Yeni bir araşdırmaya görə, banan və brokoli kimi qidalarda olan kaliumun qəbulunu artırmaq, duz qəbulunu azaltmaqdansa, yüksək təzyiqi azaltmaqda daha təsirli ola bilər.
Gununsesi.info xarici mediaya istinadən xəbər verir ki, Kanadanın Waterloo Universitetində aparılan yeni bir araşdırma, pəhrizdə kalium və natrium nisbətinin artırılmasının yüksək təzyiqi azaltmaqda tək natrium (duz) azaltmaqdan daha təsirli ola biləcəyini təsbit etdi. Araşdırma aparan qrup banan və brokoli kimi kaliumla zəngin qidaların qan təzyiqinə müsbət təsir göstərə biləcəyini vurğuladı.
Dünyada yetkin əhalinin 30 faizindən çoxunu təsir edən yüksək qan təzyiqi ürək xəstəliyi və insult kimi ciddi sağlamlıq problemlərinin əsas səbəblərindən biridir . Böyrək çatışmazlığı, ürək ritminin pozulması və demans kimi vəziyyətlərə də yol aça bilər.
Tətbiqi riyaziyyat, kompüter elmləri, əczaçılıq və biologiya professoru Anita Layton, “Yüksək qan təzyiqimiz olanda bizə çox vaxt daha az duz istehlak etməyi məsləhət görürük. Bununla belə, araşdırmalarımız göstərir ki, kaliumla zəngin qidaların diyetə əlavə edilməsi daha təsirli ola bilər”.
Tədqiqatın aparıcı müəllifi Melissa Stadt, “İlkin insanlar çoxlu meyvə və tərəvəz yeyirdilər, buna görə də bədənimiz yüksək kalium və aşağı natrium pəhrizində işləmək üçün təkamül etmiş ola bilər” deyib. Stadt deyir ki, müasir Qərb pəhrizləri çox vaxt natriumda yüksək və kaliumda aşağıdır, bu da yüksək qan təzyiqinin sənayeləşmiş cəmiyyətlərdə niyə daha çox yayıldığını izah edə bilər.
Riyazi modellər vasitəsilə aparılan araşdırma, cinsiyyətin də bu qarşılıqlı əlaqəyə təsir etdiyini ortaya çıxarıb. Tapıntılara görə, kişilər yüksək təzyiqə daha çox meyllidirlər, lakin kalium/natrium nisbəti artdıqda bu dəyişiklikdən qadınlara nisbətən daha çox faydalana bilərlər.
Tədqiqatçılar bu cür riyazi modellər sayəsində müxtəlif faktorların insan orqanizminə təsirlərinin sürətli, iqtisadi və etik üsullarla araşdırıla biləcəyinə diqqət çəkirlər.
