စစ်လက်နက်အသုံးအဆောင်များ သိမ်းဆည်းရမိ၊ ပျူစောထီးအဖွဲ့ဝင်၁၀ ဦးကျော်ကိုဖမ်းဆီးနိုင်ခဲ့
စစ်ကိုင်းတိုင်း၊ ကန့်ဘလူမြို့နယ်၊ ချပ်ကြီးကျေးရွာရှိ စစ်ကောင်စီတပ်နှင့် ပျူစောထီးစခန်းအား ဒေသတွင်း PDFများက သွားရောက်တိုက်ခိုက်ရာ စစ်အုပ်စုက ရဟတ်ယာဥ်ဖြင့် ပစ်ကူခဲ့သော်လည်း စစ်အုပ်စု ထိခိုက်သေဆုံးမှုများကြောင်း ဒေသတွင်းသတင်းရင်းမြစ်များက ပြောသည်။
ကန့်ဘလူမြို့နယ်မြောက်ခြမ်း ချပ်ကြီးရွာရှိ စစ်ကောင်စီနှင့်ပျူစောထီးစခန်းအား ခရိုင် PDF တပ်ရင်းများနှင့် ဒေသခံပြည်သူ့ကာကွယ်ရေးပူးပေါင်းတပ်ဖွဲ့များက မတ်လ ၂ ရက် နံနက်အစောပိုင်းတွင် ဝင်ရောက်တိုက်ခိုက်ခဲ့သည်။
ထိုနေ့ နံနက် ၈ နာရီခွဲခန့်တွင် စစ်ကောင်စီတပ်သည် တိုက်ပွဲဖြစ်ပွားသည့် ချပ်ကြီးရွာအနီးအား အနောက်မြောက်တိုင်းစစ်ဌာနချုပ်(နမခ)မှ Mi 35 တိုက်ခိုက်ရေး ရဟတ်ယာဥ် တစ်စီးဖြင့် လေကြောင်းပစ်ကူခဲ့ကြောင်း ဒေသတွင်းသတင်းရင်းမြစ်များက ပြောသည်။
ထို့အပြင် ညနေ ၃နာရီခန့်တွင် ချပ်သင်းတိုက်နယ်အရှေ့ဘက် ဝက်သအင်းရွာအနီးအား ကလေးမြို့မှလာသော Mi 35 တိုက်ခိုက်ရေးရဟတ်ယာဥ် တစ်စီးဖြင့် စစ်ကောင်စီတပ်မှ လေကြောင်းတိုက်ခိုက်မှု ထပ်မံပြုလုပ်ခဲ့ကြောင်း ဒေသခံများက ပြောသည်။
ကန့်ဘလူမြို့နယ် ချပ်ကြီးကျေးရွာတွင် မတ်လ ၂ ရက်က ဖြစ်ပွားခဲ့သော ထိတွေ့တိုက်ပွဲဖြစ်စဥ်အတွင်း ပြည်သူ့ကာကွယ်ရေးပူးပေါင်းတပ်များမှ ရဲဘော် နှစ်ဦး အသက်အန္တရာယ်မစိုးရိမ်ရ ဒဏ်ရာရရှိခဲ့ကာ စစ်ကောင်စီနှင့်ပျူစောထီးဘက်မှ ၄၀ခန့် ထိခိုက်သေဆုံးခဲ့သည့်အပြင် စစ်လက်နက်အသုံးအဆောင်များ သိမ်းဆည်းရမိခဲ့ကြောင်း ကန့်ဘလူPDFအဖွဲ့များ၏ သတင်းများထုတ်ပြန်လေ့ရှိသည့် Infinity Groupက ဖော်ပြသည်။
“ PDF တွေနဲ့ ဒေသခံ ပကဖတွေက ချပ်ကြီးရွာမှာရှိတဲ့ စကစအထိုင်စခန်းကို ဝင်သိမ်းလိုက်တာပါ။ လက်နက်တွေနဲ့ ဖမ်းမိတဲ့တရားခံတွေရလိုက်တယ်။ ဖမ်းမိတာက ပျူစောထီးအဖွဲ့တွေပါ။ ၁၁ဦးလောက်ရှိတယ်လို့သိရတယ်။” ဟု ကျွန်းလှကန့်ဘလူတက်ကြွလှုပ်ရှားသူများအဖွဲ့(ကန့်ဘလူခရိုင်) တာဝန်ခံတစ်ဦးက ပြောသည်။
မတ်လ ၂ ရက်က ချပ်ကြီးကျေးရွာတွင်ဖြစ်ပွားခဲ့သော နှစ်ဖက်ထိတွေ့တိုက်ပွဲဖြစ်စဥ်အတွင်း အရပ်သားသေဆုံးမှုအချို့ရှိခဲ့သည်ဟု သိရပြီး အတည်ပြုနိုင်ခြင်း မရှိသေးပေ။
စစ်ကောင်စီတပ်နှင့်ပျူများသည် မတ်လ ၂ ရက်နှင့် ၃ ရက်က ဖလားရရွာ၊ ကံကြီးရွာနှင့် ပုဏ္ဏားကြီးရွာတို့မှ စစ်ဘေးရှောင် တဲ ၂၂ လုံးအား မီးရှို့ဖျက်ဆီးကာ နွား ၃၆ ကောင်ထက်မနည်း အတင်းအဓမ္မ လုယူသွားခဲ့သည်။
ထို့အပြင် မတ်လ ၄ ရက် နံနက်ပိုင်းတွင် စစ်ကောင်စီတပ်နှင့်ပျူများသည် အောက်တဲကျေးရွာမှ နေအိမ် နှစ်လုံး၊ ပင့်သာ(တည်ပင်)ရွာရှိ နေအိမ် ၅၁လုံးနှင့် လယ်ယာသုံးပစ္စည်းများအား မီးရှို့ဖျက်ဆီးသွားကြောင်း ဒေသခံများက ပြောသည်။
ကန့်ဘလူမြို့ (၆၀၀၆)တင့်ကားတပ်ရင်းမှ စစ်ကောင်စီတပ်သည် ကန့်ဘလူမြို့၏ မြောက်ဘက်၊အရှေ့ဘက်နှင့်တောင်ဘက် အရပ်မျက်နှာများသို့ ဦးတည်ကာ မတ်လပထမအပတ်မှစ၍ လက်နက်ကြီးဖြင့် ပစ်ခတ်နေသည်မှာ အကြိမ်ရေ ၃၀ ခန့် ရှိနေပြီဖြစ်ကြောင်း သိရသည်။
ထိုသို့ လက်နက်ကြီးဖြင့် ပစ်ခတ်မှုကြောင့် ကန့်ဘလူမြို့နယ်တောင်ခြမ်း အင်းလယ်ကြီးကျေးရွာအတွင်း နှစ်လုံးနှင့် မဲသည်ကျေးရွာအတွင်း တစ်လုံး ကျရောက်ပေါက်ကွဲခဲ့ကာ အင်းလယ်ကြီးရွာ နေအိမ် တစ်လုံး ပျက်စီးခဲ့ကြောင်း ဒေသခံများက ပြောသည်။
ပြီးခဲ့သည့် ဖေဖော်ဝါရီအတွင်းကလည်း စစ်ကောင်စီတပ်သည် (၆၀၀၆) တင့်ကားတပ်ရင်းအထိုင်မှနေ၍ ကန့်ဘလူမြို့နယ် အရှေ့ခြမ်းနှင့်တောင်ခြမ်းကျေးရွာများသို့ ဦးတည်ကာ လက်နက်ကြီးဖြင့် ၁၀ကြိမ်ထက်မနည်းပစ်ခတ်ခဲ့သေးသည်။
