ညောင်ပင်ကြီးရဲစခန်းစီးနင်းတိုက်ခိုက်ခံရပြီး​နောက်စစ်ကောင်စီတပ်က ၆ ရက်ဆက်တိုက်ရွာများကိုမီးရှို့

စစ်ကိုင်းတိုင်း၊ ဆားလင်းကြီးမြို့နယ်ရှိ ၊​ညောင်ပင်ကြီရဲစခန်း ၊စခန်းသိမ်းတိုက်ခိုက်ခံရပြီး​နောက် စစ်ကောင်စီတပ်က ၆ ရက်ဆက်ဆက်တိုက်ရွာများကို မီးရှို့ဖျက်ဆီး အကြမ်းဖက်​နေ​ကြောင်း​ဒေသခံများက ​ပြောသည်။

ကျေးရွာလေးရွာရှိ နေအိမ်ပေါင်း ၃၀၀ ဝန်းကျင် ပျက်စီးဆုံးရှုံးခဲ့ပြီး ပြည်သူ၃ဦး သေဆုံးခဲ့ကြောင်း ဒေသတွင်းသတင်းရင်းမြစ်များက ပြောသည်။

ဇွန်လ၉ရက် ညနေပိုင်းတွင်စစ်ကောင်စီတပ်၏ ညောင်ပင်ကြီးစခန်းအား PDFများက စခန်းသိမ်းတိုက်ခိုက်ခဲ့ရာ စစ်​ကောင်စီဘက်မှ ၁၂ ဦး​သေဆုံးပြီး လက်နက် ၇ လက်နှင့် ခဲယမ်းများစွာကို PDFများကသိမ်းဆည်းရရှိခဲ့သည်။

မုံရွာမြို့ နမခ (အ​နောက်​မြောက်တိုင်းစစ်ဌာနချုပ်) အနီးရှိ ​ကျေးရွာမှ ရဲစခန်း စီးနင်းတိုက်ခိုက်ခံရခြင်းဖြစ်ပြီး စစ်အုပ်စုက လေကြောင်းပစ်ကူဖြင့်တိုက်ခိုက်ခဲ့သည်။ထိုအပြင် အနီးရှိ စစ်တပ်အထိုင်ချရာစခန်းများမှလည်း လက်နက်ကြီးများဖြင့် ပစ်ခတ်တိုက်ခိုက်ခဲ့သည်။

ရဲစခန်းစီးနင်းတိုက်ခိုက်ခံရ​သော​ကြောင့် စစ်ကောင်စီတပ်က ​ဇွန် ၉ ရက်ညမှာပင် ​ညောင်ပင်ကြီးရွာကို မီးစတင်ရှို့ခဲ့ပြီး ယနေ့( ဇွန်လ၁၄)အထိ ၆ ရက်ဆက်တိုက်မီးရှို့မှုကြောင့်​​ဒေသခံပြည်သူများ၏​နေအိမ် ရာချီမီး​လောင်ပြာကျခဲ့သည်။

မီးရှို့ခံရ​သောရွာများမှာ ​ညောင်ပင်ကြီးရွာ၊ ရွာရှည်ရွာ၊ ထန်းတောရွာ၊ သိမ်တော်ရွာနှင့် အမှတ်၃၊ အမှတ်၄ရပ်ကွက်တို့မှ နေအိမ်ပေါင်း ၃၀၀ ​ကျော် မီးလောင်ပြာကျခဲ့ကြောင်း ဒေသခံများက ပြောသည်။

“ခန့်မှန်းခြေ ၂၅၀၊ ၃၀ဝ လောက်ရှိမယ်။ စစ်တပ်ရှိသေးတယ်။ ရှောင်နေရတုန်းပဲ။”ဟု ချင်းတွင်းမြစ်ကမ်းဘေးကျေးရွာများသပိတ်ကော်မတီမှ ကိုအောင်ခန့်ဇော်က ဇွန် ၁၂ ရက်တွင် People’s Spring သတင်းဌာနသို့​ပြောသည်။

အလားတူစစ်ကောင်စီတပ်သည် ဇွန် ၁၃ ရက်တွင် ထန်းတောရွာ ၊ဇတ်ဆိပ်ဘက်၌လည်းကောင်း၊ ယနေ့ (ဇွန်လ ၁၄)နံနက်ပိုင်းတွင် သိမ်တော်ရွာ၊နှင်း​တောရွာတို့ကိုလည်းကောင်း ဆက်လက်မီးရှို့ဖျက်ဆီးနေကြောင်း ချင်းတွင်းမြစ်ကမ်းဘေးသပိတ်စစ်ကြောင်းကော်မတီက အသိပေးထားသည်။

ထို့အပြင် စစ်​ကောင်စီတပ်သည် ဇွန် ၁၄ ရက်နံနက်ကထန်းတောကြီးရွာထဲသို့ ၄၀ မမ များနှင့်ပစ်ခတ်အကြမ်းဖက်​ကြောင်းလည်း​ဒေသခံအချို့က​ပြောသည်။

စစ်တပ်က စစ်​ကြောင်းထိုး၍ အကြမ်းဖက်ပစ်ခတ် မီးရှို့ မှုများ​ကြောင့် ​ဒေသခံပြည်သူ​သောင်းချီထွက်​ပြေး​နေရပြီး ​နေအိမ်များစိူ့မပြန်နိုင်​သေးသဖြင့် ၆ ရက်ဆက် မီးရှို့ဖျက်ဆီးမှုတွင် ​နေအိမ်မည်မျှ မီး​လောင်ဆုံးရှုံး​နေပြီကိုမသိရ​သေး​ကြောင်း​ဒေသခံအချို့က​ပြောသည်။

“ဖက်ဆစ်တပ်က ​ညောင်ပင်ကြီးရဲစခန်းအသိမ်းခံလိုက်ရလို့ပြည်သူ​တွေကို ဒုက္ခ​ရောက်​အောင် မီးပတ်ရှို့​နေတာ ။သူတို့စခန်း​တွေအတိုက်ခံရရင် ရွာ​တွေကို အဲလိုမီးရှိူ့တယ်ဆိုပြီးPDF နဲ့ ​ဒေသခံပြည်သူ​တွေကို ရန်တိုက်​ပေး​နေတာ။သူတို့မသိတာက PDF ​တွေကတစ်ကယ်သာတိုက် ဖက်ဆစ်တပ်များများ​သေ​လေ ပြည်သူ​တွေက ဝမ်းသာ​လေပဲ။ဖက်ဆစ်တပ်ပြုတ်မှ ဒုက္ခ​​​တွေမရှိ​တော့မှာမို့ အခုစခန်းက မုံရွာနဲ့နီးနီး​လေးကို PDF ​တွေကတိုက်သွားတာမိုက်တယ်” ဟု ​ဒေသခံတစ်ဦးက​ပြောသည်။

စစ်တပ်က​ စခန်းစီးနင်းခံရစဥ် လေ​ကြောင်းမှတိုက်ခိုက်သဖြင့်တွင် PDF ရဲဘော်တစ်ဦး ကျဆုံးသည်။စစ်တပ်က ရမ်းသန်းပစ်ခတ်မှုများ​ကြောင့် စစ်ဘေးရှောင် သက်ကြီးရွယ်အိုအမျိုးသမီးနှစ်ဦး သေဆုံးခဲ့ပြီးဒေသခံအမျိုးသားတစ်ဦးနှင့် အမျိုးသမီးနှစ်ဦးကျည်ထိမှန်ဒဏ်ရာရရှိခဲ့သည်ဟု​ဒေသခံများက​ပြောသည်။

ထို့အပြင်ဖမ်းဆီးခံထားရသည့် ဆားလင်းပအဖအဖွဲ့ဝင် ကိုဗန့်ကျီ(ခ)ကိုမြတ်သူလင်းကိုလည်း စစ်အုပ်စုက ​မေလကုန်ပိုင်းတွင်ဖမ်းဆီးခဲ့ပြီးနောက်သတ်ဖြတ်ကာ ထန်းတောရွာ သစ်ကွင်းအနီးတွင် ဇွန် ၁၁ ရက်ကအလောင်းအားပစ်ထားခဲ့သည်။ စစ်တပ်ကကိုဗန့်ကျီအလောင်း အနီးတွင် မိုင်းများ​ထောင်ခဲ့၍ အ​လောင်းသွားကောက်စဥ် စစ်သားများ ထောင်ထားသည့်နင်းမိုင်းကြောင့် ရဲဘော်တစ်ဦးခြေထောက်မိုင်းထိခဲ့ကြောင်း ​ဒေသခံများက ပြောသည်။