ကချင်ပြည်နယ် ဖားကန့်မြို့တွင် စစ်ကောင်စီသတင်းပေး ဆယ်အိမ်မှူးဟောင်းတစ်ဦးကို လူတစ်စုက ဖမ်းဆီးသွားပြီးနောက် ခြောက်ရက်အကြာတွင် သေဆုံးနေသည့်ရုပ်အလောင်း ပြန်လည်တွေ့ရှိခဲ့သည်။
ဆိပ်မူရပ်ကွက် ဘွန်ဘရာကုန်းတွင်နေထိုင်သော ကျော်ငြိမ်းဆိုသူသည် နတ်မှော်ကျေးရွာလမ်းပေါ်တွင် ဖမ်းဆီးခရခြင်း ဖြစ်သည်။
“ ၃ရက်နေ့က အဖမ်းခံရတယ်။ ၈ရက်နေ့မှာ သူ့အလောင်းကို ဝှေခါနဲ့ ဆိပ်မူလမ်းခွဲမှာ တွေ့တယ်။ သူက စစ်ကောင်စီသတင်းပေးဖြစ်တယ်။ သူ့ကြောင့်အဖမ်းခံရသူတွေ ရှိတယ်” ဟု ဆိပ်မူကျေးရွာဒေသခံတစ်ဦးက ပြောသည်။
ကျော်ငြိမ်းသည် အသက်(၆၉)နှစ်အရွယ်ရှိပြီး ဆယ်အိမ်မှူးဟောင်းတစ်ဦးဖြစ်သလို စစ်ကောင်စီသတင်းပေးနေသူဟု ဒေသခံများက ပြောသည်။
“ အပြစ်မဲ့ပြည်သူတွေ အဖမ်းခံထားရတယ်။ ဒလန်တွေကြောင့် အဖမ်းခံရတာများတယ်။ဒလန်တွေ ရှင်းနိုင်မှ ပြည်သူတွေ သက်သာမယ်” ဟု ဖားကန့်ဒေသခံတစ်ဦးက ပြောသည်။
ဖားကန့်တွင် စစ်ကောင်စီတပ်က ဖွဲ့စည်းထားသည့် ပြည်သူ့စစ်အဖွဲ့တွင်ပါဝင်သလို ပျူစောထီးခေါင်းဆောင်တစ်ဦးလည်းဖြစ်သော အောင်နိုင်ဆိုသူသည် မော်ဝမ်းရပ်ကွက်၊ ရွှေစည်းစိမ်လက်ဖက်ရည်ဆိုင်ရှေ့တွင် မတ်လ ၄ရက် ညနေ ၅ နာရီခန့်က သေနတ်ဖြင့် ပစ်ခတ်ရှင်းလင်းခံရသေးသည်။
