ဧပြီ ၁၆၊၂၀၂၆။ ထားမြတ်/People’s Spring
အမျိုးသားညီညွတ်ရေးအစိုးရ(NUG) ပြည်ထောင်စုဝန်ကြီးချုပ်ရုံး ပြည်ထောင်စုဝန်ကြီး ဒေါက်တာဇော်ဝေစိုးဟာ ချင်းပြည်ကောင်စီ ချင်းပြည်အစိုးရ တာဝန်ရှိသူတွေနဲ့ တွေ့ဆုံတာ၊ ချင်းပြည်အစိုးရ ကျန်းမာရေးဝန်ကြီးဌာနက ဖော်ဆောင်နေတဲ့ ဆေးတက္ကသိုလ် ဖွင့်ပွဲ အခမ်းအနားကို တက်ရောက်တာ ပြုလုပ်ခဲ့တယ်လို့ ချင်းပြည်အစိုးရက သတင်းထုတ်ပြန်ပါတယ်။
ဒေါက်တာဇော်ဝေစိုးဟာ ချင်းပြည်ကောင်စီ၊ ချင်းပြည်ကောင်စီ၊ ချင်းပြည်လွှတ်တော် ခေါင်းဆောင်တာဝန်ရှိသူတွေနဲ့ ဧပြီ ၁၄ရက်က တွေ့ဆုံခဲ့ကြောင်း ဖော်ပြထားပါတယ်။
အဲဒီတွေ့ဆုံမှုဟာ NUGနဲ့ ချင်းပြည်ကောင်စီ အကြား အပြန်အလှန် ချိတ်ဆက်ဆောင်ရွက်တဲ့ ကိစ္စရပ်တွေ ၊ ချင်းပြည်ကောင်စီနဲ့ မဏ္ဍိုင် ၃ရပ်ရဲ့ လုပ်ငန်းဆောင်ရွက်မှုတွေ၊ NUG အစိုးရရဲ့ လုပ်ငန်း ဆောင်ရွက်မှု အခြေအနေတွေ အပြန်အလှန် ဆွေးနွေးခဲ့ဟု ဖော်ပြထားပြီး အသေးစိတ် ဆွေးနွေးချက်တွေ ဖော်ပြမထားပါဘူး။
Public Service Announcement
ဒါ့အပြင် ချင်းပြည်အစိုးရဲ့ ဆေးတက္ကသိုလ်ဖွင့်ပွဲ အခမ်းအနားကို ဒေါက်တာ ဇော်ဝေစိုး တက်ရောက်ခဲ့ပြီး အခမ်းအနားမှာ သက်ဆိုင်ရာ တာဝန်ရှိသူတွေက အမှာစကား ပြောတာ၊ ထောက်ပံ့ငွေ ပေးတာ ပြုလုပ်ခဲ့တယ်လို့ အသိပေးထားပါတယ်။
ဒေါက်တာဇော်ဝေစိုးဟာ ပြည်ထောင်စုဝန်ကြီးချုပ်ရုံး ပြည်ထောင်စုဝန်ကြီး အဖြစ် တာဝန်မယူမီက NUG ကျန်းမာရေး ဝန်ကြီးဌာန ပြည်ထောင်စုဝန်ကြီး အဖြစ်တာဝန်ယူခဲ့သူလည်းဖြစ်ပါတယ်။
ဒေါက်တာ ဇော်ဝေစိုးအနေနဲ့ ၂၀၂၅ ကတည်းက မြေပြင်ကွင်းဆင်းပြီး တိုင်းရင်းသားလက်နက်ကိုင်အဖွဲ့ ထိန်းချုပ်ဒေသ အပါအဝင် တော်လှန်ရေးနယ်မြေဒေသတွေကို သွားရောက် ကာ တော်လှန်ရေးဆိုင်ရာ ကိစ္စရပ်တွေ၊ ဆွေးနွေးညှိနှိုင်းမှုတွေ လုပ်ဆောင်နေတာဖြစ်ပါတယ်။
NUG ကျန်းမာရေးဝန်ကြီးဌာနဲ့ ချင်းပြည်အစိုးရ ကျန်းမာရေးဝန်ကြီးဌာနတို့ဟာ အရင်ကတည်းက ကျန်းမာရေးဆိုင်ရာ ကိစ္စရပ်တွေမှာ ချိတ်ဆက်ပူးပေါင်းဆောင်ရွက်မှုတွေ ပြုလုပ်နေတာဖြစ်ပါတယ်။
(NUG ဝန်ကြီးဒေါက်တာဇော်ဝေစိုး ချင်းပြည် အစိုးရဆေးတက္ကသိုလ်ဖွင့်ပွဲ တက်ရောက်နေစဉ်။ ဓာတ်ပုံ – GOC)
