ရုရှားနိုင်ငံက ဆပ်ကပ်တစ်ခုမှာ ကျားတစ်ကောင် လွတ်မြောက်လာပြီး လူအုပ်ထဲ ခုန်ဝင်ခဲ့တဲ့ ဖြစ်ရပ်ကို အာဏာပိုင်တွေက စုံစမ်း စစ်ဆေးနေပါတယ်။
အဲဒီ ရင်ထိတ်စရာ ဖြစ်ရပ်ဟာ ရော့စတော့ဗ်အွန်ဒွန်မှာ ဧပြီ ၁၉ ရက်နေ့က ဖြစ်ပွားခဲ့တာလို့ သိရပါတယ်။ ဆပ်ကပ် စင်မြင့်မှာ ကျားတွေကို ပရိသတ်တွေနဲ့ ခြားထားတဲ့ လုံခြုံရေး ပိုက်ကွန်က ပြဿနာ တစ်ခုခုကြောင့် ရုတ်တရက် ပြုတ်ကျသွားရာက ကျားကြီးတစ်ကောင်ဟာ ခုန်ထွက်ပြီး လွတ်မြောက်သွားတာ ဖြစ်ပါတယ်။
ကျားက ပရိသတ်တွေဖက် ခုန်ထွက်သွားတဲ့ ဗီဒီယိုဟာ လူမှုကွန်ရက် သုံးစွဲသူတွေကြားမှာ အတော်လေး ပျံ့နှံ့ပြီး လူပြောများခဲ့ပါတယ်။
ဗီဒီယိုထဲမှာတော့ ကျားတွေဟာ စက်ဝိုင်းပုံ စင်မြင့်ပေါ်မှာ သူတို့ကို လေ့ကျင့်ကိုင်တွယ်ပေးထားတဲ့ အမျိုးသမီးနဲ့အတူ ရှိနေခဲ့တာကို တွေ့ရပါတယ်။ ပိုက်ကွန်က ပြုတ်ကျသွားပြီး ပြန်ဆွဲမတင်နိုင်ခင် စက္ကန့်ပိုင်းလေးမှာ ကျားတစ်ကောင်က အပြင်ကို ခုန်ထွက်သွားခဲ့တာပါ။
Public Service Announcement
ကျားကြီး ခုန်ဝင်လာတဲ့အချိန် လူတွေကြားထဲက အထိတ်တလန့် အော်ဟစ်ကြတဲ့ အသံတွေကိုလည်း ဗီဒီယိုထဲမှာ ကြားနေခဲ့ရပါတယ်။
နောက်ထပ် ဗီဒီယို တစ်ခုမှာတော့ အဲဒီကျားကို ဆပ်ကပ်ဝန်ထမ်း တစ်ဦးက ထွက်ပေါက်ဖက် လမ်းညွှန်ခေါ်ဆောင်သွားဖို့ ကြိုးစားနေခဲ့ပြီး ကလေးတွေ အပါအဝင် ပရိသတ်တွေက စိုးရိမ်တကြီး စောင့်ကြည့်နေတာကို တွေ့ခဲ့ရပါတယ်။
ပြီးတော့ အသံချဲ့စက်ကလည်း ပရိသတ်တွေ အနေနဲ့ စိတ်ငြိမ်ငြိမ်ထားပြီး အခြေအနေ ဆိုးမသွားအောင် ကူညီကြဖို့ တိုက်တွန်းနေခဲ့ပါတယ်။ နောက်ဆုံးမှာတော့ ဆပ်ကပ် ဝန်ထမ်းတွေဟာ ကျားကို ဘေးကင်းလုံခြုံတဲ့ နေရာတစ်ခုဆီ အောင်အောင်မြင်မြင် ရွှေ့ပြောင်းပေးနိုင်ခဲ့ပါတယ်။ ပြီးတော့ ဖြစ်စဉ်မှာ ထိခိုက်ဒဏ်ရာရသူလည်း မရှိခဲ့ပါဘူး။
ရုရှား စုံစမ်းစစ်ဆေးရေး ကော်မတီကတော့ ဒီကိစ္စဟာ လုံခြုံရေး စည်းတွေ ဆိုးဆိုးရွားရွား ကျိုးပေါက်မှု ဖြစ်ခဲ့တာကြောင့် ရာဇဝတ်ကြောင်းဆိုင်ရာ စုံစမ်းစစ်ဆေးမှုတစ်ခု လုပ်ဆောင်သွားမယ်လို့ ကြေညာခဲ့ပါတယ်။
ကိုးကား: Moscow Times
