နေပြည်တော်ရှိစစ်ကောင်စီလေကြောင်းရန်ကာကွယ်ရေးတပ်အား ဒုံးကျည်ဖြင့်ပစ်ခတ်တိုက်ခိုက်ခဲ့ကြောင်း ပြည်သူ့ကာကွယ်ရေးတပ်မတော်(နေပြည် တော်)မှတာဝန်ရှိသူတစ်ဦးက People’s Spring သတင်းဌာနသို့ ပြောကြားသည်။
တောင်ညိုဒေသ ဥတ္တသီရိမြို့နယ်တွင် အခြေစိုက်သည့် အမှတ် (၈)လေကြောင်းရန်ကာကွယ်ရေးကွပ်ကဲမှုဌာနချုပ်အောက်မှ လေဆိပ်ဗျူဟာအား PDF တပ်ပေါင်းစုက ယမန်နေ့(ဖေဖော်ဝါရီ ၂၂) နံနက်ပိုင်းတွင် တာဝေးပစ်ဒုံးကျည် ၂ စင်းဖြင့်ပစ်ခတ်တိုက်ခိုက်ခဲ့ခြင်းဖြစ်သည်ဟုသိရသည်။
“လေဆိပ်ဗျူဟာ နေပြည်တော် လေကြောင်းရန်ကာကွယ်ရေးတပ်ကို တာဝေးပစ်နဲ့ ပစ်ခတ်တာပါ။ ”ဟု ပြည်သူ့ကာကွယ်ရေးတပ်မတော်(နေပြည်တော်)၏ တာဝန်ရှိသူတစ်ဦးက People’s Spring သို့အတည်ပြုပြောကြားသည်။
ဒုံးကျည် ၂ စင်းဖြင့်ပစ်ခတ်တိုက်ခိုက်ရာ တပ်စခန်းဝန်းအတွင်းရှိ အရာရှိလိုင်းခန်းဟုယူဆရသောအဆောက်အအုံတစ်ခုကိုထိမှန်ခဲ့ကြောင်းသိရသည်။စစ်ကောင်စီတပ်မှ သေဆုံးထိခိုက်မှုများရှိနိုင်ပြီး အသေးစိပ်အခြေ အနေများကိုစုံစမ်းနေဆဲဖြစ်ကြောင်းသိရသည်။ ပစ်ခတ်တိုက်ခိုက်ခံရပြီးနောက် စစ်ကာင်စီတပ်ကရမ်းသန်းပစ်ခတ်မှုများပြုလုပ်ခဲ့ကြောင်းလည်း PDF တစ်ဦးကပြောသည်။
ထို့အပြင် ယမန်နေ့ညနေ ၃ နာရီ ၄၅ မိနစ်ခန့်က နေပြည် တော်၌ မောင်းသူမဲ့ကင်းထောက်ယာဥ်တစ်စင်း ဖြတ်သန်းသွားသည်ဆိုကာ စစ်ကောင်စီတပ်မှ လိုက်လံရှာဖွေမှုများ အပူတပြင်းလုပ်ဆောင်နေသည်ဟုလည်း သတင်းများ ထွက်ပေါ်လျှက်ရှိသည်။
အထက်ပါ နေပြည်တော်အခြေစိုက် စစ်ကောင်စီတပ်၏ အမှတ် (၈)လေကြောင်းရန်ကာကွယ်ရေးကွပ်ကဲမှုဌာန ချုပ်နှင့် လက်အောက်ခံတပ်ရင်းများအပါအဝင် သုံးနေ ရာထက်မနည်းကို တော်လှန်ရေးပူးပေါင်းတပ်များက ပြီးခဲ့သည့် ၂၀၂၁ ခုနှစ် အောက်တိုဘာတွင် ဖောက်ခွဲတိုက် ခိုက်ခဲ့သေးသည်။
