အိမ်ဖြူတော်နားကို လက်နက်ကိုင် ချဉ်းကပ်လာသူ တစ်ဦးကို ပစ်ခတ်ခဲ့ကြောင်း အမေရိကန် သမ္မတရဲ့ လုံခြုံရေးကို တာဝန်ယူရတဲ့ လျှို့ဝှက် ထောက်လှမ်းရေး အေဂျင်စီက အတည်ပြုခဲ့ပါတယ်။
မတ်လ ၈ ရက်နေ့ ညပိုင်းတုန်းက အဲဒီ မသင်္ကာစရာ အမျိုးသားကို လုံခြုံရေး အေးဂျင့်တွေက ပစ်ခတ်ခဲ့တာဖြစ်ကြောင်း၊ အခင်း ဖြစ်ချိန်တုန်းကတော့ သမ္မတ ထရမ့်ဟာ အိမ်ဖြူတော်မှာ ရှိမနေခဲ့ဘဲ ဖလော်ရီဒါမှာရှိတဲ့ သူ့ကိုယ်ပိုင် မာရာအယ်လ်လာဂို စံအိမ်ကြီးဆီ ပြန်ရောက်နေခဲ့ကြောင်း နောက်တစ်နေ့ မနက်မှာ လျှို့ဝှက်ထောက်လှမ်းရေး ဌာန ပြောရေးဆိုခွင့်ရ အရာရှိ တစ်ဦးက အတည်ပြုခဲ့ပါတယ်။
လက်နက် ကိုင်ဆောင်ခဲ့သူဟာ ဆေးရုံရောက်နေတယ်လို့ သူက ပြောပေမယ့် ဒဏ်ရာ အခြေအနေ အသေးစိတ်ကိုတော့ အသိပေးမသွားခဲ့ပါဘူး။ ပြီးတော့ အဲဒီအမျိုးသားက လက်နက်ကိုင်ပြီး အိမ်ဖြူတော်နား ချဉ်းကပ်ခဲ့တဲ့ ရည်ရွယ်ချက်ဟာ ထရမ့်ကို ပစ်မှတ်ထားဖို့လား ဆိုတာကိုလည်း တိတိကျကျ ရှင်းပြမသွားပါဘူး။
ဖြစ်စဉ် အတောအတွင်း လုံခြုံရေး အရာရှိတွေဖက်မှာ ထိခိုက်ဒဏ်ရာရသူတော့ မရှိခဲ့ဘူးလို့ လျှို့ဝှက် ထောက်လှမ်းရေး အေဂျင်စီ ပြောရေးဆိုခွင့်ရ အရာရှိ အန်သိုနီ ဂူလိုင်မီက သူ့ရဲ့ လူမှုကွန်ရက် မီဒီယာ X အကောင့်မှာ ရေးသားထားခဲ့ပါတယ်။
Public Service Announcement
အင်ဒီယာနာ ရဲတပ်ဖွဲ့က ကိုယ့်ကိုယ်ကိုယ် သေကြောင်းကြံဖို့ စိတ်ပိုင်းဖြတ်ထားတယ်လို့ ယူဆရသူ တစ်ဦးဟာ အင်ဒီယာနာကနေ ဝါရှင်တန်ဆီ ထွက်ခွာသွားတယ်လို့ သတင်းရခဲ့ကြောင်း အိမ်ဖြူတော် လုံခြုံရေးတွေဆီ ကြိုတင် သတင်းပေးပို့ထားခဲ့ပါတယ်။ မတ်လ ၈ ရက်နေ့ ညသန်းခေါင် ဝန်းကျင်မှာတော့ အဲဒီအမျိုးသားရဲ့ ကားက အိမ်ဖြူတော်နားမှာ ရပ်ထားတာကို တွေ့ရှိခဲ့တဲ့နောက် သူ့ကို လိုက်ရှာခဲ့ပါတယ်။
လျှို့ဝှက် ထောက်လှမ်းရေး အေးဂျင့်တွေဟာ သတင်းရထားတဲ့ အချက်အလက်တွေနဲ့ ကိုက်ညီတဲ့ အမျိုးသားကို ရှာတွေ့ခဲ့တဲ့နောက် ချဉ်းကပ် စစ်ဆေးဖို့ ကြိုးစားခဲ့ပေမယ့် သူက သေနတ်တရမ်းရမ်း လုပ်နေတဲ့နောက် ပစ်ခတ်မှု ဖြစ်ပွားခဲ့တယ်လို့ လျှို့ဝှက် ထောက်လှမ်းရေး အေဂျင်စီ ထုတ်ပြန်ချက်ထဲမှာ ဖော်ပြထားပါတယ်။
ဂူလိုင်မီက အခုဖြစ်စဉ်ကို ဝါရှင်တန်ဒီစီ မြို့တော် ရဲတပ်ဖွဲ့က တာဝန်ယူ စုံစမ်း စစ်ဆေးသွားမယ်လို့ ပြောကြားထားပြီး ရဲတပ်ဖွဲ့ကတော့ လတ်တလော ဘာမှ တိတိကျကျ မထုတ်ပြန်နိုင်သေးဘူးလို့သာ ပြောကြားထားပါတယ်။
ကိုးကား: CNN
