ဧပြီ-၂၆၊၂၀၂၆။ထားမြတ်/People’s Spring
တနင်္သာရီတိုင်း၊ တနင်္သာရီ မြို့နယ် မောတောင်နယ်စပ်မြို့ကို အာဏာသိမ်းစစ်တပ်က တရက်အတွင်း လေကြောင်းဗုံးကြဲတိုက်ခိုက်မှု ၂ကြိမ်ပြုလုပ်ခဲ့ရာနေအိမ်အချို့ပျက်စီးခဲ့တယ်လို့ ကရင်အမျိုးသားအစည်းအရုံး(KNU)ကထုတ်ပြန်ပါတယ်။
ဧပြီ ၂၆ရက် နံနက် ၁၀နာရီ ၄၅မိနစ်နဲ့ နေ့လည် ၁နာရီကျော်မှာ စစ်ကောင်စီက မောတောင်မြို့ အမှတ်(၁) ရပ်ကွက်၊ အမှတ်(၉) ရက်ကွက်တွေကို ဗုံးကြဲခဲ့တာလို့ အသိပေးပါတယ်။
လေကြောင်းကနေ ဗုံးကြဲတိုက်ခိုက်မှုမှာ ပေါင် ၂၅၀ ဗုံး ၆လုံး အသုံးပြုခဲ့ကြောင်း အသိပေးထားပြီး လေကြောင်း တိုက်ခိုက်မှုကြောင့် နေအိမ် ၂လုံး ပျက်စီးခဲ့ဟု ဖော်ပြပါတယ်။ လူထိခိုက်သေဆုံးရှိမရှိ အခြေအနေကို ဖော်ပြမထားပါဘူး။
Public Service Announcement
မြန်မာ-ထိုင်းနယ်စပ်မြို့ဖြစ်တဲ့ မောတောင်မြို့ကို KNU မြိတ်ထားဝယ်ခရိုင်နဲ့ မဟာမိတ်တွေက ၂၀၂၅ နိုဝင်ဘာမှာ တိုက်ခိုက်သိမ်းပိုက်ခဲ့တာဖြစ်ပါတယ်။ စခန်းသိမ်းတိုက်ပွဲအတွင်း စစ်ကောင်စီထံမှ လက်နက်ခဲယမ်းများစွာ၊ စစ်သုံ့ပမ်းများစွာကို တော်လှန်ရေးပူးပေါင်းတပ်က သိမ်းရခဲ့ပါတယ်။
စစ်ကောင်စီဟာ သူတို့ လက်လွတ်ဆုံးရှုံးခဲ့ရတဲ့ နယ်မြေတွေဖြစ်တဲ့ KNU အုပ်ချုပ်ရာ ဒေသတွေက ပြည်သူတွေအကြောက်တရားဖြစ်စေဖို့ ရည်ရွယ်ချက်ရှိရှိ လေကြောင်းမှ ဗုံးကြဲတိုက်ခိုက်နေကြောင်း KNUက အသိပေးထားပါတယ်။
မောတောင်မြို့ဟာ အရင်က KNU တနင်္သာရီမြို့နယ် ဌာနချုပ်နယ်မြေဖြစ်ပြီး ၁၉၉၀ မှာ စစ်တပ်ကသိမ်းပိုက်ခဲ့ရာ ၃၅နှစ်အကြာမှာ တော်လှန်ရေးပူးပေါင်းတပ်ဖွဲ့တွေက ပြန်လည်တိုက်ခိုက်သိမ်းပိုက်နိုင်ခဲ့တာဖြစ်ပါတယ်။ စစ်ကောင်စီအနေနဲ့ မြို့သိမ်းခံရပြီးနောက် မောတောင်ပြန်ရဖို့ကြိုးပမ်းမှုတွေရှိခဲ့ပေမယ့် KNLA ပူးပေါင်းတပ်ရဲ့ ဟန့်တားမှုကြောင့် မအောင်မြင်ခဲ့ပါဘူး။
