သြစတြေးလျနိုင်ငံ၊ ဘရစ္စဘိန်း၌ ပြုလုပ်မည့် (၁၁)ကြိမ်မြောက် BirdLife Australia မိတ်ဖက်များအစည်းအဝေးသို့ စစ်ကောင်စီ၏ ကိုယ်စားလှယ်များကို တက်ရောက်ခွင့်ပေးမည်မဟုတ်ကြောင်း သိရသည်။
သြစတြေးလျ သဘာဝပတ်ဝန်းကျင်နှင့်ရေ ဝန်ကြီးဌာနက NUG ၏ သြစတြေးလျနိုင်ငံဆိုင်ရာကိုယ်စားလှယ်ထံ အကြောင်းပြန်သောစာ၌ မြန်မာစစ်ကောင်စီလက်အောက်ခံ သဘာဝသယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာနမှ ကိုယ်စားလှယ်များကို အထက်ပါအစည်းအဝေးသို့ တက်ရောက်ခွင့်ပေးမည်မဟုတ်ကြောင်းနှင့် အစည်းအဝေးတက်ရောက်ရန် ဖိတ်ကြားမှုတွင်သြစတြေးလျအစိုးရ၊ BirdLife Autralia တို့မည်သို့မျှပါဝင်ပတ်သက်မှု မရှိကြောင်း ဖော်ပြသည်။
NUG သြစတြေးလျနိုင်ငံဆိုင်ရာ ကိုယ်စားလှယ် ဒေါက်တာထွန်းရွှေက မြန်မာစစ်ကောင်စီကိုယ်စားလှယ်များကို ဘရစ္စဘိန်း၌ ပြုလုပ်မည့်အစည်းအဝေးသို့ ဖိတ်ကြားထားမှုနှင့်ပတ်သက်၍ သြစတြေးလျအစိုးရထံ တရားဝင်ကန့်ကွက်စာပေးပို့ခဲ့ခြင်းဖြစ်သည်။
ကန့်ကွက်စာကို အကြောင်းပြန်မှုတွင် သြစတြေးလျအစိုးရသည် မြန်မာနိုင်ငံအတွင်း အခြေအနေဆိုးရွားနေမှုနှင့် စစ်ကောင်စီကျူးလွန်နေသော လူ့အခွင့်အရေးချိုးဖောက်မှုများ၊ အကြမ်းဖက်မှုများကို ဆက်လက်စိုးရိမ်ပူပန်ကြေောင််း ဖော်ပြသည်။
ထို့အပြင် သြစတြေးလျအစိုးရသည် စစ်ကောင်စီ၏ လူမဆန်သောအပြုအမှုများကို ဒေသတွင်း၊ နိုင်ငံတကာအသိုက်အဝန်းနှင့် သဘောထားချင်းတူညီသည့် မိတ်ဖက်များနှင့်ပူးပေါင်းကာ ပြင်းထန်စွာ ကန့်ကွက်ရှုတ်ချကြောင်း ဖော်ပြသည်။
သြစတြေးလျသည် ဒီမိုကရေစီမြှင့်တင်ဆောင်ရွက်နေသူများနှင့်ထိတွေ့ကာ တွေ့ဆုံဆွေးနွေးကို တွန်းအားပေးခြင်းများမှတဆင့် အပါအဝင် မြန်မာ့ဒီမိုကရေစီအသွင်ကူးပြောင်းရေးလမ်းကြောင်းပေါ် ပြန်လည်ရောက်ရှိရေးအတွက် မြန်မာနိုင်ငံကို ဆက်လက်ပံ့ပိုးကူညီမည့်ကတိကဝတ်ကို ထပ်လောင်းအတည်ပြုသည်။
သြစတြေးလျနိုင်ငံခြားရေးနှင့် ကုန်သွယ်ရေးဝန်ကြီးဌာနအနေဖြင့်လည်း အမျိုးသားညီညွတ်ရေးအစိုးရ NUG ကိုယ်စားလှယ်များ၊ အတိုက်အခံဒီီမိုကရေစီအင်အားစုများနှင့် ပုံမှန်ထိတွေ့ဆက်ဆံ ဆွေးနွေးမှုရှိသည်ဟု အထက်ပါ အကြောင်းပြန်စာ၌ ဖော်ပြသည်။
