ဒီဇင်ဘာ၂၊ ၂၀၂၅။မေရီ/People’s Spring
စဉ့်ကိုင်မြို့အနီးကို ဗဟိုပြုလှုပ်ခတ်သွားတဲ့ အင်အားအသင့်တင့်ရှိတဲ့ ငလျင်ကြောင့် ညနေပိုင်းက မန္တလေးမြို့အနီးတဝိုက်က ပြည်သူတွေ သိသာစွာ ခံစားခဲ့ရကြောင်း မြို့ခံတွေက ပြောပါတယ်။
ဒီကနေ့ ဒီဇင်ဘာ ၂ ရက် ညနေ ၅နာရီခွဲခန့်က မန္တလေးတိုင်း၊ စဉ့်ကိုင်မြို့အနီး၊ မြေအောက်အနက် ၁၀ ကီလိုမီတာကိုဗဟိုပြုပြီး ရစ်ခ်တာစကေး ၄.၉ အဆင့်နဲ့ အင်အားအတော်အသင့်ရှိတဲ့ မြေငလျင်တစ်ခု လှုပ်ခတ်ခဲ့ကြောင်း အမျိုးသားညီညွတ်ရေးအစိုးရရဲ့ လူသားချင်းစာနာထောက်ထားရေးနဲ့ ဘေးအန္တရာယ်ဆိုင်ရာ စီမံခန့်ခွဲရေးဝန်ကြီးဌာနက ထုတ်ပြန်ပါတယ်။
ဒီကနေ့ညနေပိုင်းက လှုပ်ခတ်ခဲ့တဲ့ ငလျင်ကြောင့် ပြည်သူတွေ နေအိမ်အတွင်းကနေ ထွက်ပြေးခဲ့ရကြောင်း မြို့ခံတွေက ပြောတယ်။
Public Service Announcement
“ အသံကြီးလည်းပါတယ်။ တော်တော်သိသာတယ်။ လူကိုမူးနောက်သွားတယ်။ အကုန်ထွက်ပြေးကြတာ” လို့ မန္တလေးမြို့တွင်း နေထိုင်သူ အမျိုးသားတစ်ဦးက ပြောပါတယ်။
ဒီကနေ့ မနက် ၅ နာရီခွဲခန့်ကလည်း မန္တလေးမြို့မှာ ငလျင်ငယ်တစ်ခု လှုပ်ခတ်သွားခဲ့ပြီး သိသာတယ်လို့ ဒေသခံတွေဆီက သိရပါတယ်။
အလားတူ ဒီကနေ့ မနက် ၈ နာရီ၂၆ မိနစ်ခန့်ကလည်း စစ်ကိုင်းတိုင်း၊ မင်းကင်းမြို့အနီး၊ မြေအောက်အနက် ၁၀၀ကီလိုမီတာကို ဗဟိုပြုပြီး ရစ်ခ်တာစကေး ၄.၄ အဆင့်နဲ့ အင်အားအနည်းငယ်ရှိတဲ့ မြေငလျင်တစ်ခု လှုပ်ခတ်ခဲ့တယ်လို့ လူသားချင်းစာနာထောက်ထားရေးနဲ့ ဘေးအန္တရာယ်ဆိုင်ရာ စီမံခန့်ခွဲရေးဝန်ကြီးဌာနက ထုတ်ပြန်ထားပါတယ်။
ငလျင်အန္တရာယ်ကြောင့် ထိခိုက်ဆုံးရှုံးမှုများလျော့နည်းစေဖို့ ဆောင်ရန်၊ ရှောင်ရန်၊ သတိပြုရန်များနဲ့အညီ နေထိုင်ကြဖို့ အထက်ပါဝန်ကြီးဌာနက အသိပေးထားပါတယ်။
