စစ်အုပ်စုကို တရားဝင်မှုနှင့် လက်နက်ထောက်ပံ့ခြင်းများ လုံးဝရပ်တန့်အောင် အိန္ဒိယအစိုးရကိုဖိအားပေးရန် အရပ်ဘက်အဖွဲ့ ၂၀၀နီးပါး တိုက်တွန်း

အိန္ဒိယအစိုးရက မြန်မာဖက်ဆစ်စစ်အုပ်စုကို နိုင်ငံရေးတရား၀င်မှုပေးခြင်းနှင့် လက်နက်ထောက်ပံ့မှုများ လုံးဝရပ်တန့်အောင် ဖိအားပေးရန် အရပ်ဘက်အဖွဲ့အစည်း ၁၈၃ဖွဲ့က ထုတ်ပြန်တိုက်တွန်းသည်။

အိန္ဒိယနိုင်ငံ အရပ်ဘက်လူမှုအဖွဲ့အစည်းများနှင့် နိုင်ငံရေးပါတီများသို့ မြန်မာပြည်သူများ၏ အိတ်ဖွင့်ပေးစာတွင် ထည့်သွင်းတိုက်တွန်းခြင်းဖြစ်ပြီး အိန္ဒိယအစိုးရက မြန်မာဖက်ဆစ်စစ်အုပ်စုကို စီးပွားရေးပိတ်ဆို့မှုများ လုပ်ဆောင်အောင်ဖိအားပေးရန်လည်း ပါဝင်သည်။

အိန္ဒိယပြည်သူများအနေဖြင့် ဒီမိုကရေစီရေးအတွက် မြန်မာပြည်သူနှင့်အတူ ရပ်တည်ကြောင်း ထုတ်ဖော်ပြသရန်၊ မြန်မာဖက်ဆစ်စစ်အုပ်စုကြောင့် အိုးအိမ်စွန့်ခွာထွက်ပြေးနေရသည့် စစ်ဘေးဒုက္ခသည်များအား လူသားချင်း စာနာမှုဖြင့် ဝိုင်းဝန်းကူညီရန်နှင့် ၎င်းတို့ကို အိန္ဒိယအစိုးရမှ လူသားချင်းစာနာမှုအကူအညီပေးအောင် တိုက်တွန်းရန် အချက်များကိုလည်း ထည့်သွင်းတောင်းဆိုသည်။

အိန္ဒိယနိုင်ငံအစိုးရသည် ယနေ့အချိန်အထိ ဒီမိုကရေစီ လိုလားသော မြန်မာပြည်သူများနှင့် မရပ်တည်သည့်အပြင် ဖက်ဆစ်စစ်တပ်ကို လက်နက်ထောက်ပံ့ခြင်းများ ၊ နိုင်ငံရေးအရ တရား၀င်မှုပေးခြင်းများ ဆောင်ရွက်နေဆဲဖြစ်ကြောင်း အရပ်ဘက်အဖွဲ့အစည်းများက ထောက်ပြသည်။

မြန်မာစစ်တပ်သည် အာဏာသိမ်းပြီး တစ်နှစ်ကျော် ကြာကာလအတွင်း စက်ဆုတ်ရွံ့ရှာဖွယ် မုဒိန်းမှုကို လက်နက်သဖွယ်အသုံးပြုခြင်း အပါအဝင် ရက်စက်ကြမ်းကြုတ်သော နည်းလမ်းမျိုးစုံ အသုံးပြု၍ ဒီမိုကရေစီ လိုလားသော ပြည်သူများအပေါ် ထိန်းချုပ်အုပ်ချုပ်နိုင်ရန် ကြိုးစားလာခဲ့သော်လည်း ‘လုံးဝအုပ်ချုပ်ခွင့်မရ’ ပေ။

ထို့အပြင် ပြည်သူများက စည်းလုံးညီညာစွာဖြင့် မိမိကိုယ်ပိုင် ယှဉ်ပြိုင်အစိုးရ အောင်မြင်စွာ တည်ဆောက်လာခြင်းကြောင့် စစ်တပ်သည် တရားဝင်မှုကင်းမဲ့သည့် လက်နက်ကိုင် အကြမ်းဖက်အဖွဲ့အဆင့်သို့ ရောက်ရှိနေပြီဖြစ်ကြောင်း အိတ်ဖွင့်ပေးစာ၌ ဖော်ပြသည်။