ဟန်နွေ/People’s Spring
စစ်ကောင်စီက လားရှိုးမြို့ လူနေရပ်ကွက်အတွင်း ပေါက်ကွဲအားပြင်းထန်သော ဗုံးများဖြင့် လေကြောင်းထပ်မံတိုက်ခိုက်ခဲ့ရာ ပြည်သူတစ်ဦး ထိခိုက်ဒဏ်ရာရခဲ့ကြောင်း လားရှိုးမြို့ခံသတင်းရင်းမြစ်က ပြောသည်။
အောက်တိုဘာ ၄ရက် ယနေ့နံနက်စော ၂နာရီ ၁၀မိနစ်ကစ၍ လားရှိုးမြို့ကို စစ်ကောင်စီက လေကြောင်း ဗုံးကြဲတိုက်ခိုက်ခဲ့ခြင်းဖြစ်သည်။
Public Service Announcement
နံနက် ၄နာရီ ၈မိနစ်၊ ၅နာရီ ၁၄နှင့် ၅နာရီ ၁၉ မိနစ်များတွင်လည်း ထပ်မံ၍ ဗုံးကြဲတိုက်ခိုက်ခဲ့ရာ တရုတ်ဘုံကျောင်း နှင့်နေအိမ် အဆောက်အဦးများစွာ ထိခိုက်ပျက်စီးခဲ့ဟု လားရှိုးမြို့ ပြန်လည်ထူထောင်ရေးဖေ့စ်ဘွတ်ခ် စာမျက်နှာက ထုတ်ပြန်သည်။
“ပြည်သူတစ်ယောက်ထိခိုက်ခဲ့ပါတယ်ရှင့်။ စစ်ကော်စီရဲ့ ပစ်မှတ်တွေက ပြည်သူတွေကိုပဲ ထိခိုက်နေတာမို့ လေကြောင်းတိုက်ခိုက်မှုကို ရပ်တန်းက ရပ်သင့်ပါတယ်လိုပပဲ ပြောချင်ပါတယ်”ဟု လားရှိုးမြို့ခံ မနော်ဖောက ပြောသည်။
ယခုကဲ့သို့ စစ်ကောင်စီဖက်မှ လားရှိုးမြို့ကို အကြမ်းဖက်ဆန်စွာ လေကြောင်းတိုက်ခိုက်မှု အကြိမ်ကြိမ်ပြုလုပ်နေခြင်းကြောင့် မြို့တွင်း၌ ပျက်စီးဆုံးရှုံးမှုများရှိခဲ့ပြီး ပြည်သူထိခိုက် သေဆုံးရမှုများပြားလာခဲ့ကြောင်း လားရှိုးမြို့ ပြန်လည်ထူထောင်ရေး ဖေ့စ်ဘွတ်ခ်စာမျက်နှာက တဆင့် အသိပေးသည်။
စစ်ကောင်စီက ယနေ့နံနက် လေကြောင်းတိုက်ခိုက်မှုကြောင့် ပျက်စီးမှုများအား တွေ့ရစဉ်။ ဓာတ်ပုံ – လားရှိုးမြို့ပြန်လည်ထူထောင်ရေး 
စစ်ကောင်စီက ယနေ့နံနက် လေကြောင်းတိုက်ခိုက်မှုကြောင့် ပျက်စီးမှုများအား တွေ့ရစဉ်။ ဓာတ်ပုံ – လားရှိုးမြို့ပြန်လည်ထူထောင်ရေး 
စစ်ကောင်စီက ယနေ့နံနက် လေကြောင်းတိုက်ခိုက်မှုကြောင့် ပျက်စီးမှုများအား တွေ့ရစဉ်။ ဓာတ်ပုံ – လားရှိုးမြို့ပြန်လည်ထူထောင်ရေး 
စစ်ကောင်စီက ယနေ့နံနက် လေကြောင်းတိုက်ခိုက်မှုကြောင့် ပျက်စီးမှုများအား တွေ့ရစဉ်။ ဓာတ်ပုံ – လားရှိုးမြို့ပြန်လည်ထူထောင်ရေး
ထို့အပြင် မြို့တွင်း၌ အင်တာနက်လိုင်းနှင့် ဖုန်းလိုင်းများပြတ်တောက်ပြီး နှစ်ရက်အကြာတွင် စစ်ကောင်စီဖက်မှ လေကြောင်းတိုက်ခိုက်မှု ထပ်မံပြုလုပ်ခဲ့ခြင်းဖြစ်သည်ဟု ဆိုသည်။
” စစ်ကောင်စီရဲ့ ရက်စက်ယုတ်မာတဲ့လေကြောင်းတိုက်ခိုက်မှုတွေက ပြည်သူတွေကိုသာ အဓိကအားဖြင့် ထိခိုက်ဆုံးရှုံးမှုတွေ ဖြစ်နေစေခဲ့ပါတယ်။ စစ်ရေးကာလအပြီးမှာ ပြန်လည် ထူထောင်ရေးလုပ်ငန်းတွေနဲ့ပုံမှန်လည်ပတ်ဖို့ကြိုးစားနေတဲ့လားရှိုးမြို့ကို အဖျက်သဘောဆောင်တိုက်ခိုက်နေမှုဟာ စစ်ကောင်စီရဲ့ ယုတ်မာမှုများစွာထဲကတစ်ခုအပါအဝင်ဘဲဖြစ်ပါတယ်။ ယခုကဲ့သို့တိုက်ခိုက်နေမှုကြောင့် မြို့နေပြည်သူများထိတ်လန့်နေကြရပြီး လေယာဉ်သံကို အမြဲနားစွင့်နေကြရတယ်”ဟု လားရှိုးမြို့ ပြန်လည်ထူထောင်ရေး ဖေ့စ်ဘွတ်ခ်စာမျက်နှာတွင် ရေးသားထားသည်။
ကိုးကန့်တပ်မတော်(MNDAA)က လားရှိုးမြို့ကိုဩဂုတ် ၃ရက်တွင် သိမ်းပိုက်ပြီးနောက် စစ်ကောင်စီက ဩဂုတ် ၃၀ရက်မှစ၍ လေကြောင်းတိုက်ခိုက်ခဲ့ခြင်းဖြစ်သည်။
ထို့နောက် စက်တင်ဘာတွင် လားရှိုးမြို့ကို ၉ကြိမ် လေကြောင်း တိုက်ခိုက်ခဲ့ပြီး ယခု အောက်တိုဘာလတွင် ထပ်မံတိုက်ခိုက်လာခြင်းဖြစ်သည်။
လေကြောင်းတိုက်ခိုက်မှုများကြောင့် အရပ်သား ၉ဦးထက်မနည်းသေဆုံးကာ ၅၀ဦးကျော် ဒဏ်ရာရရှိခဲ့ကြောင်း ဒေသခံက ပြောသည်။ MNDAAကမူ ဒေသခံ ၃ဦးသေဆုံးကာ ၅၀ ခန့် ဒဏ်ရာရရှိခဲ့ဟု အသိပေးထားသည်။
