ဧပြီ-၁၃၊၂၀၂၆။ဟာနာဆန်/People’s Spring
ပြည်သူတွေအနေနဲ့ စစ်မှန်တဲ့ လွတ်လပ်မှုနဲ့ လူ့အခွင့်အရေးတွေ မရရှိသေးမီကာလအတွင်း အနှစ်သာရ ကင်းမဲ့တဲ့ ပျော်ပွဲ၊ရွှင်ပွဲတွေကို သည်းခံစောင့်ထိန်းပေးကြဖို့ အမျိုးသားညီညွတ်ရေးအစိုးရ (NUG) လက်အောက်ရှိ ရွှေဘိုမြို့နယ်ပြည်သူ့အုပ်ချုပ်ရေးအဖွဲ့ (ပအဖ)က ဧပြီ ၁၂ရက်မှာ မေတ္တာရပ်ခံလိုက်ပါတယ်။
အဆိုပါ ထုတ်ပြန်ချက်မှာ မြန်မာပြည်သူလူထုရဲ့ ဘုံရန်သူဖြစ်တဲ့ စစ်မိစ္ဆာအာဏာရှင်ကို အမြစ်ပြတ်တော်လှန်နေတဲ့ တော်လှန်ရေးအဖွဲ့အစည်းများနဲ့ ပြည်သူများဟာ စစ်မှန်တဲ့ လွတ်လပ်မှုအတွက် ကြီးမားတဲ့ ပေးဆပ်မှုတွေနဲ့ ကြိုးစားနေရတဲ့အချိန် ဖြစ်ကြောင်း ရေးသားထားပါတယ်။
” ကိုယ်၊ စိတ်နှစ်ပါး ပင်ပန်းနေကြသည်ကို ကိုယ်ချင်းစာ နားလည်ခံစားမိသော်လည်း စစ်မှန်တဲ့လွတ်လပ်မှု မရမချင်း ကျင်းပတဲ့ ပျော်ပွဲရွှင်ပွဲတွေဟာ အနှစ်သာရ ကင်းမဲ့လွန်းတာကြောင့် သည်းခံစောင့်ထိန်းပေးကြဖို့ ရွှေဘိုမြို့နယ် ပအဖက ဆိုပါတယ်။
Public Service Announcement
ဒါ့အပြင် ပြည်သူတွေအနေနဲ့ စစ်ကောင်စီရဲ့ အဆက်မပြတ် ယုတ်မာရက်စက်မှုတွေကို လိမ္မာပါးနပ်စွာ ရှောင်ရှားနိုင်ဖို့နဲ့ ဘေးအန္တရာယ်ကင်းရှင်းစေဖို့အတွက် အထူးသတိပြု နေထိုင်ကြဖို့ကိုလည်း ရွှေဘိုပအဖက တိုက်တွန်းပါတယ်။
“ လေကြောင်းကနေလည်း ဗုံးကကြဲနိုင်တယ်။ သင်္ကြန်ကမလုပ်သင့်သေးဘူး” လို့ ရွှေဘိုခရိုင်က ဒေသခံတစ်ဦးက ပြောပါတယ်။
ရွှေဘိုခရိုင်အတွင်းက ဒီပဲယင်း၊ အရာတော်နဲ့ ကနီမြို့နယ်တွေမှာလည်း သင်္ကြန်ကာလ ဆူညံစွာ ကခုန်ပျော်မြူးတာတွေ မလုပ်ကြဖို့ တော်လှန်ရေးအဖွဲ့တွေက သတိပေးထားပါတယ်။
ပြီးခဲ့တဲ့ ဧပြီ ၆ရက်ကလည်း ရွှေဘိုမြို့နယ်အနောက်ခြမ်း ဆင်အင်းရွာရှိ စစ်ရှောင်ကလေးငယ်တွေစာသင်ကြားနေတဲ့နေရာကို စစ်တပ်က လေကြောင်းတိုက်ခိုက်ခဲ့လို့ စာသင်ပေးတဲ့ သံဃာတစ်ပါးပျံလွန်ပြီး စစ်ရှောင်၂ဦး ဒဏ်ရာရခဲ့ပါတယ်။
