စစ်ကိုင်းတိုင်း၊ မုံရွာမြို့တွင် စစ်အုပ်စုတပ်စခန်းချရာနေရာများတိုက်ခိုက်ရာ စစ်ကားတစ်စီးပျက်စီးပြီး စစ်ကောင်စီတပ်သား နှစ်ဦးထက်မနည်းသေဆုံးကြောင်း ဒေသတွင်း တော်လှန်ရေးအင်အားစုများက ပြောသည်။
ယမန်နေ့(မတ်လ ၂၃ရက်) ညနေ ၅နာရီခန့်က မုံရွာမြို့နယ်ရှိ မုံရွေးနှင့် ကျောက္ကာကျေးရွာများအား စစ်ကြောင်းထိုး ပြန်လာသော စစ်ကား လေးစီးအား မုံရွာ – မန္တလေးလမ်းမပေါ်တွင် မုံရွာခရိုင်အမှတ် (၅)တပ်ရင်း၊ တပ်ခွဲ – ၁က ပဒေသာမိုင်းတွဲဖြင့် မိုင်းဆွဲတိုက်ခိုက်ခဲ့ကြောင်း မုံရွာခရိုင်အမှတ် (၅)တပ်ရင်း Aung San Force – A.S.F၏ သတင်းနှင့် ပြန်ကြားရေးတာဝန်ခံက ပြောသည်။
ထိုသို့တိုက်ခိုက်မှုကြောင့် စစ်ကားတစ်စီးပျက်စီးကာ စစ်ကောင်စီတပ်သားအချို့ ထိခိုက်သေဆုံးမှုရှိသည်ဟု အထက်ပါတာဝန်ခံက ဆိုသည်။
စစ်ကောင်စီဘက်ကလည်း ပြန်လည်ပစ်ခတ်သည့်အပြင် အနီးရှိ တောပုရွာမှ ပျူစောထီးများက လက်နက်ကြီးပစ်ကူခဲ့သော်လည်း ရဲဘော်များအထိအခိုက်မရှိဟု Aung San Force – A.S.F၏ သတင်းနှင့် ပြန်ကြားရေးတာဝန်ခံက ပြောသည်။
ယနေ့(မတ်လ ၂၄ ရက်) နံနက်၂နာရီခွဲခန့်က မုံရွာမြို့၊ အောင်ဇေယျရပ်ကွက် တောင်ကုန်းပေါ်ရှိ စစ်အုပ်စုစခန်းနှင့် ကင်းစခန်းများအား (၆၀) မမ၊ (၈၀) မမ၊ (၁၂၀) မမ လက်နက်ကြီးများဖြင့် စုပေါင်း အလုံးရေ ၁၀၀ခန့် ပစ်ခတ်တိုက်ခိုက်ခဲ့ကြောင်း Salingyi Border Task Force – SBTF အဖွဲ့ သတင်းနှင့် ပြန်ကြားရေးတာဝန်ခံက ပြောသည်။
စစ်အုပ်စုကလည်း (၆၀) မမများ၊ စက်များ၊ မောင်းပြန်များဖြင့် ပစ်ခတ်ခဲ့ကြောင်း၊ ထို့နောက် တပ်ပေါင်းစုအဖွဲ့များက ပြန်လည်ပစ်ခတ်ခဲ့ကြောင်း ၎င်းက ပြောသည်။
တပ်ပေါင်းစု ရဲဘော်များပစ်ခတ်လိုက်သည့် လက်နက်ကြီးကျည်များမှာ စစ်အုပ်စုရှိရာအနီး ကျရောက်ပေါက်ကွဲခဲ့ပြီး နှစ်ဦးသေဆုံးကာ တစ်ဦးပြင်းထန်ဒဏ်ရာရသည်ဟု အထက်ပါတာဝန်ခံက ဆိုသည်။
“ အောင်ဇေယျကုန်း ကချင်းတွင်းတံတားအနောက်ဘက်မှာ ရှိတာပါ။ မုံရွာ ကွက်သစ်ဗျ။ စစ်မှုထမ်းဟောင်းတွေအများစုနေတာ။ ချင်းတွင်းတံတားအနောက်ဘက်မှာ ရပ်ကွက်သစ် လုပ်ထားတာပါ။အဲ့မှာ အထိုင်ချတဲ့ စခ(စစ်ကောင်စီတပ်သား)တွေက လမ်းသွားပြည်သူတွေဆီက ဆက်ကြေးကောက်ခံတာတွေပြုလုပ်ပြီး စစ်ကြောင်းထိုးပြီဆိုလည်း စစ်မှုထမ်းဟောင်းမိသားစုတွေပါလာတတ်ပြီး ကျေးရွာပြည်သူ့နေအိမ်တွေကိုဝင်မွှေ ခိုးယူပြီး ကားနဲ့သယ်တာတွေလည်းရှိပါတယ်။” ဟု SBTF အဖွဲ့ သတင်းနှင့် ပြန်ကြားရေးတာဝန်ခံက ပြောသည်။
အဆိုပါ စစ်ဆင်ရေးအား Salingyi Border Task Force – SBTF ဆားလင်းကြီးမြို့နယ် ပြည်သူ့ကာကွယ်ရေးတပ်ဖွဲနှင့်ယင်းမာပင် – ဆားလင်းကြီး လက်နက်ကြီး မဟာမိတ်တပ်ပေါင်းစုတို့ ပူးပေါင်းတိုက်ခိုက်ခဲ့ကြောင်း အသိပေးထားသည်။
မုံရွာမြို့နယ်တွင် စစ်ကောင်စီတပ်ကလည်း ကျေးရွာများအား စစ်ကြောင်းထိုးမီးရှို့ခြင်း၊ ဒေသခံ ပြည်သူများနှင့် ရဲဘော်များအား ဖမ်းဆီးနှိပ်စက်သတ်ဖြတ်ခြင်းများ ပြုလုပ်နေသည်။
