လက်နက်ခဲယမ်းများ သိမ်းဆည်းရမိပြီး စခန်းအား မီးရှို့ဖျက်ဆီး
အောင်ဇေယျ/People’s Spring
စစ်ကိုင်းတိုင်း၊ ကန့်ဘလူမြို့နယ်၊မလည်ကျေးရွာစခန်းသိမ်းတိုက်ပွဲတွင် စစ်ကောင်စီတပ် ထိခိုက်သေဆုံးမှုများပြီး လက်နက်ခဲယမ်းများသိမ်းဆည်းရမိကာ စခန်းအား မီးရှို့ဖျက်ဆီးနိုင်ခဲ့ကြောင်း ဒေသတွင်းတော်လှန်ရေးအင်အားစုများက ပြောသည်။
ယမန်နေ့ (မေလ ၇ ရက်) နံနက် ၅ နာရီ ၁၅မိနစ် ခန့်က ကန့်ဘလူမြို့နယ်၊ မလည်ကျေးရွာရှိ စစ်ကောင်စီအထိုင်စခန်းအား ကန့်ဘလူခရိုင် PDFတပ်ရင်းတပ်ဖွဲ့များက ဝင်ရောက်တိုက်ခိုက်ခဲ့သည်။
စစ်ကောင်စီတပ်အထိနာ၍ Mi35 တိုက်ခိုက်ရေး ရဟတ်ယာဉ်ဖြင့် ၁၀ ကြိမ်၊ ဂျက်ဖိုက်တာဖြင့် ၆ ကြိမ်နှင့် Y-12စစ်ထောက်ပို့ယာဉ်တစ်စီးတို့ဖြင့် ၃နာရီနီးပါးပျံဝဲကာ ၁၆ကြိမ် ဗုံးသီးချတိုက်ခိုက်ခဲ့ပြီး မန္တလေးတိုင်းဘက်ခြမ်းမှလည်း ဟောင်ဝစ်ဇာဖြင့် အကြိမ်၅၀ထက်မနည်း ပစ်ကူပေးခဲ့ကြောင်း ကျွန်းလှ-ကန့်ဘလူ တက်ကြွလှုပ်ရှားသူများအဖွဲ့က ပြောသည်။
Public Service Announcement
တော်လှန်ရေးတပ်ဖွဲ့များက ဘန်ကာများအား ဖြိုဖျက်ကာ စခန်းကုန်းအား သိမ်းပိုက်နေရာယူနိုင်ခဲ့သည်။
တိုက်ပွဲကြာချိန် ၈ နာရီခန့်ရှိပြီး စစ်ကောင်စီတပ်ဘက်မှ အထိအခိုက်သေဆုံးမှုများပြီး လက်နက်ခဲယမ်းအချို့လည်း သိမ်းဆည်းရမိကြောင်း သိရသည်။
စစ်ကောင်စီကလည်း နေ့လယ်ပိုင်းတွင် ယမနေပျူစောထီးရွာမှ အင်အား ၁၅၀ခန့်၊ မန္တလေးတိုင်းဘက်ခြမ်းမှ အင်အား ၇၀ခန့်တို့ဖြင့် ကုန်ကြောင်း၊ ရေကြောင်းများမှ စစ်ကူဝင်ရာက်လာကြောင်း၊ လေကြောင်းပစ်ခတ်မှုများနှင့် စစ်ကူများရောက်ရှိလာခြင်းကြောင့် ဆုတ်ခွာခဲ့သည်ဟု ကျွန်းလှ-ကန့်ဘလူ တက်ကြွလှုပ်ရှားသူများအဖွဲ့က ပြောသည်။
“မန္တလေးဘက်ခြမ်းရော တခြားဘက်ကနေကော တိုးလာတာရော လေကြောင်းပစ်ကူရောဆိုတော့ စခန်းကုန်းရောက်မှ ဘန်ကာတွေမီးရှို့ပြီး ပြန်ဆုတ်ခဲ့ရတယ်။ ထိုင်လို့တော့မရဘူးပေါ့။ “ဟု ဒေသတွင်းတော်လှန်ရေးရဲဘော်တစ်ဦးက ပြောသည်။
တော်လှန်ရေးတပ်ဖွဲ့များမှကလည်း ထိခိုက်ကျဆုံးသူအချို့ရှိခဲ့သည်ဟု သိရပြီး အသေးစိတ်မသိရသေးပေ။
တိုက်ပွဲများကြောင့် မလည်တိုက်နယ်အတွင်းရှိ ကျေးရွာအများအပြားမှ ပြည်သူအများအပြားထွက်ပြေးတိမ်းရှောင်နေရကြောင်း သိရသည်။
မလည်ကျေးရွာသည် ယမန်နှစ် ဧပြီ ၈ ရက်က လေကြောင်းတိုက်ခိုက်မှုကြောင့် ဒေသခံပြည်သူ ၁၆၈ဦး သေဆုံးခဲ့ရသည့် ပဇီကြီးရွာနှင့် မနီးမဝေးတွင် တည်ရှိသည်။
