အင်ဒိုနီးရှားမှာ ဖြစ်ပွားခဲ့တဲ့ မြေတိမ်ငလျင် လှုပ်ခတ်မှုကြောင့် ထိခိုက်ပျက်စီး၊ ဒဏ်ရာရမှုတွေ ဖြစ်ပေါ်ခဲ့ကြောင်း သိရပါတယ်။
ဧပြီ ၉ ရက် မနက်အစောပိုင်းက ပြင်းအား မဂ္ဂနီကျု ၄.၉ အဆင့် ငလျင်တစ်ခုက နိုင်ငံအရှေ့ပိုင်းကို ဗဟိုပြု လှုပ်ခတ်ခဲ့တာ ဖြစ်ပါတယ်။ ငလျင်ဟာ အရှေ့ နူဆာ တန်ဂါရာ ပြည်နယ်ထဲက မော်မာရာမြို့ရဲ့ အရှေ့ဖက် ကီလိုမီတာ ၁၀၀ လောက် အကွာကို ဦးတည်ခဲ့တာပါ။
ငလျင်ရဲ့ ပြင်းအားက အရမ်းမများပေမယ့် မြေအနက် ၁၀ ကီလိုမီတာလောက် မြေတိမ်ပိုင်းကို ဗဟိုပြုခဲ့တာကြောင့် မြေပြင်ပေါ်မှာ ထိခိုက်မှုတွေ သိသာခဲ့တာပါ။ မြေတိမ်ငလျင်တွေရဲ့ သက်ရောက်မှုဟာ မြေပြင်အထက်မှာ ပိုပြီး သိသိသာသာ ခံစားကြရလေ့ ရှိပါတယ်။
အဒိုနာရာ ကျွန်းပေါ်မှာရှိတဲ့ ရွာငယ်နှစ်ခုကတော့ ငလျင်ဒဏ်ကို အသိသာဆုံး ခံစားခဲ့ရပြီး အိမ်ခြေ ၁၀၀ ကျော် ပျက်စီးမှုတွေ ဖြစ်ခဲ့သလို လူပေါင်း ၂၀ ကျော် ဒဏ်ရာရခဲ့ပါတယ်။
Public Service Announcement
ငလျင်ရဲ့ သက်ရောက်မှုဟာ ဝေးလံသီခေါင်တဲ့ ဧရိယာတချို့ကိုပါ ထိခိုက်စေခဲ့တာကြောင့် ထိခိုက်ပျက်စီးမှုနဲ့ ဒဏ်ရာရ စာရင်းတွေ တိုးလာနိုင်သေးတယ်လို့လည်း တာဝန်ရှိသူတွေက ပြောပါတယ်။
အင်ဒိုနီးရှားဟာ ပစိဖိတ် မီးကွင်းဒေသလို့ ခေါ်ဝေါ်တဲ့ ရေအောက်မီးတောင် ရပ်ဝန်းနဲ့ ဆက်စပ်တည်ရှိနေပြီး မီးတောင်ပေါက်ကွဲမှုတွေ၊ ငလျင်လှုပ်ခတ်မှုတွေနဲ့ မစိမ်းတဲ့ နိုင်ငံတစ်ခု ဖြစ်ပါတယ်။
၂၀၀၄ ခုနှစ်တုန်းက မဂ္ဂနီကျု ၉.၁ အဆင့် ငလျင်ကြီးတစ်ခု လှုပ်ခတ်ပြီး နောက်ဆက်တွဲ ဆူနာမီ ရေလှိုင်းတွေပါ ရိုက်ခတ်ခဲ့တာကြောင့် အင်ဒိုနီးရှား အနောက်ဖက်ခြမ်းမှာ လူပေါင်း ၁၇၀၀၀၀ ကျော် သေဆုံးခဲ့ပါတယ်။
မြေတိမ် ငလျင်တွေလှုပ်ခတ်တဲ့အခါ ငလျင်လှိုင်းတွေဟာ တိုတောင်းတဲ့ အကွာအဝေးနဲ့တင် မြေမျက်နှာပြင်ပေါ် ခပ်မြန်မြန် ရောက်ရှိလာနိုင်တာကြောင့် မြေပြင်အထက်မှာ ပိုပြီး အဖျက်စွမ်းအားများများနဲ့ သက်ရောက်လေ့ ရှိပါတယ်။
ကိုးကား: AFP
ဓာတ်ပုံ – AFP
