ABŞ əsgərləri girovluqda olan həmvətənlərini azad etmək üçün Qəzza zolağına yerləşdirilə bilər.
Gununsesi.info xəbər verir ki, Ağ Evin Milli Təhlükəsizlik Şurasının (MTŞ) strateji kommunikasiyalar üzrə koordinatoru Con Kirbinin “Fox News” telekanalına müsahibəsində hadisələrin bu cür inkişafının mümkünlüyü istisna edilməyib.
O, teleaparıcının Ağ Evin Qəzza zolağında ABŞ quru bölmələrinin istifadəsini tamamilə istisna edib-etmədiyini soruşduqda, “Girovluqda olan vətəndaşlarımızın evlərinə qaytarılmasına gəldikdə heç nəyi istisna etməyəcəyəm” deyib.
Bununla belə, Kirbi qeyd edib ki, Ağ Evin Fələstin-İsrail münaqişəsində iştirak etmək üçün Amerika qoşunlarını göndərmək kimi “heç bir planı və ya niyyəti yoxdur”. O, həmçinin qeyd edib ki, ABŞ prezidenti Co Bayden administrasiyası Qəzza zolağında amerikalı girovlar məsələsi üzərində “saatbaşı işləyir”. “Bu, prezidentin ən yüksək prioritetidir. Onun üçün xaricdə girov saxlanılan amerikalıların təhlükəsizliyi və təhlükəsizliyindən daha vacib heç nə yoxdur. Biz onları ailələrinə qovuşdurana qədər dayanmayacağıq”, – Kirbi əlavə edib.
Daha əvvəl CNN mənbələrə istinadən xəbər vermişdi ki, ABŞ genişmiqyaslı təxliyə və humanitar yardım göstərməyə qadir olan 2 mindən çox dəniz piyadasından ibarət 26-cı Dəniz Ekspedisiya Qüvvələrinin İsrail yaxınlığında mümkün yerləşdirməyə hazırlaşır. CNN qeyd etdiyi kimi, bölmə hazırda “Bataan” gəmisinin göyərtəsindədir.
Səid Əhmədli
Gununsesi.info
