One Championship က ယနေ့ (မတ်လ ၈) နံနက်ပိုင်းက ထိုင်းနိုင်ငံတွင် ပြုလုပ်သည့် မွေထိုင်းပြိုင်ပွဲတွင် လက်ဝှေ့ကျော် စိုးလင်းဦးက ပြိုင်ဘက်ရုရှားဖိုက်တာကို အမှတ်ဖြင့် ရှုံးနိမ့်ခဲ့သည်။
အဆိုပါ One Fight Night 29 ပြိုင်ပွဲ၏ မွေထိုင်း ကတ်ရှ်ဝိတ်တန်းပွဲစဥ်တွင် စိုးလင်းဦးနှင့် ရုရှားဖိုက်တာ ကော့ထွန်းတို့ ထိုးသတ်ခဲ့ခြင်း ဖြစ်သည်။
စိုးလင်းဦးနှင့် ကော့ထွန်းတို့သည် ပွဲချိန် (၃)ချီအပြည့်ထိုးသတ်ခဲ့ပြီး ဒိုင်ဆုံးဖြတ်ချက်ဖြင့် စိုးလင်းဦး အရှုံးပေးခဲ့ရခြင်း ဖြစ်သည်။
Public Service Announcement
ယင်းပွဲတွင် စိုးလင်းဦးသည် တိုက်စစ်ဖွင့်၍ အကောင်းဆုံးယှဥ်ပြိုင်ထိုးသတ်ခဲ့သော်လည်း အရပ်အမောင်းမြင့်မားသည့် ကော့ထွန်းကို ထိထိမိမိ ထိုးသတ်နိုင်ခြင်း မရှိခဲ့ပေ။
ကော့ထွန်းက စိုးလင်းဦးထက် အရပ်အမောင်းမြင့်မားပြီး ထောက်လက်သီး၊ ခြေကန်ချက်တို့ဖြင့် အသာရအောင် ထိုးသတ်နိုင်ခဲ့သည့်အတွက် ပွဲအပြီး၌ ဒိုင်များ၏ဆုံးဖြတ်ချက် အမှတ်ဖြင့် အနိုင်ရခဲ့ခြင်း ဖြစ်သည်။
ယင်းပွဲရှုံးနိမ့်ခဲ့သည့်အတွက် စိုးလင်းဦးအနေဖြင့် One Championship တွင် သုံးပွဲဆက်တိုက် ရှုံးပွဲကြုံခဲ့ရသည်။
စိုးလင်းဦးသည် ONE Championship ပြိုင်ပွဲတွင် ၆ ပွဲထိုးသတ်ရာ ၃ ပွဲနိုင် ၃ ပွဲရှုံးရလဒ် ပိုင်ဆိုင်ထားသည်။
