Bir sıra Avropa ölkələrinin hakimiyyət orqanları son vaxtlar İsrail-Fələstin münaqişəsinin kəskinləşməsi fonunda Fələstinə dəstək nümayişlərinə qadağalar və məhdudiyyətlər elan edib.
Eyni zamanda, bu dövlətlərdə İsrailyönlü hərəkətlərin qarşısını almaq üçün oxşar tədbirlər tətbiq edilməyib.
Fələstin həmrəyliyi yürüşləri polisin yaxından nəzarəti altında keçirilir. Hüquq-mühafizə orqanlarının əməkdaşları hakimiyyətin icazə verdiyi marşrutdan çıxan mitinq iştirakçılarının saxlanılması ilə bağlı xəbərdarlıq edir. Təhlükəsizlik qüvvələri tərəfindən bu cür mitinqlərin zorakılıqla dağıdılması, o cümlədən gözyaşardıcı qazdan istifadə halları qeydə alınıb.
Gununsesi.info xəbər verir ki, oktyabrın 14-də Londonda on minlərlə insan Fələstinlə həmrəylik nümayiş etdirmək və Britaniya hökumətinin İsrailin fələstinlilərin hüquqlarını pozmasına məhəl qoymamasına etiraz etmək üçün BBC-nin baş qərargahı qarşısına toplaşıb.
Paytaxt polisi aksiyanın təşkilatçılarına xəbərdarlıq edib ki, mitinqin icazə verilən marşrutunu pozan və yürüşü İsrail səfirliyinə köçürməyə cəhd edən iştirakçılar saxlanılacaq.
London polisinin məlumatına görə, aksiya zamanı 15 nəfər nəzarətə götürülüb.
Bundan əvvəl Böyük Britaniyanın daxili işlər naziri Suella Braverman deyib ki, “bir sıra hallarda” ölkənin küçələrində Fələstin simvollarının görünməsi qanun pozuntusu sayıla bilər. Bununla belə, London sakinləri departamentin qadağalarına məhəl qoymayıblar – Britaniya paytaxtının küçələri Fələstin bayraqları olan insanlarla dolu olub.
Fransada Fələstinlə həmrəylik nümayişləri Paris, Strasburq, Lion və Marseldə yerli hakimiyyət orqanları tərəfindən “ictimai asayişi pozma riski yaratdığı” səbəbilə dəfələrlə qadağan edilib.
Lakin qadağalara baxmayaraq, ölkənin şəhərlərində Fələstin əhalisinə dəstək nümayişləri keçirilib. Polis Strasburq, Marsel və Lionda ümumilikdə 20-yə yaxın etirazçını saxlayıb.
Fransa hökuməti bütün ölkəyə daha da yayılmaqdan qorxaraq, ictimai asayişi poza biləcəyini əsas gətirərək, oktyabrın 12-də çıxardığı fərmanla “bütün Fələstin tərəfdarı nümayişləri” qadağan edib.
İsrail-Fələstin münaqişəsinin son gərginliyi fonunda Berlin polisi oktyabrın 11-dən bəri fələstinlilərlə həmrəylik nümayişlərinə icazə verməyib.
Lakin qadağaya baxmayaraq, bir qrup etirazçı oktyabrın 14-də Brandenburq qapısının qarşısındakı meydana toplaşıb. Hüquq-mühafizə orqanlarının əməkdaşları səsgücləndiricilərdən istifadə edərək fəalların ərazini tərk etmələrini tələb ediblər. Mitinq iştirakçıları arasında həbslər olub.
Amsterdamın Dam meydanında Fələstin tərəfdarı olan nümayişdə polis 3 nəfəri saxlayıb.
15 min nəfərlik etiraz aksiyası iştirakçıları şəhərin qərbində yerləşən Vesterparka doğru yürüş ediblər.
Nümayişin İkinci Dünya Müharibəsi zamanı nasistlərin antisemit basqınlarının keçirildiyi Amsterdamın köhnə yəhudi məhəlləsindəki Jonas Daniel Meyer meydanında başa çatması planlaşdırılırdı. Lakin Hollandiya hakimiyyətinin təzyiqi ilə marşrut dəyişdirilərək Vesterparka yönləndirilib.
Hollandiyanın baş naziri Mark Rutte daha əvvəl bildirib ki, bələdiyyələrin HƏMAS-a dəstək nümayişlərinə müdaxilə etmək hüququ var.
İsveçrədə Fələstinə dəstək nümayişləri gücləndirilmiş təhlükəsizlik tədbirləri altında keçirilib. Mitinqlər Bern və Cenevrədə keçirilib, Bazel və Sürix hakimiyyəti Fələstin tərəfdarı nümayişlərin təşkilini qadağan edib.
Səid Əhmədli
Gununsesi.info
