ထားဝယ်ခရိုင် သရက်ချောင်းမြို့နယ်တွင် အရက်ဝယ်ရန်ထွက်လာသော စစ်ကောင်စီတပ်သားအချို့ကို စောင့်ကြိုတိုက်ခိုက်ခဲ့ကြောင်း Dawei Guerrilla Revolution Force – DGRF က People’s Spring သတင်းဌာနသို့ ပြောသည်။
သရက်ချောင်းမြို့နယ် စော်ဖျားရွာ၌ တပ်စွဲထားသော စစ်ကောင်စီတပ်မှ တပ်သားအချို့သည် ဖေဖော်ဝါရီ ၂၂ ရက်နေ့ညနေ ၅ နာရီခန့်က အရက်ဝယ်ထွက်လာစဥ် ဥသြစစ်ကြောင်း၊ PDF တပ်ရင်း (၁)နှင့် DGRF တပ်ဖွဲ့ဝင်များမှ ပူးပေါင်းတိုက်ခိုက်ခဲ့ခြင်း ဖြစ်သည်။
“တပ်စွဲထားတဲ့ စခတွေ အရက်ထွက်လာဝယ်တုန်း ကျတော်တို့ ကင်းနဲ့ တည့်တိုးပြီး ပစ်ခံခဲ့ရတာ”ဟု DGRF မှ တာဝန်ရှိသူတစ်ဦးက People’s Spring သို့ ပြော သည်။
အဆိုပါ တိုက်ခိုက်မှုတွင် အပြန်အလှန်ပစ်ချိန် ၁၀ မိနစ်ကျော် ဖြစ်ပွားခဲ့ပြီး စစ်ကောင်စီတပ်မှ နှစ်ဦးသေဆုံးကာ PDF ပူးပေါင်းတပ်မှ တော်လှန်ရေးရဲဘော်များ အထိ အခိုက်မရှိခဲ့ကြောင်း ၎င်းတာဝန်ရှိသူက ဆက်ပြော သည်။
အလားတူ ယမန်နေ့ ဖေဖော်ဝါရီ ၂၆ ရက်နေ့ညနေပိုင်းကလည်း သရက်ချောင်းမြို့နယ် သိမ်ကုန်းရွာရေတံခွန်အနီး စစ်ကောင်စီတပ်နှင့် ဒေသအခြေစိုက် ပြောက်ကျားတပ်ဖွဲ့တစ်ခု ထိတွေ့တိုက်ပွဲဖြစ်ပွားခဲ့ပြီး ထိခိုက်ကျဆုံးအခြေ အနေအား မသိရသေးပေ။
