံးကျည်တင် ရေငုပ်သင်္ဘော ၄ စီးကို ထားရှိတဲ့ အခြေစိုက်စခန်း ဖြစ်ပါတယ်။
ရေတပ်စခန်း လုံခြုံရေးအတွက် ဖြန့်ကျက်ထားတဲ့ မရိန်းစစ်သားတွေဟာ အမျိုးအမည်မသိ ဒရုန်းတွေ ချဉ်းကပ်လာတာကို သတိထားမိတာနဲ့ အချက်ရေတချို့ တုံ့ပြန် ပစ်ခတ်ခဲ့တယ်လို့ ဆိုပါတယ်။ အဲဒီနောက် အနီးတဝိုက် ဧရိယာမှာ ဒရုန်း အပျက်အစီးတွေ ရှိမရှိ ဖြန့်ကျက် ရှာဖွေခဲ့တယ်လို့လည်း ပြင်သစ် ရေတပ်က ပြောပါတယ်။
Public Service Announcement
ဒါပေမဲ့ ဒရုန်းတွေကို ထိမှန်အောင် ပစ်ခတ် ဖျက်ဆီးနိုင်ခဲ့သလား ဆိုတာကိုတော့ ထုတ်ပြန်ချက်ထဲမှာ ရှင်းရှင်းလင်းလင်း ဖော်ပြမထားခဲ့ပါဘူး။
ပြင်သစ်ဟာ နျူကလီးယား လုံခြုံရေးဆိုင်ရာ မဟာဗျူဟာတွေအရ နိုင်ငံရဲ့ နျူကလီးယား ရေငုပ်သင်္ဘော လေးစီးထဲက အနည်းဆုံး တစ်စီးကို တိုက်ပွဲဝင်အဆင့် အမြဲတမ်း အသင့်အနေအထားမျိုး တပ်ဖြန့်ထားလေ့ ရှိပါတယ်။ ဒရုန်းတွေ ချဉ်းကပ်ခဲ့ချိန်က ရေတပ်စခန်းထဲမှာ ရေငုပ်သင်္ဘော ဘယ်နှစီး ရှိနေခဲ့သလဲ ဆိုတာကိုတော့ မသိရသေးပါဘူး။
ကာကွယ်ရေး ဝန်ကြီး ကက်သရင်း ဗော့ထရင်းက မပျံသန်းရဇုန် သတ်မှတ်ထားရာ ရေတပ်စခန်းနားကို ချဉ်းကပ်ခဲ့တဲ့ ဒရုန်းတွေကို စစ်တပ်က ကြားဖြတ် ဟန့်တားခဲ့တယ်လို့ ပြောပေမယ့် ဘယ်လို နည်းလမ်းကို အသုံးပြုခဲ့သလဲ ဆိုတာကိုတော့ မှတ်ချက် ပေးမသွားခဲ့ပါဘူး။ အိုင်းလ်လောင်း ရေတပ်စခန်းမှာ လုံခြုံရေး တပ်ဖွဲ့ဝင်တွေရဲ့ မြန်ဆန် ထိရောက်တဲ့ တုံ့ပြန်မှုအတွက် ချီးကျူးလိုကြောင်းလည်း ဝန်ကြီးက ဆိုပါတယ်။
လောလောဆယ်တော့ ပြင်သစ် အာဏာပိုင်တွေက အဲဒီဒရုန်းတွေဟာ ပြည်ပနိုင်ငံ တစ်ခုခုနဲ့ ဆက်နွှယ် ပတ်သက်တယ် ဆိုတာမျိုး ပြောဆိုထားတာ မရှိသေးပါဘူး။ နျူကလီးယား ရေငုပ်သင်္ဘောတွေ ထားရှိရာ နေရာရဲ့ သတင်းအချက်အလက်တွေဟာ လုံခြုံရေးအရ လျှို့ဝှက်ထားဖို့ လိုတာကြောင့် အသေးစိတ် နောက်ဆက်တွဲ အခြေအနေတွေကို ထုတ်ပြောဖို့ စစ်ဘက် အရာရှိတွေက ငြင်းဆိုခဲ့ကြပါတယ်။
ကိုးကား: Euronews
