ဒီဇင်ဘာ-၁၉၊၂၀၂၅။အိမ်သွင်/People’s Spring
မြောက်ဦးပြည်သူ့ဆေးရုံကြီးကို အာဏာသိမ်းစစ်တပ်က ဗုံးကြဲခဲ့သောကြောင့် သေဆုံးသူနဲ့ထိခိုက်ဒဏ်ရာသူတွေကိုလူမှုကူညီရေးလုပ်ဆောင်နေသူတွေကတစ်ဆင့် ပြည်တွင်း၊ပြည်ပမှအလှူရှင်တွေက ကျပ်သိန်းပေါင်း ၅၀၀၀ ကျော်လှူဒါန်းထားတယ်လို့သတင်းရရှိပါတယ်။
တိုင်းရင်းသားအရေးဆောင်ရွက်တဲ့စာရေးဆရာဝေဟင်အောင်ထံကို ဆက်သွယ်လှူဒါန်းကြတာဖြစ်ပြီး ငွေကျပ်သိန်း ၅၀၀၀ ကျော် ရရှိထားပြီဖြစ်ပါတယ်။
အလှူငွေတွေကို လူသားချင်းစာနာထောက်ထားရေးနှင့် ဖွံ့ဖြိုးရေးဆိုင်ရာ ပူးပေါင်းဆောင်ရွက်ရေးရုံး (HDCO)ထံအပ်လိုက်ပြီး HDCOကတဆင့် ဆက်လက်ထောက်ပံ့မှာလို့ ကိုဝေဟင်အောင်ကအသိပေးထားပါတယ်။
Public Service Announcement
သေဆုံးသူတွေရဲ့မိသားစုဝင်တွေနဲ့ ဒဏ်ရာရသူတွေကို မျှဝေလှူဒါန်းနေပြီး ဆေးရုံအတွက် ကျပ်သိန်း၂၁၀၀ခန့်တန်ဖိုးရှိ ဓာတ်မှန်စက် (X Ray )၃ လုံးအပြင်အခြားဆေးဘက်ဆိုင်ရာသုံးပစ္စည်းတချို့လည်းလှူဒါန်းသွားမယ်လို့ကိုဝေဟင်အောင်ကလူမှုကွန်ရက်ကနေရှင်းပြထားပါတယ်။
စစ်တပ်က မြောက်ဦးမြို့ကပြည်သူ့ဆေးရုံကို ဒီဇင်ဘာလ ၁၀ ရက်နေ့မှာလေကြောင်းကနေတိုက်ခိုက်လို့ ဆေးကုသနေသူတွေ၊ကျန်းမာရေးဝန်ထမ်းတွေနဲ့ ကလေးငယ်တွေအပါအဝင် ၃၄ဦးသေဆုံးပြီး ၇၀ကျော် ဒဏ်ရာရခဲ့ပါတယ်။
ဒါအပြင် ဒီဇင်ဘာလ ၁၁ရက်နေ့မှာရခိုင်ပြည်နယ်၊ ကျောက်ဖြူမြို့ကို လေကြောင်းကနေ ဆက်လက် ဗုံးကြဲလို့စစ်ဘေးရှောင်ရှစ်ဦးသေဆုံးခဲ့ပြန်ပါတယ်။ လက်ရှိရတဲ့အလှူငွေတွေထဲကတချို့ကို ကျောက်ဖြူမြို့နယ်က ထိခိုက်သေဆုံးသူတွေအတွက်မျှဝေလှူဒါန်းသွားမယ်လို့လည်းသိရပါတယ်။
မြောက်ဦးပြည်သူ့ဆေးရုံကို ဗုံးကြဲပြီး ပြည်သူတွေကို သတ်ဖြတ်တဲ့ စစ်ရာဇဝတ်မှုအတွက် စစ်တပ်က တာဝန်ခံရမှာဖြစ်ပြီး အပြစ်မဲ့ပြည်သူတွေ တရားမျှတမှုရရှိဖို့အတွက်လိုအပ်သလိုလက်တုန့်ပြန်သွားမယ်လို့ အာရက္ခတပ်တော်( AA)က ထုတ်ပြန်ထားပါတယ်။
မြောက်ဦးဆေးရုံကို ဗုံးကြဲတိုက်ခိုက်မှုအတွက် စစ်ကောင်စီကို ကုလသမဂ္ဂ အပါအဝင် နိုင်ငံတကာ နဲ့ ဒီမိုကရေစီအရေးဆောင်ရွက်နေတဲ့အဖွဲ့အစည်းတွေကလည်း အကြမ်းဖက်စစ်ရာဇဝတ်မှု ကျုးလွန်သူအဖြစ် ထုတ်ပြန်ထားပါတယ်။
စစ်အုပ်စုက ရွေးကောက်ပွဲလုပ်မယ်ဆိုတဲ့ ဒီဇင်ဘာလမှာပဲ မြောက်ဦးကိုဗုံးကြဲပြီးတဲ့နောက် ကျောက်ဖြူ၊ ပေါက်တော၊ ပုဏ္ဏားကျွန်းမြို့နယ်တွေကိုဗုံးဆက်ကြဲခဲ့သလို လက်ရှိမှာလည်း စစ်ကိုင်းတိုင်း၊မန္တလေးတိုင်း၊မကွေးတိုင်း၊ဧရာဝတီတိုင်း၊ချင်းပြည်နယ်ကမြို့နယ်တွေကိုဆက်တိုက်ဗုံးကြဲနေလို့ အရပ်သားထိခိုက်သေဆုံးမှုတွေရှိနေပါတယ်။
