▪︎စစ်သားမိသားစုဝင်များကပြောပြ၍ စစ်တပ်ဖွက်ခဲ့သောလက်နက်ခဲရမ်းများကိုသိမ်းဆည်းရရှိ
ကိုးကန့်တပ်ဖွဲ့ (MNDAA)နှင့် မဟာမိတ်တပ်များက ယမန့်နေ့(နိုဝင်ဘာ ၂၆ ရက်)တွင် စစ်ကောင်စီတပ်စခန်းနှစ်ခု ထပ်မံတိုက်ခိုက်သိမ်းပိုက်ပြီး လက်နက်ခဲယမ်းများရရှိကြောင်း ထုတ်ပြန်သည်။
ရှမ်းပြည်နယ် သီပေါ နှင့် ကျောက်မဲကြားရှိ ကျင်သီတံတားရှေ့တွင် အခြေချတပ်စွဲထားသော စစ်ကောင်စီတပ်၏တပ်ရင်း(၅၆၇) ၊ (၅၆၈) စခန်းနှစ်ခုကို MNDAA နှင့် TNLA တို့ပူးပေါင်း၍ နိုဝင်ဘာ ၂၄ ရက်မှစ၍ ထိုးစစ်တိုက်ခိုက်သိမ်းပိုက်ခဲ့ခြင်းဖြစ်သည်။ထိုနောက် ကျင်သီတံတား ကိုပါ MNDAA နှင့် TNLA တို့ကနိုဝင်ဘာ ၂၆ ရက်နံနက် ၈ နာရီကျော်တွင် သိမ်းပိုက် နိုင်ခဲ့ကြောင်း MNDAA က ယနေ့ ထုတ်ပြန်သည်။
ကျင်သီတံတားကိုတိုက်ခိုက်သိမ်းပိုက်ပြီးနောက် နန့်စလပ်တပ်စခန်းတွင် စစ်ကောင်စီဘက်မှ ထွက်ပြေးတိမ်းရှောင်ချိန်၌ဝှက်ထားခဲ့သောလက်နက်ခဲယမ်းများကို ရှာဖွေသိမ်းဆည်းနိုင်ခဲ့ကြောင်းလည်းသိရသည်။
နန့်စလပ်တပ်စခန်းမှ ထွက်ပြေးလာသောစစ်ကောင်စီတပ်မိသားစုဝင်များ၏ ပြောပြမှုကြောင့် စစ်သားများဝှက်ခဲ့သောလက်နက်ခဲယမ်းများရှာဖွေတွေ့ရှိခဲ့ခြင်းဖြစ်ပြီး ရိုင်ဖယ်(၁၃)လက် ၊ စက်သေနတ်(၁)လက် ၊ကျည်ဘောက်(၃၁)ခု ၊ ကျည်ကာဦးထုပ်(၃)ခု ၊ သေနတ်ပစ်ဗုံးသီး(၃)လုံးနှင့် ကျည်ဆံ (၂၀၀၀) တောင့်စသည် တို့ကိုသိမ်းဆည်းရရှိခဲ့ကြောင်းပုံနှင့်တစ်ကွ ဖော်ပြသည်။
စစ်ကောင်စီတပ်မှ ဒဏ်ရာရရှိသော မိသားစုဝင်များကို MNDAA ကဆေးအဖွဲ့စေလွှတ်ပေး၍ ကုသပေးခဲ့ကြောင်းလည်းသိရသည်။
Public Service Announcement
ထိုအပြင် နိုဝင်ဘာ၂၇ ရက် မွန်းလွဲ ၂ နာရီကျော် တွင်MNDAAနှင့် ဒေသလုံခြုံရေးတပ်ဖွဲ့တို့ပူးပေါင်း၍ ကျင်စန်းကျော့ နယ်စပ်ဂိတ်၏တောင်ဘက်ခြမ်းရှိ လုံခန်းနေရာတွင်အခြေချတပ်စွဲထားသော စစ်ကောင်စီတပ်စခန်းကို တိုက်ခိုက်သိမ်းပိုက်ခဲ့ကြောင်းလည်းသိရသည်။စခန်းသိမ်းတိုက်ပွဲမှ လက်နက်ခဲယမ်းများသိမ်းရရှိမှုကိုသတင်းထုတ်ပြန်ချက်တွင် မဖော်ပြသော်လည်း ရုပ်သံဖိုင်တွင် လက်နက်ကြီးနှင့် ခဲယမ်းသတ္တာများသိမ်းဆည်းရရှိသည်ကိုတွေ့ရသည်။
အထက်ပါစခန်းသိမ်းတိုက်ပွဲ နှစ်ခုတွင် နှစ်ဖက်ထိခိုက်သေဆုံးမှုအခြေအနေကို ဖော်ပြထားခြင်းမရှိပေ။
MNDAA နှင့် မဟာမိတ်တပ်ဖွဲ့များသည် နိုဝင်ဘာ ၂၆ ရက်အထိ့ စစ်ကောင်စီ၏တပ်စခန်းအကြီးအသေး စုစုပေါင်း (၁၇၆) သိမ်းပိုက်ရရှိခဲ့သည်ဟု အသိပေးထားသည်။
ထိုအပြင် TNLA ကလည်း ၁၀၂၇ စစ်ဆင်ရေးတွင် စစ်ကောင်စီတပ်စခန်းပေါင်း အနည်းဆုံး ၄၇ ခုကိုတိုက်ခိုက်သိမ်းပိုက်ထားသည်။ထိုကြောင့် နိုဝင်ဘာ ၂၆ ရက်အထိ့ ညီနောင်မဟာမိတ် ၃ ဖွဲ့က ရှမ်းပြည်နယ်မြောက်ပိုင်းရှိ တပ်စခန်းပေါင်း ၂၁၀ ကျော်ကိုတိုက်ခိုက်သိမ်းပိုက်ထားခြင်းဖြစ်သည်။ ထိုထဲတွင် မြို့ ၆ မြို့ ၊မြန်မာ-တရုတ် နယ်စပ်ဂိတ် ၄ ဂိတ်ကိုပါ သိမ်းပိုက်နိုင်ခဲ့ခြင်းဖြစ်သည်။
▪︎ပြင်ဆင်ချက် – ကနဦးသတင်းတွင် “ကျေးသီးတံတား”အစား “ကျင်သီတံတား”ဟုအမှန်ပြင်ဆင်ထားပါသည်။
