ဇွန်-၁၃၊၂၀၂၆။တာရာ/People’s Spring
အထက်ရွှေဂုံတိုင်လမ်းမပေါ်မှာရှိတဲ့ အမျိုးသားဒီမိုကရေစီ (NLD )ရုံးချုပ်အဆောက်အအုံမှာရှိနေတဲ့ဆိုင်းဘုတ်နဲ့ အလံကို အာဏာသိမ်းစစ်တပ်က ဖြုတ်ချခဲ့ပါတယ်။
စစ်တပ်ကဇွန်လ ၁၂ ရက်ညပိုင်းမှာ NLD ရုံးချုပ်ရှိ ဆိုင်းဘုတ်နဲ့ အလံကို လာရောက်ဖြုတ်ချသွားခဲ့တယ်လို့ ဒေသခံအချို့ကပြောပါတယ်။
“ကားသုံးစီးလောက်နဲ့ လာပြီးဖြုတ်သွားတာ။ ည ၁၀ နာရီဝန်းကျင်လောက်တော့ရှိမယ်။ အရင်တုန်းကဒီတိုင်းပဲရှိနေတာ။ အခုမှလာဖြုတ်သွားတာ”လို့ မျက်မြင်တွေ့ရှိသူတဦးကပြောပါတယ်။
Public Service Announcement
၂၀၂၀ ရွေးကောက်ပွဲမှာသောင်ပြိုကမ်းပြိုအနိုင်ရခဲ့တဲ့ NLD ပါတီကို မဲစာရင်းမှားယွင်းတယ်လို့ စစ်တပ်က စွပ်စွဲပြီး ဒေါ်အောင်ဆန်းစုကြည်အပါအဝင် ပါတီခေါင်းဆောင်တွေကိုဖမ်းဆီးကာ အာဏာသိမ်းခဲ့ပါတယ် ။ဒါအပြင်ပါတီရုံးတွေကို စစ်တပ်ကကျူးကျော်ဖျက်ဆီးခဲ့သလို ပါတီဝင်တွေရဲ့ နေအိမ်ပိုင်ဆိုင်မှုရာပေါင်းများစွာကိုလည်း ချိတ်ပိတ်ခဲ့ပါတယ်။
စစ်တပ်က ဒီချုပ်ပါတီ ကိုယ်စားလှယ် ၁၉၉ ဦး နဲ့ ပါတီဝင် ၂၆၁ ဦး စုစုပေါင်း ၄၆၀ ဦးရဲ့နေအိမ်တွေကို ချိတ်ပိတ်ခဲ့ပြီး ၊ ဒီချုပ်အမတ် ၁၄၉ ဦး ၊ပါတီဝင် ၂၈၈၀ ဦး အပါအဝင် ပြည်သူပေါင်း နှစ်သောင်းဝန်းကျင်ကို မတရာဖမ်းဆီးထားတယ်လို့ NLD ကထုတ်ပြန်ထားပါတယ်။ဒါအပြင် ဒီချုပ် အမတ် ၈ ဦး ပါတီဝင် ၁၁၈ ဦးတို့ကိုလည်း စစ်တပ်ကသတ်ဖြတ်ခဲ့တယ်လို့ ၂၀၂၆ ဖေဖော်ဝါရီလမှာ ဒီချုပ်က ထုတ်ပြန်ပါတယ် ။
