■စစ်တပ်အာဏာသိမ်းပြီးနောက်ပိုင်းစစ်တပ်ကိုခုခံတော်လှန်နေတဲ့ တော်လှန်ရေးတပ်ဖွဲ့တွေထဲ ပထမဆုံး ဂုဏ်ပြုသဝဏ်လွှာပို့တဲ့ အဖွဲ့ဖြစ်လာ
ဧပြီ-၁၅၊၂၀၂၆။နေ့သစ်/People’s Spring
အာဏာသိမ်းခေါင်းဆောင် မင်းအောင်လှိုင်ရဲ့ အစိုးရကိုကြိုဆိုကြောင်း ပလောင်ပြည်နယ်လွတ်မြောက်ရေးတပ်ဦး/တအာင်းအမျိုးသားလွတ်မြောက်ရေးတပ်မတော်(PSLF/TNLA) ကဒီကနေ့ ဂုဏ်ပြုသဝဏ်လွှာပေးပို့ပါတယ် ။
ဒါကြောင့် စစ်တပ်အာဏာသိမ်းပြီးနောက် ခုခံတော်လှန်ကြတဲ့ တိုင်းရင်းသားလက်နက်ကိုင်တပ်ဖွဲ့တွေထဲမှာ အာဏာသိမ်းခေါင်းဆောင်ကို အစိုးရသစ်ဖွဲ့နိုင်တယ်ဆိုပြီး ဂုဏ်ပြုတာဟာ TNLA ကပထမဆုံးတိုင်းရင်းသားလက်နက်ကိုင်အဖွဲဖြစ်လာပါတယ် ။
Public Service Announcement
ဒါအပြင် TNLA က စစ်တပ် ၊ မင်းအောင်လှိုင် ရဲ့အစိုးရတွေနဲ့အတူ အပစ်အခတ်ရပ်စဲရေးကတိကဝတ်များကို ဆက်လက်ထိန်းသိမ်းပြီး နိုင်ငံရေးပြသာနာများကို နိုင်ငံရေး နည်းလမ်းဖြင့် ငြိမ်းချမ်းစွာဆွေးနွေးအဖြေရှာနိုင်ရန်မျှော်လင့်ထားတယ်လို့လည်းဖော်ပြထားပါတယ် ။ TNLA ထုတ်သဝဏ်လွှာမှာ အာဏာသိမ်း စစ်အုပ်စုကို
“ မြန်မာ့တပ်မတော်” ၊ အာဏာသိမ်းခေါင်းဆောင်ကို “ နိုင်ငံတော် သမ္မတဦးမင်းအောင်လှိုင် ၏ မြန်မာအစိုးရသစ်” ဆိုပြီး ရေးသား သုံးနှုန်းထားတာကိုတွေ့ရပါတယ် ။
အခုသဝဏ်လွှာနဲ့ပတ်သက်ပြီး TNLA ရဲ့ပြောရေးဆိုခွင့်ရှိသူ လွေးယေဦးကို ဆက်သွယ်မေးမြန်းနိုင်ဖို့ People’s Spring ကြိုးစားနေပါတယ် ။
ပြည်သူတွေကတော့ TNLA က အာဏာသိမ်းခေါင်းဆောင်ကိုအခုလိုဂုဏ်ပြုသဝဏ်လွှာပေါ်တဲ့အပေါ် အပြင်းအထန်ဝေဖန်နေကြပါတယ် ။
“ အသက်ပေးသွားတဲ့ ရဲဘော်တွေရဲ့ မျက်နှာကိုမ
မထောက်” လို့ပြည်သူတဦးကမှတ်ချက်ပြုပါတယ်။
“ အထင်ကြီးခဲ့သမျှ အလကားဖြစ်ကုန်ပြီ TNLA” လို့ပြည်သူတဦးကလည်း ပြောပါတယ်။
အခြားပြည်သူတဦးကလည်း “ တရုတ်ဖိအားကြောင့်ပါ ၊လေယာဉ်နဲ့ဗုံးကြဲမှာကြောက်လို့ပါ၊
အကြွေးတွေအများကြီးတင်နေလို့ပါစတဲ့ဆင်
ခြေတွေ တွေ့ရဖို့ရှိတယ်” လို့ မှတ်ချက်ပြုပါတယ်။
အာဏာသိမ်းခေါင်းဆောင်မင်းအောင်လှိုင်ကို စစ်တပ်လွှတ်တော်တွေက သမ္မတရာထူးခန့်အပ်တဲ့အပေါ် ၀တပ် UWSA ၊ မိုင်းလားတပ် NDAA နဲ့ နာဂတပ် NSCN-K(အန်းမိုင်) အဖွဲ့တို့ပဲ ဂုဏ်ပြုကြောင်းသဝဏ်လွှာပေးခဲ့ကြပါတယ်။ အဲအဖွဲ့တွေကစစ်တပ်အာဏာသိမ်းပြီးနောက်ပိုင်းစစ်တပ်ကို ခုခံတိုက်ခိုက်တာမရှိပါဘူး ။
အခြားတော်လှန်ရေးတပ်ဖွဲ့တွေသဝဏ်လွှာပို့ အသိအမှတ်ပြုတာမရှိပဲ ဧပြီ ၁၅ ရက်မှာမှ TNLA ကအခုလို ဂုဏ်ပြုကြောင်းသဝဏ်လွှာပို့တာဖြစ်ပါတယ်။
ဒါပေမဲ့ အဓိကတိုင်းရင်းသားလက်နက်ကိုင်တော်လှန်ရေးအဖွဲ့ အစည်းတွေဖြစ်တဲ့ ကရင်အမျိုးသားအစည်းအရုံး(KNU)၊ ကချင်လွတ်လပ်ရေးအဖွဲ့(KIO) ၊ KNPP ၊CNF တို့က စစ်အာဏာရှင်စနစ် အပြီးသတ်ဖယ်ရှားနိုင်ရေးအတွက်အမျိုးသားညီညွတ်ရေးအစိုးရ(NUG)၊ ပြည်ထောင်စုလွှတ်တော်ကိုယ်စားပြုကော်မတီ(CRPH) အပါအဝင် မဟာမိတ်တွေနဲ့ ပူးပေါင်းပြီးဖက်ဒရယ်ဦးဆောင်ကောင်စီတရပ်ဖွဲ့စည်းခဲ့ပါတယ်။
ဒါ့အပြင် အာရက္ခတပ်တော်(AA) ၊ မွန်တော်လှန်ရေးတပ် ၊ ချင်းတော်လျန်ရေးတပ်တွေကလည်း စစ်ကောင်စီကို တိုက်ခိုက်တဲ့ စစ်ဆင်ရေးတွေ ဆက်လက်ဆင်နွှဲနေတာကို တွေ့ရပါတယ်။
ဒါ့အပြင် ကိုးကန့်တပ်မတော်(MNDAA) တို့က စစ်ကောင်စီကို ဂုဏ်ပြုတာမရှိသေးသလို စစ်ကောင်စီနဲ့ တိုက်ပွဲဖြစ်ပွားမှုမရှိတဲ့ ရှမ်းလက်နက်ကိုင်နှစ်ဖွဲ့ဖြစ်တဲ့ ရှမ်းပြည်ပြန်လည်ထူထောင်ရေးကောင်စီ(RCSSS)၊ ရှမ်းပြည်တိုးတက်ရေးပါတီ(SSPP) တို့ကလည်း မင်းအောင်လှိုင်သမ္မတရာထူးယူတဲ့အပေါ် ဂုဏ်ပြုတာ မလုပ်ကြပါဘူး ။
နွေဦးတော်လှန်ရေးမှာပေါ်လာတဲ့ တော်လှန်ရေးအဖွဲ့တွေ စုစည်းထားတဲ့ SRA ကလည်း အခြားတော်လှန်ရေးတပ်တွေနဲ့ပေါင်းပြီး စစ်တပ်ကိုဆက်လက်ခုခံတော်လှန်နေတာတွေ့ရပါတယ်။
TNLA ဟာ ညီနောင်မဟာမိတ် တွေနဲ့အတူ ၂၀၂၄ အောက်တိုဘာလကစတင်ခဲ့တဲ့ ၁၀၂၇ စစ်ဆင်ရေးမှာစစ်တပ်စခန်း ၊တပ်ရင်း ၊တပ်ရင်းဌာနချုပ်ပေါင်းများစွာမြို့ ဆယ်မြို့ကျော်ကိုသိမ်းပိုက်ထိန်းချုပ်နိုင်ခဲ့ပါတယ် ။ဒါပေမယ့် စစ်တပ်င ၂၀၂၅ နှစ်ဆန်းကစပြီး နောင်ကို တန်ပြန်ထိုးစစ်ဆင်လာပြီးနောက်ပိုင်း နောင်ချို ၊ သီပေါ ၊ကျောက်မဲမြို့တွေကိုပြန်လက်လွတ်ဆုံးရှုံးခဲ့ပါတယ်။တရုတ်ကြားဝင်မှုနဲ့စစ်တပ်နဲ့ အပစ်ရပ်ဆွေးနွေးပြီးတော့ မိုးကုတ် နဲ့ မိုးမိတ်မြို့တွေကိုလည်းကျည်တစ်ချက်မဖောက်ပဲပြန်လက်လွှဲပေးခဲ့ပါတယ်။
ပြီးခဲ့တဲ့ မတ်လမှာတော့ ညီနောင်မဟာမိတ်အချင်းချင်း ပဋိပက္ခဖြစ်ရာမှ MNDAA က ကွတ်ခိုင်မြို့က TNLA စခန်းတွေအားလုံးကို ထိုးစစ်ဆင်သိမ်းပိုက်ပြီး နှစ်ဖက်ခေါင်းဆောင်တွေဆွေးနွေးပြီးတော့ ကွတ်ခိုင်မြို့နယ်ကနေလည်း TNLA ကဆုတ်ခွာပေးခဲ့ပါတယ် ။
ပြည်သူ များစွာမဲမပေးတဲ့ စစ်တပ်ရဲ့ ၂၀၂၅ ရွေးကောက်ပွဲကို နိုင်ငံတကာရွေးကောက်ပွဲ လေ့လာစောင့်ကြည့်တဲ့အဖွဲ့တွေ ၊ လူ့အခွင့်အရေးအဖွဲ့တွေ ၊ကုလအပါအဝင် ဒီမိုကရေစီနိုင်ငံတွေကအသိအမှတ်မပြုကြပါဘူး။ ဒါကြောင့်စစ်တပ်လွှတ်တော်ကရွေးကောက်တင်မြှောက်တဲ့ စစ်အစိုးရ
ကိုလည်း တရုတ် ၊ရုရှား ၊ဘီလာရုဇ် အပါအဝင် အာဏာရှင်နိုင်ငံအချို့ကပဲအသိအမှတ်ပြုပြီးနိုင်ငံတကာက အသိအမှတ်မပြုကြပါဘူး။ဒါကြောင့်အာဏာသိမ်းခေါင်းဆောင်ရဲ့ အစိုးရဟာပြည်တွင်းပြည်ပ အသိအမှတ်ပြုမှုရဖို့ရုန်းကန်နေရပါတယ် ။
