ကဖေး/People’s Spring
စစ်ကောင်စီနှင့် ကိုးကန့်တပ် (MNDAA)အပစ်ရပ်ပြီးနောက် လောက်ကိုင်နှင့် ချင်းရွှေဟော်နယ်စပ်ဂိတ်အပါအဝင် ရှမ်းပြည်နယ်မြောက်ပိုင်းရှိ MNDAA ထိန်းချုပ်ဒေသမှ နယ်စပ်ဂိတ်များအား တရုတ်ဘက်ကပြန်ဖွင့်လှစ်ပေးလိုက်ပြီး ဝ ဒေသမှ ကုန်စည်တင်သွင်းခွင့်ပြုလိုက်သည်။
MNDAAနှင့် စစ်ကောင်စီသည် တရုတ်နိုင်ငံ၊ ကူးမင်းမြို့တွင် ဇန်နဝါရီ ၁၆ ရက်ကစ၍ နှစ်ရက်တာတွေ့ဆုံဆွေးနွေးခဲ့ပြီးနောက် ဇန်နဝါရီ ၁၈ရက်စ၍ အပစ်ရပ်သဘောတူညီခဲ့သည်ဟု ယနေ့ (ဇန်နဝါရီ ၂၀ရက်)က ပြုလုပ်သည့် တရုတ်နိုင်ငံခြားရေးဝန်ကြီးဌာန သတင်းစာရှင်းလင်းပွဲတွင် သတင်းထုတ်ပြန်ခဲ့သည်။
ထို့နောက် လောက်ကိုင်နှင့်ချင်းရွှေဟော်နယ်စပ်ဂိတ်၊ ရန်လုံကျိုင်းဂိတ်တို့ကို တရုတ်ဘက်ကပြန်လည်ဖွင့်ပေးလိုက်ပြီး ကုန်စည်တင်သွင်းခွင့်ပြုလိုက်သည်ဟု ရှမ်းပြည်နယ်မြောက်ပိုင်းမှ ကုန်သည်သတင်းနှင့်အချို့က ပြောသည်။
Public Service Announcement
” အပစ်ရပ်ဆွေးနွေးပြီးတော့ ဒီနေ့ဖွင့်ပေးလိုက်တာ။ တင်သွင်းခွင့်ရတဲ့ ကုန်စည်တွေကိုတော့ကန့်သတ်ထားတယ်။ စမ်းတဝါးဝါးလုပ်နေရတဲ့ အနေအထားပဲ”ဟု ရှမ်းပြည်နယ်မြောက်ပိုင်းဒေသခံတစ်ဦးက ပြောသည်။
ထို့အပြင် “ဝ” ပြည်သွေးစည်း ညီညွတ်ရေး တပ်မတော် – UWSA ထိန်းချုပ်ဒေသနှင့် ဆက်စပ်နေသော MNDAA ထိန်းချုပ် ဒေသများသို့ ကုန်စည်များကိုလွတ်လပ်စွာ ကုန်သွယ်ခွင့်ပြုလိုက်သည်ဟု သတင်းရရှိသည်။
UWSAပြောရေးဆိုခွင့်ရှိသူတာဝန်ခံ ဦးညီရန်းက “တရုတ်ရဲ့ မူဝါဒ ဂိတ်ပိတ်မှုကြောင့် ကျွန်တော်တို့ ဝ ပြည်အတွင်းမှာ ဆီပြတ်လပ်မှုတချို့ကြုံခဲ့ပါတယ်။ ဒါပေမယ့် မနေ့ကစတင်ပြီး တရုတ်ကဂိတ်တွေပြန်ဖွင့်လို့ ဆီတွေလည်းတချို့ပြန်ဝင်နေကြပါပြီ။ အိမ်ဆောက်ပစ္စည်း တချို့လည်းဝင်လာကြပြီလို့တော့ သိရတယ်။ တခြားစက်ပစ္စည်းတွေတော့ မကြားသေးဘူး” ဟု “ဝ” လူငယ့်အသံကွန်ရက်ကိုပြောထားသည်။
တရုတ်သည် စစ်ကောင်စီအား တိုက်ခိုက်မှုများရပ်တန့်ရန် တိုင်းရင်းသားလက်နက်ကိုင်အဖွဲ့များအား ၂၀၂၄ ဩဂုတ်ကစ၍ ပေါ်ပေါ်ထင်ထင်ဖိအားပေးပြီး မြောက်ပိုင်းမဟာမိတ်သုံးဖွဲ့ထိန်းချုပ်ထားသည့် ရှမ်းပြည်နယ်မြောက်ပိုင်းမှ နယ်စပ်ဂိတ်များကို ပိတ်ဆို့ခဲ့သည်။ ထို့အပြင် ဝ ဒေသမှနေ၍ ရှမ်းပြည်နယ်မြောက်ပိုင်းအား ရိက္ခာဖြတ်တောက်ရန်လည်း UWSAကို အားဖိအားပေးခဲ့သည်။
မြောက်ပိုင်းမဟာမိတ်သုံးဖွဲ့အား ရှမ်းပြည်နယ်မြောက်ပိုင်းကို ထိန်းချုပ်၍မရစေရန် ရိက္ခာ၊ ဆေးဝါးနှင့် လူသုံးကုန်ပစ္စည်းများကို တရုတ်နှင့် စစ်ကောင်စီပေါင်း၍ ဖြတ်တောက်ခြင်းဟု ဝေဖန်ခံခဲ့ရသည်။
ယခုလည်း တရုတ်အစိုးရခွင့်ပြုချက်ရမှ ဝဒေသမှ MNDAA ထိန်းချုပ်ဒေသသို့ ကုန်စည်များလွတ်လပ်စွာ ကုန်သွယ်ခွင့်ရခြင်းသည် ဝနှင့် MNDAAအတွက် ဂုဏ်သိက္ခာကျစေသည်ဟု ဝေဖန်နေကြသည်။
