စစ်အုပ်စုထိန်းချုပ်ထားသည့် နိုင်ငံပိုင်ဘဏ်နှစ်ခုကို အမေရိကန်အစိုးရက ပိတ်ဆို့အရေးယူခြင်းအပေါ် ထောက်ခံကြိုဆိုကြောင်း နွေဦးတော်လှန်ရေးအင်းအားစုများက ယနေ့ထုတ်ပြန်လိုက်သည်။
စစ်ကောင်စီထိန်းချုပ်ထားသည့် မြန်မာ့နိုင်ငံခြားကုန်သွယ်မှုဘဏ်(MFTB)နှင့် မြန်မာ့ရင်းနှီးမြှပ်နှံမှုနှင့်ကူးသန်းရောင်းဝယ်ရေးဘဏ်(MCIB)တို့ကို ပိတ်ဆို့အရေးယူလိုက်ခြင်းသည် စစ်အုပ်စု၏ ပြည်သူများအပေါ် ကျူးလွန်နေသည့် အကြမ်းဖက်မှုများကို သက်ဆိုးရှည်စေမည့် ငွေကြေးစီးဆင်းမှုကို ဖြတ်တောက်လိုက်ခြင်းဖြစ်သည်ဟု အထွေထွေသပိတ်ပေါင်းစပ်ညှိနှိုင်းရေးအင်းအားစု(GSCB) ၊ကမ္ဘာလုံးဆိုင်ရာ မြန်မာ့နွေဦးတော်လှန်ရေး (GMSR)နှင့် သွေးစွန်းငွေဖြတ်တောက်ရေးလှုပ်ရှားမှု(BMC)တို့ကပူးတွဲဖော်ပြထားသည်။
ထိုအပြင်မြန်မာ့မြေပေါ်တွင် ယခုဖြစ်ပွားနေသည့် ဖိနှိပ်အကြမ်းဖက်မှုများကို ရပ်တန့်စေရန်မှာ အကြမ်းဖက်စစ်အုပ်စု၏ သက်ဆိုး ရှည်စေမည့် ငွေကြေးစီးဆင်းမှုများ၊ တရားဝင်မှုပြုရေးများကို ဖြတ်တောက်မှသာလျှင် ရပ်တန့်စေနိုင်မည် ဖြစ်သောကြောင့် အမေရိကန်အစိုးရနည်းတူ အရေးယူခြင်းများကို ဥရောပအဖွဲ့အစည်းများ၊ အာဆီယံနှင့် အိမ်နီးချင်းနိုင်ငံများကပါ လုပ်ဆောင်ကြရန်လည်း မိမိတို့ အင်အားစုများမှ ထပ်လောင်းတိုက်တွန်းလိုက်ပါသည်ဟုလည်းတိုက်တွန်းသည်။
“ဒီဘဏ်နှစ်ခု ပိတ်ဆို့အရေးယူခံရတာက စစ်အုပ်စုအတွက်အကြီးအကျယ် ထိုးနှက်ခံရတာလို့ မြင်တယ်။ ကျွန်မတို့လိုချင်တာက ရေနံနဲ့ သဘာဝဓာတ်ငွေ့က ဝင်ငွေရနေတဲ့ MOGEလို့ လုပ်ငန်းများကို အမေရိကန်အနေနဲ့ ဒဏ်ခတ်အရေးယူစေချင်တာ။”ဟု စစ်ကိုင်းမှ သပိတ်ခေါင်းဆောင်တစ်ဦးကမှတ်ချက်ပေးသည်။
စစ်အုပ်စုက နိုင်ငံတော်အာဏာသိမ်းယူခဲ့ပြီး အချိန်မှ စတင်ပြီး ပြည်သူများ၏ အသက်အိုးအိမ်၊ စည်းစိမ်များနှင့် စိတ်ပိုင်း၊ ရုပ်ပိုင်း လုံခြုံရေးများ အဘက်ဘက်မှ ယိုယွင်းပျက်စီးလာသည်ဟု တော်လှန်ရေးအင်အားစုများကဖော်ပြသည်။ ထိုခရီးကြမ်းကို ဖြတ်သန်းနေသည့် တော်လှန်ရေးအင်အားစုများနှင့်အတူ ပြည်သူများအနေဖြင့် ယခုပိတ်ဆို့မှုများသည် တော်လှန်ရေးခရီးအတွက် အထောက်အပံ့များဖြစ်၍ ကြံ့ကြံ့ခံ အတူရင်ဆိုင်ကြရန်လည်း တိုက်တွန်းထားသည်။
အာဏာသိမ်းစစ်အုပ်စုကို အမေရိကန် အစိုးရက ၂ နှစ်ကျော်အတွင်း လူပုဂ္ဂိုလ် ၈၀ ကျော်နှင့် အဖွဲ့အစည်း ၃၀ ကျော်ကို အရေးယူဒဏ်ခပ်ပိဆို့ခဲ့ရ ဘဏ်နှစ်ဘဏ်နှင့် စစ်ကောင်စီကာကွယ်ရေးဝန်ကြီးဌာနကို ဇွန် ၂၁ ရက်နေ့စွဲဖြင့် အရေးယူဒဏ်ခတ်ခဲ့ခြင်းဖြစ်သည်။
အာဏာရှင်အဖွဲ့အစည်းက ကာကွယ်ရေးဝန်ကြီးဌာနအတွက် နိုင်ငံရပ်ခြားမှ စစ်လက်နက်ပစ္စည်းများဝယ်ယူရာတွင် နိုင်ငံခြားငွေကြေးသုံးစွဲမှုအဆင်ပြေချောမွေ့စေရေးအတွက် MFTB နှင့် MICB တို့သည် အခရာကျသည့် အဖွဲ့အစည်းများဖြစ်ပါသည်။ ဤဘဏ်များသည် ၄င်းတို့၏ နိုင်ငံခြားဘဏ်စာရင်းများကိုအသုံးပြု၍ မြန်မာနိုင်ငံ၏ အခွန်ဘဏ္ဍာငွေရှာဖွေပေးသည့် နိုင်ငံတော်ပိုင် စီးပွားရေးလုပ်ငန်းများကို နိုင်ငံတကာဈေးကွက်နှင့် အလွယ်တကူချိတ်ဆက်နိုင်စေခဲ့ခြင်းဖြင့် စစ်ရေးကိစ္စရပ်များအတွက် အာဏာရှင်အဖွဲ့အစည်းက ခေါင်းပုံဖြတ်အမြတ်ထုတ်နိုင်မည့်ငွေကြေးအရင်းအမြစ်အမြောက်အများကို ပံ့ပိုးပေးခဲ့ကြောင်း အမေရိကန်အစိုးရ နိုင်ငံခြားရေးဝန်ကြီးဌာနက ထုတ်ပြန်သည်။
