လက်နက်ခဲယမ်းနှင့် ရိက္ခာအချို့သိမ်းဆည်းရမိ
မကွေးတိုင်း၊ မြိုင်မြို့သို့ ရိက္ခာပို့လာသည့် စစ်ကောင်စီတပ်သားများနှင့် ပျူစောထီးအဖွဲ့အား တိုက်ခိုက်ရာ ခြောက်ဦးသေဆုံးပြီး လက်နက်ခဲယမ်းနှင့် ရိက္ခာအချို့သိမ်းဆည်းရရှိကြောင်း အဆိုပါ တိုက်ပွဲတွင်ပါဝင်ခဲ့သော ရဲဘော်တစ်ဦးက ပြောသည်။
တိုက်ပွဲမှာ ဖေဖော်ဝါရီ ၄ရက်က ပခုက္ကူခရိုင် အမှတ်(၆) တပ်ရင်း၊ အမှတ်(၂)တပ်ရင်းနှင့် အမှတ် (၇) တပ်ရင်းတို့မှ ပူးပေါင်း၍ ကြားဖြတ်တိုက်ခိုက်ခဲ့ခြင်းဟု ပခုက္ကူခရိုင်အမှတ် (၆)တပ်ရင်းက ယနေ့ ထုတ်ပြန်သည်။
စစ်ကောင်စီဘက်မှ ခြောက်ဦးထက်မနည်းသေဆုံးပြီး လက်နက်ခဲယမ်းနှင့် ရိက္ခာအချို့သိမ်းဆည်းရခဲ့သည်ဟု ဆိုသည်။
“ နှစ်ဖက်ညှပ်အနေအထားကနေ ရအောင်တိုက်ခဲ့တာဆိုတော့ အန္တရာယ်တော့များတယ်။ ဒါပေမယ့် ဖြစ်အောင်လုပ်ခဲ့တာပဲ” ဟု အဆိုပါ တိုက်ပွဲတွင်ပါဝင်ခဲ့သော ရဲဘော်တစ်ဦးက ပြောသည်။
ပူးပေါင်းတပ်မှ ရဲဘော်များ အထိအခိုက်မရှိ ပြန်လည်ဆုတ်ခွာနိုင်ခဲ့ကြောင်း အသိပေးသည်။
တော်လှန်ရေးကာလ ကြာမြင့်လာချိန်တွင် တပ်ဖွဲ့အချင်းချင်း ပူးပေါင်းလုပ်ဆောင်နိုင်မှုများလည်းပိုမိုကောင်းမွန်လာပြီး ယခင်ကထက်ပိုမိုစည်းစနစ်ကျစွာ တိုက်ပွဲများဖော်ဆောင်လာနိုင်ပြီဟု ထုတ်ပြန်ချက်၌ ဖော်ပြသည်။
