စစ်ကိုင်းတိုင်း၊ ယင်းမာပင်မြို့နယ်တွင် မုံရွာ – ပုသိမ်လမ်းဘေး ရဲတပ်ရင်း (၂၈)အနီးရှိ ကျေးရွာများကို စစ်ကောင်စီတပ်က စစ်ကြောင်းထိုး ဝင်ရောက်ပစ်ခတ်၍ ပြည်သူနှစ်ဦး ကျဉ် ထိမှန်ဒဏ်ရာရရှိထားကြောင်း ဒေသတွင်းသတင်းရင်းမြစ်များက ပြောသည်။
ယနေ့ (ဖေဖော်ဝါရီ ၂၇ ရက်) နံနက် ၅ နာရီခွဲခန့်က စစ်ကောင်စီတပ်သည် ရွှေတောင်ဦးကုန်းမှ အနောက်မြောက်တိုင်းစစ်ဌာနချုပ်(နမခ)မှလာသော စစ်ယာဥ် သုံးစီးနှင့်အတူ မုံရွာ – ပုသိမ်လမ်းအတိုင်း ရဲတပ်ရင်း (၂၈)အနီး ကျေးရွာများကို ဝင်ရောက်ပစ်ခတ်ခဲ့ခြင်းဟု ဒေသတွင်းသတင်းရင်းမြစ်များက ပြောသည်။
“အင်အားတော့ အတိအကျခန့်မှန်းမရဘူး။ များတယ်။ မုံရွာ – ပုသိမ်လမ်း ရွှေတောင်ဦးကုန်းနဲ့ ဝမ်းပေါင်လမ်းဆုံအထိ ကင်းပုန်းတွေချထားတယ်။ ကျေးရွာတွေထဲမှာလည်း ဝင်ရောက်နေတာတွေရှိတယ်။”ဟု ယင်းမာပင်ခရိုင်တပ်ရင်း (၁၆) တပ်ခွဲ – ၁ Brother Defense Force၏ ပြန်ကြားရေးတာဝန်ခံက ပြောသည်။
အဆိုပါ စစ်ကြောင်းအတွက် လုံခြုံရေး ကင်းပုန်းယူပေးနေသော ဆားလင်းကြီးမြို့နယ်၊ ဝမ်ပေါင်ကုမ္ပဏီနှင့် ၁၆ ကုတင်တိုက်နယ်ဆေးရုံအနီး ကင်းပုန်းယူထားသည့် စစ်ကောင်စီတပ်ဖွဲ့ဝင်များကို ယနေ့နံနက် ၇ နာရီခွဲခန့်က မိုင်းဆွဲတိုက်ခိုက်ခဲ့ကြောင်း၊ မိုင်းဆွဲတိုက်ခိုက်မှုကြောင့် စစ်ကောင်စီတပ်သား နှစ်ဦးသေဆုံးပြီး ငါးဦးအပြင်းအထန်ဒဏ်ရာရရှိကြောင်း Brother Defense Force၏ ပြန်ကြားရေးတာဝန်ခံက ပြောသည်။
စစ်ကောင်စီတပ်သည် မုံရွာ – ပုသိမ်လမ်းပေါ်ရှိ ခရီးသွားပြည်သူများ၏ ယာဥ်များကိုလည်း တားဆီးစစ်ဆေးခဲ့ကြောင်း ဒေသခံများက ပြောသည်။
