ဖေဖော်ဝါရီ-၈၊၂၀၂၆။People’s Spring
မန္တလေးတိုင်း၊ မိတ္ထီလာမြို့နယ်မှာ ပြည်ထောင်စုနေ့အကြောင်းပြပြီး ဘုန်းကြီးကျောင်းထဲ လောင်းကစားဝိုင်းတွေ ပြုလုပ်နေကြောင်း ဒေသခံများက ပြောပါတယ်။
လာမယ့်ဖေဖော်ဝါရီ ၁၂ ရက်မှာကျရောက်မယ့် ပြည်ထောင်စုနေ့ အထိမ်းအမှတ်ဆိုပြီးမိတ္ထီလာမြို့နယ်၊ထမုန်ကန်အုပ်စု၊ညောင်ပင်သာကျေးရွာ ဘုန်းကြီးကျောင်းထဲမှာဘောလုံးပွဲပြုလုပ်မှာဖြစ်ကြောင်း၊ အဲဒီဘောလုံးပွဲအကြောင်းပြပြီး လောင်းကစားဝိုင်းတွေ လာရောက်ဖွင့်လှစ်နေကြောင်း ဒေသခံတွေက ပြောပါတယ်။
“ ဟိုနေ့အကြောင်းပြ ဒီနေ့အကြောင်းပြနဲ့ လောင်းကစားဝိုင်းတွေလုပ်နေတာ။လောင်းကစားဝိုင်းတွေကြောင့်ခိုးဆိုးလုနှိုက်တွေပိုပိုများလာတာ။ဘယ်သွားသွားမလုံခြုံဘူး” လို့ ဒေသခံအမျိုးသမီးတဦးက ပြောပါတယ်။
Public Service Announcement
စစ်ကောင်စီလက်အောက်ခံ ရပ်ကျေးအုပ်ချုပ်ရေးမှူးတွေကလည်း အဲဒီလောင်းကစားဝိုင်းတွေကိုငွေယူပြီး လက်ခံဖွင့်လှစ်ခွင့်ပေးထားတယ်လို့ဒေသခံတွေကပြောပါတယ်။
စစ်ကောင်စီအာဏာသိမ်းထားတဲ့ကာလအတွင်းမိတ္ထီလာအပြင် စစ်တပ်ထိန်းချုပ်ထားတဲ့ဒေသတွေမှာ ပွဲတော်တွေ၊ပျော်ပွဲရွှင်ပွဲတွေ၊ လောင်းကစားဝိုင်းတွေပိုမိုလုပ်လာပါတယ်။လောင်းကစားဝိုင်းတွေကြောင့်ငွေကြေးဆုံးရှုံးသူတွေရှိနေကြောင်းလည်းသိရပါတယ်။
