မကွေးတိုင်း ပေါက်မြို့နယ်တောင်ပိုင်းကို စစ်ကောင်စီတပ် စစ်ကြောင်းနှစ်ကြောင်းဖြင့်ထိုးနေ၍ ဒေသခံပြည်သူ ၃၀၀၀ကျော် နေရပ်စွန့်ခွာထွက်ပြေးနေရကြောင်း ဒေသခံများကပြောသည်။
“ပေါက်တောင်ပိုင်းမှာ စစ်ကောင်စီက စစ်ကြောင်းနှစ်ကြောင်းနဲ့ ထိုးစစ်ဆင်နေတာ”ဟုဒေသခံပြည်သူ့ကာကွယ်ရေးတပ်ဖွဲ့ဝင်တစ်ဦးကလည်းပြောသည်။
အင်အား(၈၀)ဝန်းကျင်စီရှိသည့်စစ်ကောင်စီစစ်ကြောင်းနှစ်ကြောင်းသည် ဖေဖော်ဝါရီ ၂၄ ရက် မနက်ကတည်းက ကျေးရွာများကို စစ်ကြောင်းထိုးနေပြီး ရွာသားနှစ်ဦးကိုလည်း ဖမ်းဆီးထားကြောင်း ဒေသခံများကပြောသည်။
ပေါက်မြို့နယ်၊ရေပြာရဲစခန်းမှ အင်အား ၈၀ခန့်ပါဝင်သည့် စစ်ကောင်စီစစ်ကြောင်းသည် ရေတိမ်နှင့်ကျွန်းတောရွာများကို စစ်ကြောင်းထိုးဝင်ရောက်လာသဖြင့် ဖေဖော်ဝါရီ ၂၄ ရက်တွင် ဒေသခံပြည်သူ့ကာကွယ်ရေးတပ်များနှင့်တိုက်ပွဲဖြစ်ပွားခဲ့သည်။တိုက်ပွဲတွင် နှစ်ဖက်ထိခိုက်ကိဆုံးမှုအခြေအနေကိုမူ မသိရသေးပေ။
စစ်ကြောင်းထိုးခံရသောကျေးရွာများမှ ဒေသခံများမှာလည်း နေအိမ်များစွန့်ခွာထွက်ပြေးနေရသည်။
ထိုအတူဖေဖော်ဝါရီ ၂၆ ရက်မနက်ပိုင်းကလည်း ယာကြီးပြင်ရွာမှာ အင်အား ၈၀ကျော်ပါသည့် စစ်ကောင်စီတပ် စစ်ကြောင်းက သဖန်းချောက်ကျေးရွာကို စစ်ကြောင်းထိုးဝင်ရောက်ပြီး ဒေသခံနွားကျောင်းသား နှစ်ဦးကို ဖမ်းဆီးသွားကြောင်း ဒေသခံများကပြောသည်။
အဆိုပါစစ်ကြောင်း ဘေးရန်ကြောက်သဖြင့် ပန်းတော်ကန်၊ သဖန်းချောက်၊ ဇီးဖြုကုန်း၊ ရေယာဉ်တောင်စု၊မြောက်စုစသည့်ကျေးရွာများမှ ဒေသခံထောင်ချီထွက်ပြေးနေရခြင်းဖြစ်သည်။
