တရုတ်နိုင်ငံ အနောက်မြောက်ပိုင်းမှာ အသားကင် ဘာဘီကျူး စားသောက်ဆိုင် တစ်ခုထဲ ပေါက်ကွဲမှု ဖြစ်ပွားရာက လူ ၃၀ ကျော် သေဆုံးသွားကြောင်း သိရပါတယ်။
နန်ရှား ပြည်နယ်ထဲက ယင်ချွမ်မြို့မှာ ဇွန် ၂၁ ရက် ညပိုင်းက ပြင်းထန်တဲ့ ပေါက်ကွဲမှု ဖြစ်ခဲ့တာပါ။ စားသောက်ဆိုင်ထဲက ဓာတ်ငွေ့အရည်အိုး တစ်လုံး ယိုစိမ့်ရာကနေ အခုလို ပေါက်ကွဲခဲ့တာလို့ ရဲတွေက ပြောပါတယ်။ ဒီဖြစ်စဉ်မှာ သေဆုံးသူ ၃၁ ဦး ရှိခဲ့ပြီး ၇ ဦးထက်မနည်း ဒဏ်ရာတွေ ရခဲ့ပါတယ်။ အဲဒီထဲက ၁ ဦးဟာ အသက်လု ကုသမှုတွေ ခံယူနေရပါတယ်။
ကျန်တဲ့ ၆ ဦးကတော့ မှန်ကွဲစစဉ်တာ၊ အပူလောင်တာမျိုး အသေးစား ဒဏ်ရာတွေ ရရှိခဲ့ပါတယ်။ ပေါက်ကွဲတဲ့ အရှိန်ကြောင့် စားသောက်ဆိုင် ပတ်ဝန်းကျင်က မော်တော်ကား အစီး ၂၀ လောက်လည်း ပျက်စီးသွားပါတယ်။
လူမှုကွန်ရက်ပေါ် ပျံ့နှံ့လာတဲ့ ဓာတ်ပုံတွေမှာတော့ ပေါက်ကွဲမှုဒဏ်ကြောင့် ဆိုးဆိုးရွားရွား ပျက်စီးနေတဲ့ စားသောက်ဆိုင် မျက်နှာစာကို တွေ့ရပါတယ်။ ကယ်ဆယ်ရေး အဖွဲ့တွေဟာ အပေါ်ထပ်မှာ ပိတ်မိနေသူ တချို့ကို လှေကားတွေထောင်၊ ထမ်းစင်တွေပေါ်တင်ပြီး သယ်ထုတ်ခဲ့ရပါတယ်။
တရုတ်သမ္မတ ရှီကျင့်ဖျင်က အခု ပေါက်ကွဲမှု အကြောင်းကို ကြားသိရတဲ့အတွက် အနူးအညွတ် စိတ်မကောင်း ဖြစ်ရကြောင်း ပြောကြားခဲ့ပြီး လေးနက်တဲ့ သင်ခန်းစာ တစ်ခုအဖြစ် သတ်မှတ်ရမယ်လို့ ဆိုပါတယ်။
စုံစမ်းမှုတွေအရ စားသောက်ဆိုင်ရဲ့ ဓာတ်ငွေ့အိုးမှာ အဆို့တစ်ခု ပျက်စီးနေတာကို ဝန်ထမ်းတွေက တွေ့ရှိခဲ့တဲ့နောက် တစ်ဦးက အသစ်သွားဝယ်ပြီး လဲလှယ် တပ်ဆင်ခဲ့ကြောင်း၊ အဲဒီလို တပ်ဆင်နေချိန် ထပေါက်ကွဲခဲ့တာဖြစ်ကြောင်း သိရပါတယ်။
လောလောဆယ်မှာတော့ ရဲတွေက စားသောက်ဆိုင် မန်နေဂျာ အပါအဝင် လူ ၉ ဦးကို ထိန်းသိမ်းထားခဲ့ပြီး နောက်ဆက်တွဲ စုံစမ်း စစ်ဆေးမှုတွေ ဆက်လက် လုပ်ဆောင်နေဆဲ ဖြစ်ပါတယ်။
