စက်တင်ဘာ ၂၀၊ ၂၀၂၆။ ထားမြတ်/People’s Spring
ကချင်ပြည်နယ်မှာ ကချင်လွတ်လပ်ရေးတပ်မတော်(KIA) ပူးပေါင်းတပ် တိုက်ခိုက်သိမ်းပိုက်ထားတဲ့ နယ်မြေ များလာပြီး စစ်တပ် ဆုံးရှုံးမှုများလာလို့ အများပြည်သူ ကျေးရွာတွေကို ဗုံးကြဲတိုက်ခိုက်မှု ဆက်တိုက် ပြုလုပ်နေကြောင်း KIA သတင်းပြန်ကြားရေးဌာနက ဖော်ပြပါတယ်။
စက်တင်ဘာ ၁၉ရက်ည KIA ပြန်ကြားရေးဌာနရဲ့ ဖော်ပြချက်မှာ ရွှေကူမြို့မှာ တိုက်ပွဲတွေ ဆက်တိုက်ဖြစ်နေသလို စစ်တပ်ရဲ့ လေကြောင်းတိုက်ခိုက်မှုကြောင့် အရပ်သားအချို့ သေဆုံးထိခိုက်မှု ရှိခဲ့တဲ့ အခြေအနေကို ဖော်ပြပြီး အထက်ပါအတိုင်း အသိပေးထားတာပါ။
KIA တပ်မဟာ(၁၁)၊ တပ်ရင်း(၁၂) နယ်မြေ ရွှေကူမြို့နယ်မှာ စက်တင်ဘာ ၁၇ရက်က ပြည်သူနေထိုင်ရာ ကျေးရွာတွေကို စစ်တပ်က လေကြောင်းဗုံးကြဲခဲ့ရာ အရပ်သား ၂ဦးသေဆုံးကာ ၃ဦး ဒဏ်ရာရခဲ့ကြောင်း အသိပေးပါတယ်။
Public Service Announcement
စက်တင်ဘာ ၁၈ရက် ညပိုင်းကလည်း ရွှေကူမြို့နယ် မြို့ကုန်းရွာကို စစ်တပ်က လေယာဉ်ဗုံးကြဲခဲ့ရာ ပြည်သူ ၃ဦးသေဆုံးပြီး ၉ဦး ဒဏ်ရာရခဲ့ကြောင်း ဖော်ပြပါတယ်။
ထိခိုက်ဒဏ်ရာရသူတွေကို KIA ပူးပေါင်းတပ်က ဆေးကုသပေးနေတယ်လို့လည်း အသိပေးပါတယ်။
စစ်တပ်ရဲ့ လေကြောင်း တိုက်ခိုက်မှုတွေကြောင့် ပြည်သူ့နေအိမ်အချို့ ထိခိုက်ပျက်စီးခဲ့ရကြောင်းလည်း ဖော်ပြပါတယ်။
စစ်တပ်ဟာ ကချင်ပြည်နယ် ဗန်းမော်ကို ရေကြောင်းက စစ်အင်အားဖြည့်ဖို့ ကြိုးပမ်းလာလို့ ဩဂုတ်လကုန်ပိုင်းနဲ့ စက်တင်ဘာလအတွင်းမှာ ရွှေကူ-ဗန်းမော်ကြားမှာ မြေပြင်တိုက်ပွဲတွေအပြင် ရေကြောင်း တိုက်ပွဲတွေပါ ဖြစ်ပွားခဲ့တာပါ။
ဗန်းမော်မြို့ကို စစ်အင်အားဖြည့်ဖို့ လာတဲ့ စစ်သင်္ဘောတွေ အဆန်၊ အစုန်သင်္ဘောတွေကို KIAက ကြားဖြတ်တိုက်ခိုက်ခဲ့ရာ စစ်တပ်အထိနာခဲ့ပါတယ်။ ပြီးခဲ့တဲ့ သုံးပတ်တာအတွင်း KIA ပူးပေါင်းတပ်ရဲ့ တိုက်ခိုက်မှုတွေကြောင့် စစ်ကောင်စီသင်္ဘော အစီး ၂၀ ခန့် ထိခိုက်နစ်မြုပ် မီးလောင်ပျက်စီးမှုတွေရှိခဲ့ကြောင်း KIA က အသိပေးထားပါတယ်။
