İşğal altında olan Şərqi Qüdsdə “Anadolu” agentliyinin fotoqrafı Mustafa Harufa hücumda iştirak edən iki İsrail polisi vəzifələrinə bərpa edilib.
İsrail Jurnalistlər Birliyi İsrail polisinin bu qərarını pisləyib.
Gununsesi.info xəbər verir ki, təşkilatın bəyanatında deyilir: “İstintaqın hələ də davam etməsinə baxmayaraq, İsrail polisinin fotojurnalist Mustafa Harufu vəhşicəsinə döyən zabitləri yenidən əraziyə yeritmək qərarı qalmaqallı və qəbuledilməzdir.
Müraciətdə Harufun peşə borcunu yerinə yetirərkən polis tərəfindən döyüldüyü vurğulanır.
Birlik qeyd edib ki, İsrail polisinin rəhbərliyi sözügedən zabitlərə sərt intizam tənbehləri tətbiq etmək əvəzinə, öz vəzifələrinə bərpa etməklə “jurnalistlərin qanının heç bir dəyəri olmadığını” açıq şəkildə nümayiş etdirib.
Bəyanata görə, İsrail Jurnalistlər Birliyi “ədaləti təmin etmək üçün səylərini davam etdirmək” niyyətindədir. Bəyanatda deyilir: “Polis mətbuat azadlığını qorumalı və zorakılığa əl atan polis cəzalandırılmalıdır.
Bundan əvvəl İsrail təhlükəsizlik qüvvələri Şərqi Qüdsdə işləyən Anadolu Agentliyinin fotomüxbiri Mustafa Harufu vəhşicəsinə döyüb.
Jurnalist peşə borcunu yerinə yetirərkən hücuma məruz qalıb. Jurnalist xəstəxanaya yerləşdirilib.
Hadisə dekabrın 15-də jurnalist İsrail hökumətinin müsəlmanların ziyarətgahına girişinə məhdudiyyətlər qoyduğu üçün Əl-Əqsa məscidinin yaxınlığındakı Vadi əl-Cəuz bölgəsində namaz qılmaq üçün toplaşan bir qrup fələstinlini lentə alarkən baş verib.
İsrail polisi bölgədə maneələr qurub. Polis əvvəlcə Harufa silah tuşlayıb, sonra onu yerə yıxaraq təpikləməyə başlayıb.
Müxbir üzündən ağır xəsarətlər alıb. O, Şərqi Qüdsdəki Maqasid xəstəxanasına yerləşdirilib.
İsrail polisi Harufun yanında olan operator Faiz Əbu Rumailəyə də hücum edib.
İsrailin Milli Təhlükəsizlik naziri İtamar Ben-Qvir dəstək əlaməti olaraq Anadolu Agentliyinin fotomüxbirinə hücum edən İsrail polisini ziyarət edib.
Gununsesi.info
