ဧပြီ-၂၉၊၂၀၂၆။နွေဦး/People’s Spring
တိုက်ပွဲပြင်းထန်နေတဲ့ မြန်မာ-ထိုင်းနယ်စပ်မှာယနေ့မနက်ပိုင်းက ထိုင်းဘုရင့်လေတပ်က F-16 တိုက်လေယာဉ် ၂စင်းနဲ့ ကင်းလှည့်နေစဉ် အာဏာသိမ်း မြန်မာစစ်တပ်က နယ်စပ်အနီးကို တိုက်လေယာဉ်တွေနဲ့ ဗုံးကြဲတိုက်ခိုက်ခဲ့တယ်လို့ ထိုင်းလူမှုကွန်ရက်မှာ ရေးသားနေကြပါတယ်။
မြဝတီမြို့တောင်ဘက် မြန်မာ-ထိုင်းနယ်စပ်အနီးက စစ်တပ်ရဲ့ အရေးပါတဲ့ဝေါ်လေဗျူဟာကုန်းစခန်းကို ကရင်လွတ်မြောက်ရေးတပ်မတော်(KNLA) ဦးဆောင်တဲ့ တော်လှန်ရေးတပ်တွေက စခန်းသိမ်းတိုက်ပွဲအဖြစ် ထိုးစစ်ဆင်တိုက်ခိုက်နေတာ ဖြစ်ပါတယ်။
လက်တလောမှာ တိုက်ပွဲရက်ဆက်ပြင်းထန်နေပြီး ကုန်းကြောင်းကနေ စစ်ကူပို့မရတော့တဲ့စစ်တပ်က လေကြောင်းကနေ အသည်းအသန်ပစ်ကူပေးနေရပါတယ်။
Public Service Announcement
KNLAဦးဆောင်တဲ့ တော်လှန်ရေးတပ်တွေက ထိုးစစ်ဆင်တိုက်ခိုက်မှုကြောင့် ဝေါ်လေဗျူဟာတပ်စခန်းက စစ်သားတွေ သေဆုံး ထိခိုက်သူများနေလို့ စစ်တပ်က ဧပြီ ၂၇ရက် တစ်ရက်တည်း ဂျက်ဖိုက်တာနဲ့ အနည်းဆုံး ၁၆ကြိမ် ဗုံးကြဲ ပစ်ကူပေးခဲ့တာလို့ လူထုနွေဦးရဲ့ကရင်စစ်ရေးသတင်းရင်းမြစ်တဦးက ပြောပါတယ်။
ဧပြီ ၂၈ရက်မှာလည်း စစ်တပ်က ဝေါ်လေဗျူဟာကုန်းအနီးဝန်းကျင်နေရာတွေကို လေကြောင်းကနေ ဗုံးကြဲတိုက်ခိုက်ခဲ့တယ်လို့ သိရပါတယ်။
ဧပြီ ၂၉ မနက်မှာတော့ တိုက်ပွဲဆက်လက်ပြင်းထန်နေတာကြောင့် ဝေါ်လေဗျူဟာကုန်း နဲ့ တိ့သဲလယ် စခန်းရဲ့မျက်နှာချင်းဆိုင်ထိုင်းနိုင်ငံ ဘက်ခြမ်းမှာရှိတဲ့ ဖုတ်ဖရဒေသကို ထိုင်းဘုရင့်လေတပ်က F-16 တိုက်လေယာဉ် ၂ စင်းနဲ့ ထိုင်းအချိန် မနက် ၁၁ နာရီ ၁၀ မိနစ် (မြန်မာစံတော်ချိန် (၁၀ နာရီ ၄၀မိနစ်)မှာ ကင်းလှည့်နေစဉ် အာဏာသိမ်းစစ်တပ်က နယ်စပ်အနီးကို တိုက်လေယာဉ်တွေနဲ့ ဗုံးကြဲတိုက်ခိုက်ခဲ့တာ ဖြစ်ပါတယ်။
ထိုင်းတိုက်လေယာဥ်တွေက နယ်စပ်ထိုင်းလေပိုင်နက်မှာ ပျံသန်းပေးတာကြောင့် နယ်စပ်ကဒေသခံထိုင်းပြည်သူတွေ စိတ်လုံခြုံမှုရစေတယ်လို့ ထိုင်းပြည်သူအချို့ကရေးထားပါတယ်။
ဝေါ်လေဗျူဟာရဲ့ ကာကင်းစခန်းအချို့ကို တော်လှန်ရေးပူးပေါင်းတပ်တွေကသိမ်းဆည်းထားပါတယ်။
စစ်တပ်ကဝေါ်လေဗျူဟာကို မြဝတီဘက်ကနေစစ်ကူပို့နိုင်ဖို့ ကြိုးစားပေမယ့် မင်းလက်ပံ နဲ့ ဖလူးရွာကနေ KNLA ၊PDF ၊KNDO ပူးပေါင်းတပ်တွေရဲ့ ဖြတ်တောက်ပိတ်ဆို့တိုက်ခိုက်မှုကြောင့် လပေါင်းများစွာရှေ့မတိုးနိုင်ခဲ့ပါဘူး။
ဝေါ်လေဗျူဟာကုန်းကို တော်လှန်ရေးတပ်ဖွဲ့တွေကကာလရှည်ပိတ်ဆို့ဖြတ်တောက်ထားပြီးမှစတင်တိုက်ခိုက်ခဲ့တာဖြစ်ပါတယ်။စစ်ကောင်စီရဲ့ ဝေါ်လေဗျူဟာကုန်းဟာ ဝေါ်လေကျေးရွာရဲ့ တောင်ဘက်မှာ တည်ရှိပါတယ်။ စစ်ကူစစ်ကြောင်းတွေပို့မရတာကြောင့် စစ်တပ်ကလက်နက်ခဲယမ်းနဲရိက္ခာတွေကို လေယာဉ်နဲ့ စစ်ကောင်စီက ချပေးနေတာဖြစ်ပါတယ်။
ဒါအပြင် စစ်တပ်ကဝေါ်လေဗျူဟာကုန်းကို စစ်ကူပို့နိုင်ဖို့ တရုတ်အစိုးရဖိအားနဲ့ ထိုင်းနိုင်ငံကို အကူအညီတောင်းပြီး အဲဒီဘက်ခြမ်းကနေ စစ်ကူပို့ဖို့ ပြင်ဆင်နေတယ်လို့ သတင်းတွေထွက်ပေါ်နေပါတယ်။
ရုပ်သံ – Ek Kiattisak@
