ABŞ yaxın bir neçə ayın kritik olacağı üçün Ukraynaya yardımla bağlı qərarın mümkün qədər tez qəbul edilməsinin vacibliyini bəyan edib.
Gununsesi.info xəbər verir ki, bunu ABŞ Milli Təhlükəsizlik Şurasının strateji kommunikasiyalar üzrə koordinatoru Con Kirbi deyib.
Onun sözlərinə görə, müharibə başlayandan bəri Ağ Ev ardıcıl olaraq Konqres üzvlərinə Ukraynanın döyüş meydanında uğur qazanmasına yardım etmək üçün konkret olaraq nələr edildiyini və gələcəkdə nə etmək lazım olduğunu bildirib.
“Biz bu mövzuya qarışıb bütün bunları burada, mikrofonlarda şərh edə bilərik, lakin növbəti bir neçə ay Ukrayna üçün kritik olacaq”, – Kirbi vurğulayıb.
Nümayəndələr Palatasının spikeri Mayk Consonun Ukrayna siyasətində dəqiq müəyyən edilmiş məqsədlərin olmaması ilə bağlı tənqidi ilə bağlı suala cavab verən Kirbi qeyd edib ki, Ağ Evdə aydın məqsəd – Ukraynanın qələbəsi ilə bağlı baxış var.
“Biz Ukraynanın bu müharibədə qalib gəlməsini istəyirik. Prezidentin dediyi kimi, biz Ukraynanın bütöv, firavan və suveren olmasını istəyirik. İstəyirik ki, Putin də daxil olmaqla, hamı Ukraynanın beynəlxalq sərhədlərini tanısın. Və biz Ukraynanı bununla da təmin etməkdə davam etmək istəyirik. onun bu nəticələrə nail ola bilməsi üçün hər cür dəstəyə ehtiyacı var”, – deyə o bildirib.
ABŞ administrasiyasının sözçüsü əlavə edib ki, cəbhə xətti hər iki tərəfdən ciddi şəkildə dəyişməsə də, Ukraynada aktiv döyüşlər davam edir.
“Ukraynalı komandirlər, başa düşülən şəkildə, hansı silahlardan, hansı döyüş sursatından, hansı raketlərdən istifadə etdiklərinə dair olduqca çətin qərarlar qəbul etməlidirlər. Çünki onlar növbəti tədarüklərin nə vaxt olacağını bilmirlər. Və bu, dəhşətli vəziyyətdir”, – Kirbi deyib.
KİV-in məlumatına görə, Amerika prezidenti Co Baydenin əsas köməkçiləri Konqresdə qapalı iclasda xəbərdarlıq ediblər ki, Ukraynaya əlavə hərbi yardımın təsdiqi olmadan cəbhədə ciddi çətinliklər yarana bilər.
Xatırladaq ki, Co Bayden çərşənbə günü ABŞ Konqresinin rəhbərləri və müvafiq komitələrin rəhbərləri ilə görüş keçirərək, Ukraynaya gələcək yardım üçün maliyyənin daha tez ayrılmasına çağırıb. Senatın gələn həftə cənub sərhədlərinin təhlükəsizliyinə dair razılaşma və Ukrayna üçün maliyyə məsələlərinə baxacağı gözlənilir.
Xatırladaq ki, layihə Ukraynaya dəstək üçün 60 milyard dollardan çox, İsrailə 14 milyard dollar və cənub sərhədində qeyri-qanuni miqrasiya ilə mübarizə tədbirləri üçün eyni məbləğdə vəsait nəzərdə tutur.
Ağ Ev daha əvvəl bəyan etmişdi ki, ABŞ Konqresi tərəfindən qəbul edilənə qədər Ukraynaya yeni hərbi dəstək üçün artıq pulu yoxdur.
Gununsesi.info
