မေ-၂၁၊၂၀၂၆။တေဇ/People’s Spring
မြန်မာနိုင်ငံအပေါ် ချမှတ်ထားတဲ့ ဥရောပသမဂ္ဂရဲ့ပိတ်ဆို့မှုကို ချိုးဖောက်ခဲ့တယ်လို့ သံသယရှိတဲ့ Thales ကုမ္ပဏီကို စုံစမ်းစစ်ဆေး အရေးယူဖို့ ပြင်သစ်အာဏာပိုင်တွေကို Justice For Myanmarက တောင်းဆိုလိုက်ပါတယ်။
ပြင်သစ်အစိုးရက တစိတ်တပိုင်း ပိုင်ဆိုင်ထားတဲ့ နိုင်ငံစုံစီးပွားရေးလုပ်ငန်းကြီး Thales က ၂၀၁၇ ကနေ ၂၀၂၀ အတွင်း မြန်မာစစ်တပ်ဆီကို Coast Watch 100 ရေကြောင်းစောင့်ကြည့်ရေး ရေဒါ ၆ လုံး ကို ထောက်ပံ့ရောင်းချပေးခဲ့တယ်လို့ Justice For Myanmar ရဲ့ အထောက်အထားတွေကို အသုံးပြုထားတဲ့ Disclose နဲ့ Info Birmanie တို့ရဲ့ အစီရင်ခံစာမှာဖော်ထုတ်ထားတာပါ။
ဒီရေဒါတွေကို ပြည်တွင်းဖိနှိပ်နှိမ်နင်းမှုတွေမှာ အသုံးပြုနိုင်တဲ့အတွက် မြန်မာနိုင်ငံအပေါ် ချမှတ်ထားတဲ့ ဥရောပသမဂ္ဂ(အီးယူ)ရဲ့ ကန့်သတ်ပိတ်ဆို့အရေးယူမှုတွေကို ချိုးဖောက်ရာရောက်နိုင်တယ်လို့ အစီရင်ခံစာမှာ ဖော်ပြထားပါတယ်။
Public Service Announcement
“ ရိုဟင်ဂျာများအပေါ် မြန်မာစစ်တပ်၏ လူမျိုးတုံးသတ်ဖြတ်မှုစစ်ဆင်ရေးပြုလုပ်ပြီးနောက်ပိုင်း Thales သည် အဆိုပါရေဒါများကို ယူရို ၁၆ သန်းဖြင့် ရောင်းချခဲ့ခြင်းဖြစ်ပြီး၊ အကျိုးအမြတ် ၃၀ မှ ၄၀ ရာခိုင်နှုန်းအထိ ရရှိခဲ့သည်။ အဆိုပါရေဒါများ၏ အဆင့်မြင့်ရေကြောင်းစောင့်ကြည့်ရေးစွမ်းရည်များကြောင့် ကမ်းရိုးတန်းဒေသများရှိ ရိုဟင်ဂျာများ၏ လှုပ်ရှားသွားလာမှုကို ကန့်သတ်ရာတွင် အသုံးပြုနိုင်ခြင်း၊ ရေတပ်က လှေများကို ကြားဖြတ်တားဆီးခြင်းနှင့် ရိုဟင်ဂျာအရပ်သားများအား အကြောင်းမဲ့ဖမ်းဆီးခြင်းတို့ကို အထောက်အကူပြုခဲ့သည်။” လို့ JFM က ထုတ်ပြန်ထားပါတယ်။
Thales ကုမ္ပဏီနဲ့ အရောင်းအဝယ်ကိစ္စကို စစ်ကောင်စီရဲ့လက်နက်ပွဲစား ဂျိုနသန်မျိုးကျော်သောင်းမိသားစုပိုင်တဲ့ Ky-Tha Tradingက ကြားခံပွဲစားအနေနဲ့ ဆောင်ရွက်ပေးခဲ့တယ်လို့ ဆိုပါတယ်။
ကျော်သောင်းရဲ့ မိသားစုပိုင်ကုမ္ပဏီတွေဖြစ်တဲ့ KT Group နဲ့ Ky-Tha Groupက စစ်တပ်အတွက် လက်နယ်ဝယ်တဲ့ ကိစ္စတွေအပါအဝင် အခြားစီးပွားရေးလုပ်ငန်းတွေကိုလည်း ပူးပေါင်းလုပ်ဆောင်နေတာလို့ JFMက ထောက်ပြထားပါတယ်။
ဒါကြောင့် စစ်တပ်အတွက် အခွန်ငွေတွေနဲ့ လက်နက်ဝယ်ယူမှုတွေကို တားဆီးနိုင်ဖို့ KT Group နဲ့ Ky-Tha Group အပါအဝင် ကုမ္ပဏီဒါရိုက်တာတွေနဲ့ ရှယ်ယာရှင်တွေကိုလည်း ဒဏ်ခတ်ပိတ်ဆို့မှုတွေ ပြုလုပ်ဖို့ JFMက တောင်းဆိုထားပါတယ်။
အမေရိကန်အစိုးရက ၂၀၂၂ မှာ KT Group ဥက္ကဋ္ဌ ဂျိုနသန်မျိုးကျော်သောင်းနဲ့ KT Services & Logisticsကုမ္ပဏီတွေအပေါ် ဒဏ်ခတ်ပိတ်ဆို့မှုတွေ ချမှတ်ခဲ့ပေမယ့် သုံးနှစ်အကြာမှာ အဆိုပါစာရင်းကနေ ပြန်လည်ပယ်ဖျက်ပေးခဲ့တယ်လို့ သိရပါတယ်။
လက်ရှိအစီရင်ခံစာအရ KT Group က စစ်တပ်နဲ့ဆက်လက်ပူးပေါင်းလုပ်ဆောင်နေတာကြောင့် အမေရိကန်အနေနဲ့ ဒဏ်ခတ်ပိတ်ဆို့မှုကို ပြန်လည်လုပ်ဆောင်သင့်ပြီး အီးယူ၊ ဗြိတိန်၊ ကနေဒါနဲ့ ဩစတြေးလျနိုင်ငံတွေအနေနဲ့လည်း KT Group နဲ့ Ky-Tha Groupကို ဒဏ်ခတ်ပိတ်ဆို့မှုတွေပြုလုပ်ဖို့ လိုအပ်နေတယ်လို့ JFMက တောင်းဆိုထားပါတယ်။
