မေ-၄၊ ၂၀၂၆။ ထားမြတ်/People’s Spring
ကချင်ပြည်နယ်၊ ရွှေကူမြို့နယ်မှာ ဒီကနေ့ မေလ ၄ရက်မှာ တိုက်ပွဲဆက်လက်ဖြစ်ပွားခဲ့ကြောင်း ကချင်စစ်ရေးသတင်းရင်းမြစ်က ပြောပါတယ်။
စစ်တပ်က အင်အားအလုံးအရင်းနဲ့ စစ်ရေးလှုပ်ရှားလာလို့ တိုက်ပွဲဖြစ်ပွားနေတာလို့ ဆိုပါတယ်။ ရွှေကူမြို့နယ် ငအိုးဒေသကို ရောက်နေတဲ့ စစ်တပ်က ရွှေကူမြို့ကတဆင့် ဗန်းမော်မြို့ကိုစစ်ကူပို့ဖို့လုပ်ဆောင်နေတာလို့ သတင်းရင်းမြစ်က ပြောပါတယ်။ စစ်တပ်က အင်အားထောင်ချီစုဖွဲ့ စစ်ရေးလှုပ်ရှားလာလို့ တိုက်ပွဲတွေ ပြင်းထန်နိုင်ကြောင်းလည်း အသိပေးပါတယ်။
KIAနဲ့အတူ စစ်တပ်ကို တိုက်ခိုက်နေတဲ့ ရွှေကူ KPDFကလည်း လတ်တလော စစ်ရေးအခြေအနေတွေနဲ့ပတ်သက်ပြီး ပြည်သူသို့ ပန်ကြားချက်ကို ဒီကနေ့ မေလ ၄ရက်ညပိုင်းမှာ ထုတ်ပြန်ကြေညာပါတယ်။
Public Service Announcement
ရွှေကူ KPDF တပ်ရင်း နယ်မြေအတွင်းရှိ ပြည်သူတွေအနေနဲ့ စစ်ရေးအခြေအနေအရ စစ်ကော်မရှင် (စကမ) စစ်ကြောင်းများ၊ ဂိတ်များ၊ ကာကင်းစခန်းများနဲ့ နီးကပ်စွာ သွားလာနေထိုင်ခြင်းမပြုဘဲ ရှောင်ရှားနေထိုင်ကြဖို့ သတိပေးပန်ကြားထားတာပါ။
စစ်တပ်စစ်ကြောင်းတွေ ၊ လက်နက် ခဲယမ်းတွေ၊ ရိက္ခာတွေကို သယ်ယူပို့ဆောင်ခြင်း မပြုလုပ်ဖို့လည်း ထုတ်ပြန်ထားပါတယ်။
ဒါ့အပြင် မဘိမ်း-မြစ်ဆုံ၊ ငါးအိုး-ရွှေကူ နယ်မြေများ၌ ကုန်းမြေ၌ဖြစ်စေ၊ ရေပြင်၌ဖြစ်စေ အသံကျယ်လောင်ဆူညံစွာ ထွက်ပေါ်နိုင်တဲ့ စက်ယန္တရား အသုံးပြု လုပ်ငန်းများကို ညနေ(၆)နာရီမှ နံနက်(၉)နာရီထိ ရပ်နားထားကြဖို့ အသိပေးပန်ကြားထားပါတယ်။
အသိပေးထုတ်ပြန်ချက်တွေ မလိုက်နာရင်နောက်ဆက်တွဲ ဖြစ်လာမယ့် ပြဿနာတွေ တာဝန်ယူဖြေရှင်းပေးမှာ မဟုတ်ဘူးလို့လည်းသတိပေးထားပါတယ်။
