ဒေသခံပြည်သူအများအပြား ထွက်ပြေးတိမ်းရှောင်နေရ
ပဲခူးခရိုင် ရွှေကျင်မြို့နယ်တွင် အကြမ်းဖက်စစ်ကောင်စီတပ်က ကျေးရွာများသို့ လက်နက်ကြီးများဖြင့် ရမ်းသမ်းပစ်ခတ်မှုကြောင့် ဒေသခံပြည်သူလေးဦး ထိမှန်ဒဏ်ရာရသွားကြောင်း ဒေသခံများက People’s Springသို့ ပြောသည်။
ညောင်လေးပင်မြို့နယ်ဘက်ခြမ်း ပုဇွန်မြောင် ကျေးရွာ၌ တပ်စွဲထားသော စစ်ကောင်စီတပ်များက ယမန်နေ့ (မတ်လ၈ ရက်)တွင် တိုက်ပွဲဖြစ်ပွားခြင်းမရှိဘဲ လက်နက်ကြီးများဖြင့် ရမ်းသမ်းပစ်ခတ်ခဲ့ရာ ရွှေကျင်ဘက်ခြမ်းရှိ သိုက်တူးကုန်း၊ ဝိုင်းနှင့် ကွင်းဒလကျေးရွာများသို့ ကျရောက်ပွဲကွဲခဲ့သည်ဟု ဆိုသည်။
လက်နက်ကြီးကျည်များ ကျရောက်ပေါက်ကွဲမှုကြောင့် သိုက်တူးကုန်းမှ ပြည်သူနှစ်ဦး၊ ဝိုင်းကျေးရွာမှ တစ်ဦးနှင့် ကွင်းဒလရွာမှ ပြည်သူတစ်ဦး လက်နက်ကြီးစထိမှန်ကာ ထိခိုက်ဒဏ်ရာရခဲ့ကြောင်း ဒေသခံများက ပြောသည်။
“ သူတို့က စစ်တောင်းမြစ်အနောက်ဘက်ကမ်း ပုဇွန်မြောင်မှာ အသေထိုင်ပြီးတော့ စစ်တောင်းမြစ်အရှေ့ဘက်ခြမ်းကရွာတွေကို ရမ်းသမ်းပြီး လှမ်းလှမ်းထုတာ။ ရွာတွေထဲ သွားပစ်တာမျိုး မဟုတ်ဘူး။ ပုဇွန်မြောင်ဆိုတဲ့ မြစ်အနောက်ဘက်ခြမ်းရွာကနေ ရွှေကျင်ဘက် ကမ်းနားနဲ့နီးတဲ့ရွာတွေကို လှမ်းပစ်တာ” ဟု ဒေသခံအမျိုးသမီးတစ်ဦးက People’s Spring သို့ ပြောသည်။
လက်ရှိအခြေအနေတွင် ရွှေကျင်မြို့နယ် စစ်တောင်းမြစ် ကြောတလျှောက်မှ သိုက်တူးကုန်း၊ ဝိုင်း၊ ကွင်းဒလ၊ ညောင်ပင်ကြီး စသည့်ကျေးရွာများမှ ဒေသခံပြည်သူရာနှင့်ချီ ထွက်ပြေးတိမ်းရှောင်နေကြရာ နေသူမဲ့ ပြည်သူပိုင်အိမ်များကို စစ်ကောင်စီတပ်များက ဖောက်ထွင်းခိုးယူမှုများကျူးလွန်နေသည့်အပြင် ဆိုင်ကယ်များကိုလည်း မီးရှို့ဖျက်ဆီးခဲ့ကြောင်း ၎င်းဒေသခံက ဆက် ပြောသည်။
အဆိုပါ ပုဇွန်မြောင်ရွာတွင် တပ်စွဲထားသော အကြမ်းဖက်စစ်ကောင်စီတပ်သားများသည် ပြီးခဲ့သည့် ဖေဖော်ဝါရီအတွင်းကလည်း ရွှေကျင်နှင့် ညောင်လေးပင်အစပ်မှ ကျေးရွာများသို့ လက်နက်ကြီးများဖြင့် ရမ်းသမ်းပစ်ခတ်မှု နှစ်ကြိမ်ထက်မနည်းရှိခဲ့ပြီး လက်နက်ကြီးထိမှန်မှုကြောင့် အမျိုးသမီးတစ်ဦးသေဆုံးကာ ခြောက်ဦးထ်မနည်း ထိခိုက်ဒဏ်ရာရခဲ့သည်။
