ကျွန်းလှမြို့နယ်အနောက်ခြမ်းရှိ လိပ်ဆင်းတောင်ကျေးရွာတွင် တိုက်ပွဲဖြစ်ပွားခြင်းမရှိဘဲ စစ်ကောင်စီက Mi-35 ရဟတ်ယာဉ်ဖြင့် မိနစ် ၂၀ခန့်ကြာ ပစ်ခတ်တိုက်ခိုက်ခဲ့ကြောင်း ဒေသခံများက ပြောသည်။
အရပ်သားများသာရှိနေသော လိပ်ဆင်းတောင်ကျေးရွာကို ယနေ့(နိုဝင်ဘာ ၂၅ရက်) ညနေ ၃နာရီခွဲခန့်တွင် စစ်ကောင်စီက လေကြောင်းမှ တိုက်ခိုက်ခြင်းဟု ဆိုသည်။
“ရွာကိုပတ်ပြီး မော်တာနဲ့ပစ်သွားတာ။ ဒေသခံတွေတော့ ထိခိုက်မှုမရှိဘူး။ တိုက်ပွဲလည်း မရှိဘဲ တမင်သက်သက်ပစ်တာ။ သဒ္ဓေယုတ်တဲ့ ပိုင်းလော့တွေ”ဟု ဒေသခံတစ်ဦးက ပြောသည်။
လိပ်ဆင်းတောင်ရွာကို စစ်ကောင်စီက ရဟတ်ယာဉ်ဖြင့် ခြောက်ကြိမ်ပတ်၍ ပစ်ခတ်သွားခြင်းဖြစ်သည်။ သို့သော် ထိခိုက်မှုအခြေအနေကို လူထုနွေဦးက စုံစမ်းနေဆဲဖြစ်သည်။
” ကျွန်းလှမြို့နယ်အနောက်ခြမ်းရွာတွေက စစ်အာဏာရှင်ကို ဆန့်ကျင်တဲ့ ရွာတွေဖြစ်တယ်။ဒီနေ့လေကြောင်းတိုက်ခိုက်မှုက ထုံးစံအတိုင်း စစ်ကောင်စီက အရပ်သားကို ဦးတည်ပစ်တာ”ဟု ပြည်သူ့ကာကွယ်ရေးတပ်မှ ရဲဘော်တစ်ဦးက ပြောသည်။
Public Service Announcement
ကျွန်းလှမြို့တွင် ပြီးခဲ့သည့် နိုဝင်ဘာ ၃ရက်က စစ်ကောင်စီအခိုင်အမာတပ်စွဲထားသော ဆင်စွယ်စခန်းကို ပြည်သူ့ကာကွယ်ရေးပူးပေါင်းတပ်ဖွဲ့များက တိုက်ခိုက်သိမ်းပိုက်ခဲ့သည်။
အဆိုပါတိုက်ပွဲ၌ စစ်ကောင်စီဘက်မှ ၃၀ထက်မနည်းသေဆုံးပြီး လေကြောင်းမှဗုံးကြဲတိုက်ခိုက်ခံရမှုကြောင့် ကာကွယ်ရေးရဲဘော် ရှစ်ဦးကျဆုံးခဲ့ရသည်။
