မြန်မာအပါအဝင် လေးနိုင်ငံရဲ့ ကျောင်းသားဗီဇာလျှောက်ထားခွင့် ဗြိတိန်ဆိုင်းငံ့

မြန်မာအပါအဝင် နိုင်ငံလေးခုရဲ့ ကျောင်းသားဗီဇာ လျှောက်ထားခွင့်တွေကို ဗြိတိန် အစိုးရက ဆိုင်းငံ့ထားလိုက်ကြောင်း သိရပါတယ်။

မြန်မာ၊ အာဖဂန်နစ္စတန်၊ ကင်မရွန်းနဲ့ ဆူဒန်နိုင်ငံတွေဆီက ကျောင်းသားဗီဇာ လျှောက်ထားမှုတွေကို ဆိုင်းငံ့ထားဖို့ ဗြိတိန် ပြည်ထဲရေးဝန်ကြီး ရှာဘာနာ မာမွတ်က ညွှန်ကြားခဲ့တာ ဖြစ်ပါတယ်။

ရွှေ့ပြောင်း အခြေချသူတွေဟာ အဲဒီဗီဇာတွေကို ဗြိတိန် နိုင်ငံထဲ ဝင်ရောက်နိုင်မယ့် လမ်းကြောင်းတစ်ခုအဖြစ် အသုံးချပြီး ပြည်တွင်းမှာ ဒုက္ခသည်အဖြစ် လျှောက်ထားပြီး အမြဲတမ်း နေထိုင်ကြကြောင်း၊ အဲဒီ နိုင်ငံတွေရဲ့ ရွှေ့ပြောင်း အခြေချသူတွေက ကျောင်းသားဗီဇာကို အလွဲသုံးစားပြုခဲ့တယ်လို့ ယူဆရကြောင်း သုံးသပ်ပြီး ပြည်ထဲရေး ဝန်ကြီးဌာနက အခုလို ဆိုင်းငံ့စေခဲ့တာ ဖြစ်ပါတယ်။

ဒုက္ခသည်အဖြစ် လျှောက်ထားလိုက်သူတွေဟာ ရွှေ့ပြောင်းခိုလှုံသူတွေအတွက် စီစဉ်ပေးထားတဲ့ ဟိုတယ်တွေမှာ သွားရောက် နေထိုင်ကြပြီး အခွန်ထမ်း ပြည်သူတွေကို ဝန်ထုပ်ဝန်ပိုး ဖြစ်စေတယ်လို့လည်း ဝန်ကြီးဌာက ကောက်ချက်ချထားပါတယ်။

Public Service Announcement

၂၀၂၁ ခုနှစ်ကစလို့ ဖော်ပြပါ ၄ နိုင်ငံရဲ့ ကျောင်းသားဗီဇာ ကိုင်ဆောင်သူတွေက ဒုက္ခသည် ခံယူခွင့် လျှောက်ထားမှုတွေ ၆ ဆလောက် မြင့်တက်လာကြောင်း၊ ဒါကြောင့်လည်း ဗီဇာ လက်ခံမှုတွေကို အရေးပေါ် စံနှုန်းတစ်ခု အနေနဲ့ ယာယီ ဆိုင်းငံ့လိုက်ကြောင်း ပြည်ထဲရေး ဝန်ကြီးဌာန တာဝန်ရှိသူတွေက ဆိုပါတယ်။

အာဖဂန်က ကျွမ်းကျင်လုပ်သားတွေကို ခေါ်ယူတဲ့ ဗီဇာတွေမှာလည်း အလွဲသုံးစားလုပ်မှုတွေ ရှိနေတဲ့အတွက် အဲဒီ ဗီဇာတွေကိုပါ မာမွတ်က ဆိုင်းငံ့ထားစေခဲ့ကြောင်း သိရပါတယ်။

ဗြိတိန်က ခွင့်ပြုထားတဲ့ ဗီဇာတွေကို အလွဲသုံးစားလုပ်တဲ့ အခြေအနေတွေ ထပ်ပြီး တွေ့ရှိရင် အလားတူ ဆိုင်းငံ့မှုတွေကို ကျင့်သုံးလာနိုင်ကြောင်းလည်း ပြည်ထဲရေး ဝန်ကြီးဌာနက သတိပေးထားပါတယ်။

စစ်ပွဲနဲ့ ဖိနှိပ်မှုတွေကနေ ထွက်ပြေးလာသူတွေကို ဗြိတိန်က အမြဲတမ်း ခိုလှုံခွင့် ပေးနေမှာ ဖြစ်ကြောင်း၊ ဒါပေမဲ့ သတ်မှတ်ထားတဲ့ စနစ်တွေကို အလွဲသုံးစား လုပ်တာကိုတော့ လက်ခံမှာ မဟုတ်ကြောင်း ဝန်ကြီးက Guardianနဲ့ အင်တာဗျူးမှာ ပြောကြားခဲ့ပါတယ်။

ဒါကြောင့်လည်း အရင်က မကြုံဖူးတဲ့ အခြေအနေအဖြစ် နိုင်ငံတချို့ဆီက ဗီဇာကိစ္စတွေကို သူ့အနေနဲ့ ပိုမိုတင်းကျပ်လိုက်ကြောင်း၊ အဲဒီနိုင်ငံတွေကနေ ရွှေ့ပြောင်းရောက်ရှိလာသူ အများအပြားဟာ ဗြိတိန်ရဲ့ ပျူငှာရက်ရောမှုကို တလွဲအသုံးချခဲ့ကြောင်း ဝန်ကြီးက ဆိုပါတယ်။

ပြည်ထဲရေး ဝန်ကြီးဌာနရဲ့ အဆိုအရ လွန်ခဲ့တဲ့ ၅ နှစ်အတွင်း ဗြိတိန်ကို အလုပ်၊ ကျောင်းသား၊ အလည်အပတ် ဗီဇာတွေနဲ့ ရောက်လာသူတွေထဲ ၁၃၃၇၆၀ ဦးဟာ ဒုက္ခသည် ခိုလှုံခွင့် ပြောင်းလဲ လျှောက်ထားခဲ့ကြောင်း သိရပါတယ်။

ကိုးကား – Telegraph