Qəzza zolağında hər dörd ailədən birindən çoxu hazırda həddindən artıq aclıq yaşayır və adekvat qidalanma, təmiz su, səhiyyə xidmətləri və kanalizasiyaya çıxış bərpa olunmasa, aclıq riski ilə üzləşir.
Gununsesi.info xəbər verir ki, bu barədə İnteqrasiya edilmiş Qida Təhlükəsizliyi Mərhələ Təsnifatı (IPC) adlı yeni hesabatda deyilir.
Müvafiq material təşkilatın saytında yerləşdirilib.
IPC beynəlxalq səviyyədə qəbul edilmiş elmi standartlara uyğun olaraq aclıq böhranlarının şiddətini və əhatə dairəsini müəyyən etmək üçün məlumatları təhlil edən çoxtərəfli platformadır.
Ümumdünya Ərzaq Proqramı (ÜƏP), digər BMT agentlikləri və qeyri-hökumət təşkilatlarının məlumatları da daxil olmaqla Qəzzada ərzaq təhlükəsizliyinin son təhlili Qəzzanın bütün əhalisinin – təxminən 2,2 milyon insanın – böhran və ya kəskin ərzaq böhranı içərisində olduğunu təsdiqləyib. BMT-nin hesabatında həmçinin vurğulanır ki, Qəzzalıların 26%-i (576,600 nəfər) qida ehtiyatlarını və mübarizə imkanlarını tükəndirib və fəlakətli aclıq və aclıq təhlükəsi ilə üzləşib.
“BMT-nin Ümumdünya Ərzaq Proqramı həftələrdir ki, gələcək fəlakət barədə xəbərdarlıq edir. Təəssüf ki, çağırdığımız təhlükəsiz və davamlı giriş olmadan vəziyyət çıxılmazdır və Qəzzada heç kim aclıqdan təhlükəsiz deyil”, – ÜƏP-nin icraçı direktoru Sindi Makkeyn bildirib.
Qəzzada mövcud gərgin münaqişə vəziyyəti və məhdud humanitar çıxış davam edərsə, növbəti altı ay ərzində aclıq təhlükəsi yarana bilər.
İnsanlar Ümumdünya Ərzaq Proqramı işçilərinə deyirdilər ki, onlar tez-tez bütün günlər yeməksiz qalıblar və bir çox böyüklər uşaqlar yemək yeyə bilmək üçün ac qalıblar.
Təşkilatın baş iqtisadçısı Arif Hüseyn deyib: “Bu böhranın mürəkkəbliyi, miqyası və sürəti misilsizdir”.
Ümumdünya Ərzaq Proqramının icraçı direktoru Sindi Makkeyn Qəzzada atəşkəsə ehtiyac olduğunu bir daha vurğulayır: “Biz insanların ac qalmasını seyr edə bilmərik. Təchizatların Qəzzaya daxil olmasını və mülki şəxslərin həyat qurtaran yardımı təhlükəsiz şəkildə ala bilməsini təmin etmək üçün indi humanitar çıxış lazımdır. ÜƏP bir daha humanitar atəşkəsə çağırır – dünya insanların həyatını xilas etmək üçün birləşməlidir”.
Gununsesi.info
